Read nande Ezekĩelĩ 6 Bible Online

Ezekĩelĩ 6 - nande bible

Ezekĩelĩ 6

¹Ekĩnywa kyʼOmwami Mukulu mokyambĩkako kiti,

²Omugala wʼomundu ũlolaye obũsũ bwawe ebwanga bwʼebitwa byʼeĨsraelĩ uminyerere busana nabyo,

³ũbũge uti, ĩnywe bitwa byʼeĨsraelĩ, muhulikirire ekĩnywa kyʼOmukama Iye Omwami Mukulu! Omukama Iye Omwami Mukulu akabũga nʼebitwa, nʼehitwa, emigende nʼemisya ati, Lebaya, ĩngye nĩna ngye, nasyabaletera omũyalĩ, kandi nasyaherya aho wenyũ hʼendata.

⁴Kandi ahʼeriherera henyũ hasyabya kĩma, nʼebiherero byenyũ byʼobukwa byasyabũnangwa. Kandi nasyaleka abandu benyũ abakĩtawa ibawa embere wʼesyosanamu syenyũ.

⁵Nage nasyahĩra ebĩnda byʼabana ba Ĩsraelĩ embere wʼesyosanamu syenyũ. Kandi nasyapanza-panza amakũha wenyũ oko mbande syosĩ syʼebiherero byenyũ

⁶Ehosĩ ahʼerĩĩkala henyũ, emĩyĩ yasyayirwa mo kĩma, nʼahʼendata henyũ hasyabya mulala. Ebiherero byenyũ bibye omo kĩma nʼeriyirwa mo mulala, nʼesyosanamu syenyũ sĩbũnangawe nʼerĩũmbya, nʼebiherero byenyũ byʼobukwa bikonderawe ahisi, nʼemĩbĩrĩ yenyũ isangulawe.

⁷Nʼabandu abĩtawa basyawa omo katĩkatĩ kenyũ, nenyũ mwasyaminya ko ndi Mwami Mukulu.

⁸Nĩkwa, nasyasĩga ekihande kyabo, kusangwa mwasyabya nʼabandi bandu ababala omũyalĩ omo katĩkatĩ kʼebihanda, omugulu mukasyapanzirawa omo bihugo.

⁹Nenyũ abakasyabala mwasyanyibuka omo katĩkatĩ kʼebihanda eyo babirihekwa mo banyegwa, ngoko nabiriagalwa omo mutima busana nʼemitima yabo yʼerĩsĩngĩra, eyabĩrĩnyĩsĩga, na busana nʼameso wabo, awakagendera omwʼĩsĩngĩra lyʼesyosanamu syabo. Nabo basyayĩkwa obusu omo meso wabo busana nʼebibi ebyo babirikola, omo nye syabo syosĩ.

¹⁰Neryo basyaminya ko ndi Mwami Mukulu. Sĩndĩtabũga busa nyiti nasyaleterabo erĩkwa erĩ.

¹¹Omukama Iye Omwami Mukulu ati, Swĩraya oko byala byawe, ũhĩnde oko bisando byawe, ũbũge uti, Ĩyoo!, busana nʼesyonye syosĩ nyibi syʼekihanda kya Ĩsraelĩ, ekyasyawa omo mũyalĩ, omo nzala, nʼomo ndwala yʼakasũsũ.

¹²Oyuli hali asyahola omo ndwala yʼakasũsũ, nʼoyuli hakũhĩ asyawa omo mũyalĩ, nʼoyo wasĩgalira nʼeribambirwa nʼoluhi asyahola omo nzala. Litya nasyaberererya erihitana lyage lyo kubo.

¹³Nenyũ mwasyaminya ko ndi Mwami Mukulu omugulu abandu babo abĩtawa basyabya omo katĩkatĩ kʼesyosanamu syabo ĩbatĩmbĩre oko biherero byabo, oko buli kitwa kiri, nʼoko mitwe yosĩ yʼebitwa, nʼomwisi wʼobuli muti mubisi, nʼomwisi wʼobuli muti wʼeterebĩntĩ aho baherera ebikakumba ndeke oko syosanamu syabo syosĩ.

¹⁴Nage nasyasumba ebyala byage byo kubo ehosĩ bĩkere nʼeriyira ekihugo mo mulala nʼekĩma kwilaba embwarara, erĩlolya eDĩbla. Litya basyaminya ko ndi Mwami Mukulu.