Read nande Ezekĩelĩ 8 Bible Online

Ezekĩelĩ 8 - nande bible

Ezekĩelĩ 8

¹Neryo mokyabya oko mwaka wʼendatu, nʼoko mukera wʼendatu, oko kiro kyʼebitanu kyʼomukera, omugulu nabya nyĩkere omo nyũmba, nʼabakulu bʼeYũda ĩbĩkere embere syage, ebyala bʼomukama Iye Omwami Mukulu mobyanyiwirako aho.

²Neryo monalebya, neryo lebaya, ekĩsosekanĩo ekiri ngʼomubiri wʼomundu. Erĩtsũka oko mbindi yiwe erĩlolya eyĩkwa, habya ekĩsosĩre omuliro, nʼerĩtsũka oko mbindi yiwe nʼerilola endata, habya ekĩsosĩre erĩkangabasanĩa, erĩsosĩre eriaka lyʼomulinga.

³Neryo mwakakya ekĩsosĩre ebyala, neryo mwambamba omwʼisunzu omo mutwe wage. NʼOmũlĩmũ mwanyisumba endata omo katĩkatĩ kʼekihugo nʼolubula, mwanyireta omo nzolĩ sya Nyamuhanga aho eYerũsalema, oko lũyĩ lwʼobwingiriro bʼolũkyo lwʼekibuga kyʼomwisi ekĩlolĩre elutambi lwʼendata, ahabya ekĩtũmbĩ kyʼesanamu eyikaleta obũha.

⁴Neryo, lebaya, olukengerwa lwa Nyamuhanga wa Ĩsraelĩ lwabyaho, ngʼekĩsosekanĩo ekyo nalangira omo bwerere.

⁵Neryo mwambwira ati, Omugala wʼomundu, lino Usumbe ameso wawe erilola elutambi lwʼendata. Neryo monasumba ameso wage oko luhande lwʼelutambi lwʼendata, neryo lebaya, oko lutambi lwʼendata lwʼolũkyo lwʼekiherero habya esanamu eyĩ yʼobũha oko lũkyo.

⁶Naye mwabũga nage ati, Mugala wʼomundu unemulangira ebyo bakakola kwehĩ? Nʼesyonye nene ekihanda kya Ĩsraelĩ kikakola hano, nyibye hali oko habũyĩrĩre hage kwehĩ? Nĩkwa uwe wasyalangira esindi nye nene kwʼaho.

⁷Neryo mwanyireta oko lũyĩ lwʼekibuga, nʼomugulu nasamalira, lebaya, ihali ekyũna omo lũhĩmbo.

⁸Neryo mwambwira ati, Omugala wʼomundu, utobole omo lũhĩmbo. Neryo nabere nabitobola omo lũhĩmbo, neryo lebaya mohabya olũkyo.

⁹Naye mwambwira ati, Ingira, ũlebaye esyonye esyo bakakola hano.

¹⁰Ko ningira nyitya nʼerilangira, neryo lebaya, obuli mũsĩndo wʼebikakululuka, nʼesyonyama nyibi, haguma nʼesyosanamu syosĩ syʼekihanda kya Ĩsraelĩ, ĩsĩbatsĩre oko lũhĩmbo oko mbande syosĩ.

¹¹Neryo abakulu makũmĩ alinda bʼekihanda kya Ĩsraelĩ babya bimeneho embere syabyo, haguma na Yazanĩa mugala wa Safanĩ inianimene omo katĩkatĩ kabo, obuli mundu iniawite oko muteho omo byala biwe, nʼerikumba ndeke lyʼekĩtũ kyʼobukwa mokyahetukira endata.

¹²Neryo mwambwira ati, Mugala wʼomundu, Wamalangira ebyo abakulu bʼekihanda kya Ĩsraelĩ bakakola omo mwĩrĩmya, obuli mundu omo byumba biwe byʼesyosanamu esĩbatsĩre kwehĩ? Kusangwa bakabũga bati, Omwami Mukulu sĩatũlangĩre. Omwami Mukulu abĩrĩsĩganĩa ekihugo.

¹³Kandi mwambwira ati, Wasyalangira kandi esindi nye nene esyo bakakola.

¹⁴Neryo mwanyireta oko lũyĩ lwʼolũkyo lwʼenyũmba yʼOmwami Mukulu olwabya oko luhande lwʼelutambi lwʼendata, neryo lebaya, abakalĩ babya bĩkere bakalirira Tamũsĩ.

¹⁵Neryo mwambwira ati, Omugala wʼomundu, wanamalangira ekĩ kwehĩ? Ukandilangira kandi esyonye nene kwilaba esĩ.

¹⁶Neryo mwanyireta omo kibuga kyʼomwisi kyʼenyũmba yʼOmwami Mukulu. Neryo lebaya, oko lũkyo lwʼeHekalũ yʼOmwami Mukulu, omo katĩkatĩ kʼobũsekũ nʼekiherero, habya abandu makũmĩ abiri nʼabatanu, emigongo yabo ĩyĩlolĩrye ebwanga bwʼeHekalũ yʼOmwami Mukulu, nʼamũsũ wabo ĩnĩalolĩre oko luhande lwʼendata. Neryo ĩbakaramaya oko luhande lwʼendata ebwanga bwʼeryuba.

¹⁷Neryo mwambwira ati, Uwe mugala wʼomundu, wanamalangira ekĩ kwehĩ? Ni mwatsi muke busana nʼekihanda kyʼeYũda erikola esyonye esyo bakakola hano kwehĩ? Kusangwa babĩrĩũsũlya ekihugo omo butsibu, kandi babĩrĩnyĩhĩtanĩa ngendo nyingi. Kusangwa lebaya, bati bakanyĩkũta-kũtaya.

¹⁸Busana nʼekyo kwenene nasyakola omwʼihitana. Nʼerĩso lyage siryendisyaganyira, kutse sindiendisyasasira. Nomo bangalakira omo matwĩ wage nʼomulenge munene, nĩkwa sĩndĩendĩsyowabo.