Read nande Danĩelĩ 11 Bible Online

Danĩelĩ 11 - nande bible

Danĩelĩ 11

¹Nĩkwa ĩngye, omo mwaka wʼerĩmbere wa Darĩo Omũmedĩ, monahangana erĩmũsĩkya nʼerimuhanganira.

²Na lino ngandĩkũkangya ebyʼekwenene. Lebaya, hakandisyahangana abami basatu ePersĩa. Nʼowʼakani asyabya mũsokĩ kwilaba abandi bosĩ. Neryo omugulu amabibana amaka busana nʼobũsokĩ buwe, asyakola-kolya obwami bosĩ erilwa nʼobwami bwʼAbagrĩkĩ.

³Neryo omwami wʼamaka asyahangana oyo Wasyatabala nʼobutabale bunene, nʼerikola ebyo anzĩre.

⁴Nĩkwa omugulu amabihangana, obwami buwe bwasyatwĩka, kandi bwasyagabana erĩlolya oko syombande ĩnĩ, nĩkwa si busana nʼabana buwe kutse ngʼeritabala liwe eryo atabalamo; kusangwa obutabale buwe bwasyalũsĩbwa nʼerihabwa abandi bandu butsira abuwe.

⁵Neryo omwami wʼelutambi lwʼeYĩkwa asyabya nʼamaka haguma nʼomunyamwami muguma wuwe oyo wasyabya nʼamaka nʼerĩmũlũsya oko ngoma, nʼeritabala; kandi obutabale buwe bwasyabya butabale bunene.

⁶Kandi enyũma wʼeyindi myaka basyaya embĩta, neryo mwali wʼOmwami wʼelutambi lwʼeYĩkwa asyasa oko mwami wʼelutambi lwʼeNdata eriyira endangano yʼobuholo. Nĩkwa mwali oyũ siendisyabana maka, nʼomwami wʼelutambi, lwʼeNdata sĩendĩsyasĩgala nʼamaka wuwe, nĩkwa mwali oyũ asyahigwa haguma nʼabamuleta, nʼoyo wamubuta, nʼoyo wamwimira oko migulu eyo.

⁷Nĩkwa omwana muguma wʼomwali oyo wʼomo kihanda kiwe asyahangana omo mwanya wuwe nʼerĩlwa nʼomulondo wabo, nʼeriingira ahakongotere hʼOmwami wʼelutambi lwʼeNdata, nʼerilwa nabo nʼerĩkangya amaka manene.

⁸Kandi asyahũnga esyonyamuhanga syabo haguma nʼesyosanamu syabo syʼekyuma, nʼebindu byabo bibuya byʼekĩtsĩpa nʼesyamagetsi, asyatwalabyo omo bunyegwa eMĩsĩrĩ. Nĩkwa iye siendisyalwa nʼomwami wʼelutambi lwʼeNdata oko yindi myaka.

⁹Nĩkwa omwami wʼelutambi lwʼeNdata asyingira omo bwami bwʼomwami wʼelutambi lwʼeYĩkwa, nĩkwa asyasuba omo kihugo kiwe.

¹⁰Neryo abagala buwe basyalwa nʼerĩhĩndanĩa haguma endeko nene yʼemilondo mingi; neryo omuguma wabo asyalaba nʼeritwangana atoke erilwa nʼerĩhĩka ahakongotere hʼOmwami wʼelutambi lwʼeYĩkwa.

¹¹Neryo omwami wʼelutambi lwʼeYĩkwa asyahitana kutsibu nʼerihongoka eriyalwa nʼomwami wʼelutambi lwʼeNdata. Neryo omwami wʼelutambi lwʼeNdata asyahanganĩa endeko nene, nĩkwa endeko eyo yasyahabwa omo byala byʼOmwami wʼelutambi lwʼeYĩkwa busana nʼerĩhũngwa.

¹²Omugulu endeko eyo yasyatwalwa erĩhũngwa, omutima wʼOmwami oyo asyayĩhamya, kandi asyaleka abandu elfu makũmĩ eriwa, nĩkwa siendisyasĩngana.

¹³Nʼomwami wʼelutambi lwʼeNdata asyaswahĩndanĩa nʼeriteka endwiro nene kwilaba eyʼerĩmbere; neryo enyũma eyindi myaka haguma nʼomulondo munene nʼendwiro nene.

¹⁴Neryo oko migulu eyo abandu bangi basyahangana nʼeribambira omwami wʼelutambi lwʼeYĩkwa; kandi abandu bʼomwaga omo katĩkatĩ kʼabandu bawe basyayisumba bati bakaberereraya erilota eryo, nĩkwa basyawa.

¹⁵Neryo omwami wʼelutambi lwʼeNdata asyasa nʼerĩhanganĩa ekilundo kinene kyʼekitaka, nʼerĩhũnga omũyĩ owakongotere ndeke, neryo emilondo yʼelutambi lwʼeYĩkwa siyendisyahangana, kutse esyombangĩ syʼabasĩrĩkanĩ babo, kusangwa sibendisyabana amaka wʼerihangana.

¹⁶Nĩkwa omwami wʼelutambi lwʼeNdata oyukasa erilwa naye asyakola ngoko anzĩre, isihali mundu oyo wasyatoka erilwa naye; kandi asyasiba omo Kihugo Kibuya, iniawite erĩherya omo byala biwe.

¹⁷Kandi asyalenga erĩhĩka nʼamaka wʼobwami buwe bosĩ erĩkĩnda obwami bwʼelutambi lwʼeYĩkwa, iniakaleta omwatsi wʼeriyira Obuholo naye. Asyayira Obuholo obo; kandi omwami oyo wʼelutambi lwʼeNdata asyamuha omwana-muto erĩheryakyo. Nĩkwa omwana-muto oyo siendisyamuhanganira kutse erimwimira.

¹⁸Neryo omwami oyo wʼelutambi lwʼeNdata asyayĩlolya ebwanga bwʼengetsi nʼerĩhũnga abangi. Nĩkwa ogundi mũsondolĩ asyamũhanganĩa nʼerĩmũsĩnga omo bĩtsũmĩ biwe.

¹⁹Neryo owʼelutambi lwʼeNdata asyayĩlolya ahakongotere hʼekihugo kiwe, nĩkwa eyo asyatwĩkala nʼeriwa isiendisyaswabanika kandi.

²⁰Neryo omo mwanya wuwe omwami asyahangana oyo wasyatuma omũsolesya omo Kihugo Kibuya, nĩkwa asyaherĩbwa butsira omwʼihitana kutse amalwa.

²¹Neryo omo mwanya wuwe omundu mutya-mutya asyahangana oyutetahabwa erĩsĩkya lyʼobwami, nĩkwa asyasa omo mugulu wʼobuholo iniahamba obwami omo menge nʼeriteba.

²²Nʼemilondo yʼamalwa yasyalũsĩbwa embere siwe nʼerĩkĩndwa, nʼomunyamwami wʼendagano nibya.

²³Neryo basyabya babilagana naye asyateba, neryo asyahetuka, nʼeribana Obũtokĩ haguma nʼabandu bake.

²⁴Omo mugulu wʼobuholo asyaya omo bihugo byʼebindu, nʼerikola ebyo abotata wuwe nʼaboso-kulu wuwe batakola; asyahĩtya ebinyegwa, nʼebyo ahũnga, nʼebindu omo katĩkatĩ kabo. Asyayisohera emyatsi busana nʼeribambira ahakongotere, nĩkwa ni busana nʼakatambĩ kake buyira.

²⁵Asyayiketera amaka wuwe, nʼerihanda omutima wuwe erilwa nʼomwami wʼelutambi lwʼeYĩkwa haguma nʼomulondo munene; neryo omwami wʼelutambi lwʼeYĩkwa asyahĩndanĩa omulondo wʼamalwa omunene nʼowʼamaka. Nĩkwa Siendisyahangana, kusangwa omwami wʼelutambi lwʼeYĩkwa Siendisyahangana kusangwa basyamusohera nʼamenge.

²⁶Kandi abakalya akalyo kabuya haguma naye oko mesa basyamũherya, nʼemilondo yiwe yasyalũsĩbwaho, nĩkwa abangi basyawa nʼerĩkwa omo malwa.

²⁷Neryo abami bosĩ babiri, emitima yabo yasyasondya ebibi, kandi ababiri bosĩ basyĩkala oko mesa ibanemubihirana. Nĩkwa sibendisyatoka mwatsi, kusangwa endũlĩ yʼomwatsi yasyahĩka oko ndambĩ eyahulawa.

²⁸Neryo omwami wʼelutambi lwʼeNdata asyasuba omo kihugo kiwe nʼobũsokĩ bunene; nĩkwa omutima wuwe asyabya nʼobũyĩgũ busana nʼendagano ĩbũyĩrĩre. Neryo asyakola nʼerisuba omo kihugo kiwe.

²⁹Oko mugulu ahulawa asyaswasa nʼeriya elutambi lwʼeYĩkwa, nĩkwa oko mugulu oyũ siendisyatoka ngoko atoka erĩmbere.

³⁰Kusangwa amato wʼeKĩtĩmũ asyasa nʼerilwa naye; neryo asyabula omutima, neryo asyasubula, kandi asyahitana busana nʼendagano ĩbũyĩrĩre nʼerilwa; litya asyasubula nʼerĩsĩma abakaleka endagano ĩbũyĩrĩre.

³¹Neryo emilondo yiwe yasyahangana nʼerĩtsandya ahakongotere habũyĩrĩre, nʼerĩlũsya obuhere bwʼebiro byosĩ. Kandi basyahanganĩa enye yʼerĩherya.

³²Neryo omo kĩsehya asyabindula abandu abakakola nabi erĩsĩga endagano ati sibekenga Nyamuhanga. Nĩkwa abandu abasĩ Nyamuhanga wabo basyabya nʼamaka nʼerikola ebĩkalĩre.

³³Kandi abandu abawite amenge basyakangĩrĩrya amenge oko bandi bangi; nĩkwa basyawa busana nʼomũyalĩ, nʼomuliro, busana nʼerĩhũngwa, kandi busana nʼerĩpũra ebindu, busana nʼebiro bingi.

³⁴Neryo omugulu bakawa basyawatĩkĩbwa hake, kandi abandu bangi basyayitomeka kubo omwʼiteba.

³⁵Kandi abandi abawite amenge basyawa erĩtũkũryabo, nʼerĩeryabo, nʼeriyirabo mo babuya, erĩhĩka oko mugulu wʼendũlĩ owakandĩsyahĩka oko ndambĩ eyahulawa.

³⁶Neryo omwami oyo asyakola ngoko anzĩre, kandi asyayĩhamya nʼeriyipipa endata oko buli nyamuhanga, kandi asyabũga ebĩnywa bitsibu erilwa na Nyamuhanga wʼesyonyamuhanga; kandi asyagasa erĩhĩka aho mugulu wʼerihitana asyahwera, kusangwa ekyahamulawa kyasyakolwa.

³⁷Kandi siendisyatsomana abotata wuwe, kutse oyũkayĩtsũtsawa nʼabakalĩ. Kandi siendisyatsomana ogundi nyamuhanga; kusangwa asyayĩhamya endata oko bosĩ.

³⁸Nĩkwa asyasĩkya nyamuhanga wʼahakongotere, nyamuhanga oyo abotata wuwe bataminya. Asyamũsĩkya omo syamagetsi, nʼebĩtsĩpa, nʼamabwe wʼobũgũlĩ bunene, nʼebindu.

³⁹Asyalwa nʼahakongotere kutsibu haguma nʼerĩwatĩkĩbwa lya nyamuhanga wʼehandi. Asyasĩkya kutsibu abakamũsĩma, kandi asyaleka ibatabala oko bandu bangi, nʼerĩgũlya ebitaka busana nʼenzwere.

⁴⁰Neryo oko mugulu wʼendũlĩ omwami wʼelutambi lwʼeYĩkwa asyabandana naye, nʼomwami wʼelutambi lwʼeNdata asyamubambira ngʼakanyabungu omo syogalĩ, ba bandu abali oko syosabayĩrĩ, haguma nʼamato mangi; kandi asyingira omo bihugo bingi, nʼerilaba kubyo, nʼeritwangana mubyo.

⁴¹Asyingira omo Kihugo Kibuya nibya, nʼebihugo bingi byasyawa; nĩkwa ebihugo byʼeEdomũ, nʼeMoabũ, nʼabagala ba Amonĩ bʼerĩmbere basyalamĩbwa bakabala ebyala biwe.

⁴²Neryo asyasumba ebyala biwe erilwa nʼebindi bihugo, nʼekihugo kyʼeMĩsĩrĩ sikyendisyabala.

⁴³Nĩkwa asyatabala oko bindu ebĩbĩsamĩre byʼesyamagetsi, nʼebĩtsĩpa, nʼebindu byosĩ byʼobũgũlĩbunene byʼeMĩsĩrĩ; kandi Abanya Lĩbĩa, nʼAbanya Etĩopĩa basyamukwama.

⁴⁴Nĩkwa esyongulu esĩkalũa ebwanga bwʼeNdata, nʼebwanga bwʼelutambi lwʼeNdata, syasyahanga-hangya omutima wuwe, neryo asyahuluka nʼerihitana lĩnene erĩherya nʼerĩĩta abandu bangi.

⁴⁵Neryo asyahanda amahema wʼekikali kiwe omo katĩkatĩ kʼengetsi nʼeKitwa Kibũyĩrĩre kibuya. Nĩkwa asyahĩka oko ndũlĩ yiwe, isihali mundu wasyamũwatĩkya.