Read nande Danĩelĩ 12 Bible Online

Danĩelĩ 12 - nande bible

Danĩelĩ 12

¹Nĩkwa oko mugulu oyo omunya-mwami mukulu, ye Mĩkaelĩ, kategaya abandu benyũ, asyahangana. Neryo hasyabya endambĩ yʼobũlĩge, obute bwatabya erĩtsũka omugulu ekihanda kyatsũka, nʼerĩhĩka oko mugulu ono; kandi oko mugulu oyo abandu benyũ basyalamĩbwa obuli mundu oyukabanika iniabirisakwa omo kitabu.

²Kandi abandu bangi abagotsere omo lũtũtũ lwʼekitaka basyabuka, abandi busana nʼengebe yʼerikota, nĩkwa abandi busana nʼerihemuka nʼesyonye syʼerikota.

³Nĩkwa abandu bʼamenge basyakangabasanĩa ngʼerĩhema lyʼekyanya. Kandi abakasondola abandu bangi eribana ekitunganene, basyakangabasanĩa ngʼesyongũnũnũ kera na kera.

⁴Nĩkwa uwe Danĩelĩ, ũbĩse ebĩnywa ebĩ, kandi ũkũmbe ekitabu erĩhĩka oko mugulu wʼendũlĩ yʼemigulu. Abandu bangi basyalaba eyĩ nʼeyĩ, nʼeriminya lyasyakanyirira.

⁵Neryo, ĩngye Danĩelĩ monalangira, neryo lebaya, monalebya abandi bandu ababya bimene, omuguma oko mukyingyi wʼeno wʼolũsĩ, nʼogundi oko mukyingyi wʼeyisirya wʼolũsĩ.

⁶Neryo omuguma mwabwira omundu oyo wambite esyongimba syʼekĩtanĩ, oyo wabya ebwanga bwʼendata oko lũsĩ ati, Kwʼendũlĩ yʼemyatsi eyĩ yʼeriswekera yasyabya mugulu wahi kwehĩ?

⁷Neryo omundu oyo wabya wambite ekĩtanĩ, oyo wabya ebwanga bwʼendata oko lũsĩ, mwasumba ebyala biwe byʼamali nʼebyʼamalembe erĩlolyabyo elubula, neryo mwalahĩrya ukwʼoyuliho kera na kera ati, Omwatsi asyabya oko mugulu nʼemigulu, nʼembindi yʼomugulu; kandi omugulu basyabuga erĩhũnza Obũtokĩ bwʼabandu babũyĩrĩre, emyatsi eyĩ yosĩ yasyahĩkana.

⁸Nĩkwa ĩngye, monowa, nĩkwa monataluka eriminyabyo; kyaleka ĩnabũga nyiti, mukama wage, kwʼemyatsi eyĩ yasyabya iti kwehĩ?

⁹Neryo omundu oyo mwabũga ati, Uwe Danĩelĩ, uyigendere, kusangwa ebĩnywa ebĩ bĩbĩsamĩre, kandi bĩbĩsĩre erĩhĩka oko mugulu wʼendũlĩ.

¹⁰Abandu bangi basyerĩbwa, nʼeriyirwa mo babuya nʼeritukurwa; nĩkwa ababi basyakola nabi, isihali mundu mubi oyo wasyaminya, nĩkwa abʼamenge basyaminya.

¹¹Kandi erĩtsũka omugulu obuhere bwʼebiro byosĩ bwasyalũsĩbwaho, nʼekyʼesyonye syʼerĩherya kyasyahanganĩbwa, hasyabya ebiro elfu nguma nʼamagana abiri nʼamakũmĩ mwenda (1,290).

¹²Obutseme buli oko mundu oyukalindirira erĩhĩka oko biro elfu nguma nʼebiro magana asatu nʼamakũmĩ asatu nʼebitanu (1,335)!

¹³Nĩkwa uwe, ugende ũhĩke oko ndũlĩ, neryo Wasyabana eriluhuka, neryo wasyalũbũka oko ndũlĩ yʼemigulu busana nʼerĩgabo lyawe eryabiriahulwa.