Read nande Danĩelĩ 2 Bible Online

Danĩelĩ 2 - nande bible

Danĩelĩ 2

¹Oko mwaka wʼakabiri wʼeritabala lya Nebũkadeneza, Nebũkadeneza mwalota esyonzolĩ, nʼomutima wuwe mwakukubala, nʼotũgotserĩ tuwe motwamuhwako.

²Neryo omwami mwahamula abasaki nʼabakũmũ nʼabalagũlĩ, nʼAbakaldea, ati babirikirawe eribikulira omwami erilota liwe. Neryo mobahangana embere syʼomwami.

³Nʼomwami mwabwirabo ati, Mongalota esyonzolĩ, nʼomutima wage akasũsũmana busana nʼerisonda eriminya erilota eryo.

⁴Neryo Abakaldea mobabwira omwami omo mũbũge wʼEkiaramia bati, Uwe mwami ukote; ubwire abagombe bawe erilota eryo, netu tukandibikulalyo.

⁵Neryo omwami mwasũbĩryabo mwabwira Abakaldea ati, Namasoha nyiti, mwamatindanyĩmĩnyĩsya erilota eryo, nʼeribikulalyo mwasyatsũtsangwa mo bihande bihande, nʼamanyũmba wenyũ iniayirwa mo kyabũ.

⁶Nĩkwa mwamanyĩkangya erilota eryo nʼeribikulalyo, nasyabaha endũndĩ nʼoluhembo nʼerĩsĩkya lĩnene; neryo mũnyĩmĩnyĩsaye erilota eryo nʼeribikulalyo.

⁷Nabo mobamũsũbĩrya engendo yʼakabiri bati. Omwami abwire abagombe buwe erilota eryo, netu tũkandĩkangya eribikulalyo.

⁸Omwami mwasũbĩrya ati, Nyĩnasĩ kwenene ko mukasonda erĩyĩhambũlya, kusangwa mwabirilangira ko nabirisoha omwatsi,

⁹nyiti mwamatindanyĩmĩnyĩsya erilota eryo, hali kihano kiguma kisa busana nenyũ. Kusangwa mwabirimirana ebĩnywa byʼamabehĩ nʼebĩnywa bibi erĩbũga embere syage, erĩhĩka aho mugulu asyahwera; neryo mumbwire erilota eryo, neryo nasyaminya ko mwasyatoka erĩnyĩkangya eribikulalyo.

¹⁰Neryo Abakaldea mobasũbĩrya embere syʼOmwami bati, Sihali mundu omo kihugo oyo wangatoka erĩkangya omwatsi wʼOmwami, kusangwa sihali mwami, nʼomukama, kutse mũtabalĩ oyo wabĩrĩbũlya omwatsi ngʼoyũ oko musaki, kutse oko mũkũmũ, kutse Omukaldea.

¹¹Kandi ni mwatsi owatebanika na mũhwa ogo mwami akabũlaya, kandi sihali gundi mundu wangatoka erĩmĩnyĩsyago omwami, sye nʼesyonyamuhanga, esitawite ahʼerĩĩkala haguma nʼabandu.

¹²Busana nʼomwatsi oyũ, omwami mwahitana mwakarama kutsibu, mwahamula erilalika abandu bosĩ bʼamenge bʼeBabelĩ.

¹³Neryo ehamũlĩ eyo yʼerĩĩta abʼamenge moyahuluka, neryo mobasondya Danĩelĩ nʼabalĩkyabo bati bĩtawe.

¹⁴Neryo Danĩelĩ mwasũbĩrya omo bũganĩrya nʼamenge uku Arĩokĩ omukulu wʼabateya bʼomwami oyo wahuluka erĩĩta abʼamenge bʼAbanya Babelĩ.

¹⁵Neryo Danĩelĩ mwasũbĩrya mwabwira Arĩokĩ omukulu wʼOmwami ati, Busana nakĩ erihamula lyʼOmwami lĩkalĩre litya kwehĩ? Neryo Arĩokĩ mwakanĩrya Danĩelĩ omwatsi oyo.

¹⁶Neryo Danĩelĩ mwingira ewʼomwami, mwabũlya omwami erimuha endambĩ, iniatoka erĩkangya omwami eribikula eryo.

¹⁷Neryo Danĩelĩ mwaya ewuwe, mwatũlĩra omwatsi oyo gʼuku Hanania, na Mĩsaelĩ, na Azaria abalĩkyabo.

¹⁸Ati, basondaye eriganyira lya Nyamuhanga wʼelubula busana nʼekĩbĩsĩre ekĩ; Danĩelĩ nʼabalĩkyabo sibahere haguma nʼabandi bandu bʼamenge bʼeBabelĩ.

¹⁹Neryo Danĩelĩ mwabĩsũlĩrwa ekĩbĩsĩre ekyo, omwʼilota lyʼesyonzolĩ omo kiro. Neryo Danĩelĩ mwapipa Nyamuhanga wʼelubula.

²⁰Danĩelĩ mwasũbĩrya mwabũga ati, Erĩna lya Nyamuhanga lipipawe kera na kera; kusangwa amenge nʼobũtokĩ ni biwe.

²¹Kandi akabindula emigulu nʼebirimo; akasingula abami, kandi ĩnĩasĩngya abami; akaha amenge oko bʼamenge, akaha eriminya oko banyima;

²²akabĩsũla emyatsi eyʼehali nʼeyĩbĩsĩre; akaminya ebiri omo mwĩrĩmya, nʼekyakakala kĩkere haguma naye.

²³Ngakuha ewasĩngya, ngakupipa, uwe Nyamuhanga wʼabotata wage, uwe wanyiha amenge nʼobũtokĩ, na lino wabĩrĩnyĩmĩnyĩsya ebyo twakusondako; kusangwa wabĩrĩtũmĩnyĩsya omwatsi wʼOmwami.

²⁴Neryo Danĩelĩ mwaya ewa Arĩokĩ, oyo mwami ahamula erĩherya abʼamenge bʼeBabelĩ; mwayamubwira ati, Sũheraye abʼamenge bʼeBabelĩ; unyitwale embere syʼOmwami, nage ngandĩkangya omwami eribikula eryo.

²⁵Neryo Arĩokĩ mwatwala Danĩelĩ embere syʼOmwami lũba, mwamubwira ati, Namabana omundu gʼoko bandu bʼeYũda abahũngawa, akandĩmĩnyĩsya omwami eribikulalyo.

²⁶Nʼomwami mwasũbĩrya mwabwira Danĩelĩ oyo wabya akahulwa mo Beltesaza, ati, Wanganatoka erĩnyĩmĩnyĩsya erilota eryo nabirilangira, nʼeribikula lyalyo kwehĩ?

²⁷Danĩelĩ mwasũbĩrya embere syʼOmwami, ati, Ekĩbĩsĩre ekyo mwami akabũlaya abandu bʼamenge, nʼabasaki, nʼabalagũlĩ, kutse abakũmũ sibangatoka erĩbĩsũlĩra omwami.

²⁸Nĩkwa hali Nyamuhanga elubula oyũkabĩsũla ebĩbĩsĩre, naye abĩrĩmĩnyĩsya Nebũkadeneza ebikandisyabya oko biro byʼenyũma. Erilota lyawe, nʼesyonzolĩ syʼomutwe wawe oko ngyingo yawe byebĩ.

²⁹Nĩkwa uwe mwamĩ, amalengekanĩa wawe awakũhĩkako oko ngyingo yawe, bye bikandisyabya enyũma; nʼoyũkabĩsũla ebĩbĩsĩre abĩrĩkũmĩnyĩsya ebikandisyabya.

³⁰Nĩkwa ĩngye, ekĩbĩsĩre ekĩ sikyetabĩsũlwa ũkwʼĩngye, busana nʼamenge ago ngwite kwilaba abandi abaliho, nĩkwa busana nʼerĩmĩnyĩsya omwami eribikula lyasyo, iwatoka, eriminya amaganĩrya wʼomutima wawe.

³¹Uwe mwami, mowalangira, neryo lebaya habya esanamu nene. Esanamu eyo yabya nene, nʼerĩkangabasanĩa lyayo lyabya libuya, moyahangana embere syawe, nʼerisosa lyayo lyabya lĩsũsũmenĩe.

³²Nĩkwa omutwe wʼesanamu eyo abya wʼesyamagetsi esĩtũkwĩre, nʼekĩkũba nʼamaboko wayo byabya byʼesyʼekĩtsĩpa, enda yayo nʼembindi yayo byabya byʼemiringa,

³³emihimbi yayo yabya yʼekyuma, ebisando byayo byabya ekitswe kyʼekyuma nʼekitswe kyʼeribumba.

³⁴Kandi wabya ukasamalira erĩhĩka aho erĩbwe eryabatsawa butsira byala, nalyo molyaswĩrya esanamu eyo oko bisando byayo ebyabya byʼekyuma nʼeribumba, molyatulangabyo mo bihande bihande.

³⁵Neryo ekyuma ekyo nʼeribumba eryo, nʼomulinga, nʼekĩtsĩpa, nʼesyamagetsi, mobyatulangwa mo bihande bihande oko saa nguma, mobyabya ngʼomusunga omo bĩhũmbĩro omugulu wʼobugoma; neryo erihunga molyagũlũkyabyo, neryo mobitaswabanika nʼahake; nʼerĩbwe eryo eryaswĩraya esanamu molyabya kitwa kinene, molyũsũlya ekihugo kyosĩ.

³⁶Erilota lyeryo, netu tũkandĩbũga eribikula lyalyo embere syʼOmwami,

³⁷Uwe mwami uli mwami wʼabami, na Nyamuhanga wʼelubula abirikuha obwami, nʼobũtokĩ, nʼamaka, nʼolukengerwa;

³⁸nʼehosĩ aho abana bʼabandu bĩkere, esyonyama syʼomolĩ, nʼesyonyonyũ syʼekyanya abĩrĩhĩrasyo omo byala byawe, abĩrĩkũtabalĩsya kusyo esyosĩ. Uwe uli mutwe wʼesyamagetsi.

³⁹Nʼenyũma ukʼuwe obundi bwami bwasyahangana obuke kwilaba obwawe; kandi obundi bwami bwʼakasatu bʼomulinga obukasyatabala ekihugo kyosĩ.

⁴⁰Nʼobwami bwʼakani bwasyabya nʼamaka ngʼekyuma, kusangwa ngoko ekyuma kikatulanga ebihande bihande nʼerĩkĩnda ebindu byosĩ, kandi ngoko ekyuma kĩkahĩmata ebyosĩ ebĩ, ko bwasyatulangago mo bihande bihande nʼerĩhĩmatago.

⁴¹Kandi ngoko walangira ebisando nʼamano, ekitswe kyʼeribumba lyʼomũbũmbĩ nʼekitswe kyʼekyuma, bwasyabya bwami obugabene; nĩkwa mubo mwasyabya amaka wʼekyuma, kusangwa mowalangira ekyuma ĩkĩtũlũngene nʼeribumba lyʼolondo.

⁴²Kandi ngoko amano wʼebisando abya ekitswe kyʼekyuma nʼekitswe kyʼeribumba, obwami obo ko bwasyabya butya ekitswe kyʼamaka nʼekindi kitswe kyasyabya kyolo.

⁴³Kandi ngoko walangira ekyuma ĩkĩtũlũngene nʼeribumba lyʼolondo, basyatũlũngana ĩbakaherũkanaya nʼabandu; nĩkwa sibendisyamatana haguma, ngoko ekyuma sikirimatana nʼeribumba.

⁴⁴Nʼoko biro byʼabami abo, Nyamuhanga wʼelubula asyahanganĩa obwami obũtendĩsyaherĩbwa na kera, kutse eritabala lyabo siryendĩsyasĩgĩrwa abandi bandu; nĩkwa bwasyatulanga mo bihande bihande nʼeribuga amami gosĩ aya, nabo bwasyahangana kera na kera.

⁴⁵Ngoko walangira erĩbwe eryo eryabatsawa omo kitwa butsira ebyala, kandi ngoko lyatulanga ekyuma, nʼomulinga, nʼeribumba, nʼekĩtsĩpa nʼesyamagetsi; Nyamuhanga mukulu abĩrĩmĩnyĩsya omwami ebikandisyabya enyũma; nʼerilota ni ryʼekwenene, nʼeribikula lyalyo sĩrĩhabĩre ni ryʼeriyiketera.

⁴⁶Neryo omwami Nebũkadeneza mwatũlama, mwaramya Danĩelĩ, kandi mwahamula ati bamuherere amahere nʼobukwa obukakumba ndeke.

⁴⁷Neryo omwami mwasũbĩrya Danĩelĩ ati, nene Nyamuhanga wenyũ ni Nyamuhanga wʼesyonyamuhanga, nʼOmwami wʼabami, nʼomũbĩsũlĩ wʼebĩbĩsĩre, kusangwa wabiritoka erĩbĩsũla ekĩbĩsĩre ekĩ.

⁴⁸Neryo omwami mwahamya Danĩelĩ, mwamuha oluhembo lunene lungi, mwamũhĩra eritabala oko kihugo kyosĩ kyʼeBabelĩ, mwamũhĩra mo mũtabalĩ mukulu oko bandu bʼamenge bosĩ bʼeBabelĩ.

⁴⁹Neryo Danĩelĩ mwabũlya omwami naye mwahĩra Sadĩrakĩ na Mesakĩ, na Abedenego, babye bakulu bʼemyatsi yosĩ yʼekihugo kyʼeBabelĩ; nĩkwa Danĩelĩ mwabya omo lũkyo lwʼOmwami.