Read nande Danĩelĩ 3 Bible Online

Danĩelĩ 3 - nande bible

Danĩelĩ 3

¹Omwami Nebũkadeneza mwakokotya esanamu yʼesyamagetsi, obuli bwayo bwʼendata bwabya emetere 27, nʼobugali bwayo emetere 2; neryo mwasingikayo omo bwerere bwʼeDũra, omo kihugo kyʼeBabelĩ.

²Neryo Nebũkadeneza mwatuma erĩhĩndanĩa haguma abakama, nʼabasokĩ, nʼabatabalĩ, nʼabatswerĩ, nʼababĩkĩ nʼabategekĩ, nʼesyombũyĩ, nʼabatabalĩ bosĩ abʼekihugo, base okwʼihamula lyʼesanamu eyo mwami Nebũkadeneza asingika.

³Neryo abakama nʼabasokĩ, nʼabatabalĩ, nʼabatswerĩ, nʼababĩkĩ, nʼabategekĩ, nʼesyombũyĩ, nʼabahangamĩ bosĩ bʼekihugo mobahĩndana haguma erihamula esanamu eyo mwami Nebũkadeneza asingika.

⁴Neryo omũhamĩrya mwabirikira kutsibu ati, ĩnywe bandu, nʼebihanda, nʼemĩbũge, mukahamulawa,

⁵omugulu mũkowa emirenge yʼengubi, nʼenyamulera, nʼenanga, nʼenzenze, nʼomũgobĩro, nʼamalenga, nʼemihanda yosĩ yʼeriimba, muwe ahisi nʼerĩramya esanamu eyo yʼesyamagetsi eyo mwami Nebũkadeneza asingika.

⁶Nʼoyutendiwa ahisi nʼerĩramya, asyaguswa oko ndambĩ eyo omwʼirunga lyʼomuliro erikagulumira.

⁷Neryo oko mugulu oyo, omugulu abandu bakowa emirenge yʼengubi, nʼenyamulera, nʼenanga, nʼenzenze, nʼomũgobĩro, nʼamalenga, nʼemihanda yosĩ yʼeriimba, abandu bosĩ nʼebihanda, nʼemĩbũge, mobawa ahisi, mobaramya esanamu yʼesyamagetsi eyo mwami Nebũkadeneza asingika.

⁸Neryo oko mugulu oyo Abakaldea mobasa hakũhĩ mobahandikirira Abayũda.

⁹Mobasũbĩrya mobabwira omwami Nebũkadeneza bati, Uwe mwami, ukote!

¹⁰Uwe mwami, mowahĩra ehamũlĩ, uti obuli mundu oyo wasyowa emirenge yʼengubi, nʼenyamulera, nʼenanga, nʼenzenze, nʼomũgobĩro, nʼamalenga, nʼemihanda yosĩ yʼeriimba, asyawa ahisi nʼerĩramya esanamu yʼesyamagetsi.

¹¹Nʼoyutendiwa ahisi nʼerĩramya, asyaguswa omwʼirunga erikaka mʼomuliro.

¹²Hali abandi Bayũda abo wahĩra mo bakulu oko myatsi yʼekihugo kyʼeBabelĩ; ni Sadĩrakĩ, na Mesakĩ, na Abedenego. Uwe mwami, abalume aba sibetakukenga; sibekolera esyonyamuhanga syawe, kandi sĩberamaya esanamu yʼesyamagetsi eyo wasingika.

¹³Neryo Nebũkadeneza omwʼihitana liwe nʼerikarama liwe mwahamula ati balete Sadĩrakĩ, na Mesakĩ, na Abedenego. Neryo mobaleta abalume abo embere syʼOmwami.

¹⁴Neryo Nebũkadeneza mwasũbĩrya mwabwirabo ati, Ĩnywe Sadĩrakĩ, na Mesakĩ, na Abedenego, ni kwenene simulikolera esyonyamuhanga syage, kutse erĩramya esanamu yʼesyamagetsi eyo nasingika kwehĩ?

¹⁵Neryo lino mwamabya mũnasĩkĩre omugulu mũkowa emirenge yʼengubi, nʼenyamulera, nʼenanga, nʼenzenze, nʼomũgobĩro, nʼamalenga, nʼemĩsĩndo yosĩ yʼeriimba, eriwa ahisi nʼerĩramya esanamu eyo nakokotaya, lyowene; nĩkwa mwamatindaramyayo, oko katambĩ ako mwasyaguswa omwʼirunga erikaka mʼomuliro; ni nyamuhanga wahi oyo wasyabalamya omo byala byage kwehĩ?

¹⁶Sadĩrakĩ na Mesakĩ, na Abedenego mobasũbĩrya mobabwira omwami bati, Uwe Nebũkadeneza, sihali ekyangatuma ĩtwakũsũbĩrya oko mwatsi oyũ.

¹⁷Kyamabya kitya, Nyamuhanga wetu oyo tukakolera akatoka erĩtũlamya omwʼirunga erikaka mʼomuliro; naye akandĩtũlamya omo byala byawe, uwe mwami.

¹⁸Nĩkwa bite bitya, uwe mwami, Uminye ko tutendĩrĩga erikolera esyonyamuhanga syawe, kutse erĩramya esanamu yʼomulinga wasingika.

¹⁹Neryo Nebũkadeneza mwosũla nʼerikarama, nʼerisosa lyʼobũsũ buwe molyahinduka uku Sadĩrakĩ na Mesakĩ na Abedenego, neryo mwasũbĩrya, mwahamula ati bakaye erirunga ngendo sirinda kwilaba ko lĩkakĩbawa.

²⁰Neryo mwahamula esindi mbangĩ syʼomulondo wuwe ati babohe Sadĩrakĩ, na Mesakĩ, na Abedenego bagusebo omwʼirunga erikaka mʼomuliro.

²¹Neryo abandu aba mobabohwa ibane nʼesyosũrũalĩ syabo, nʼesyokanzu syabo nʼebisomeko byabo, nʼesindi ngimba syabo, mobaguswa omwʼirunga erikagulumira.

²²Neryo kusangwa erihamula lyʼOmwami lyabya lĩkalĩre nʼerirunga iryamabigulumira kutsibu, obukangira bʼomuliro mobwĩta abandu abo, abahamba Sadĩrakĩ na Mesakĩ, na Abedenego.

²³Nʼabalume basatu aba, Sadĩrakĩ, na Mesakĩ, na Abedenego, mobawa ĩbanabohĩre; omwʼirunga erikagulumira, omo muliro.

²⁴Neryo, omwami Nebũkadeneza mwasweka, mwahangana lũba, mwabũga nʼabahanĩ buwe ati, Motutetagusa abandu basatu omo muliro ĩbanabohĩre kwehĩ? Mobasũbĩrya bati, Kwenene, uwe mwami.

²⁵Naye mwasũbĩrya ati, Lebaya, namalangira abandu bani ibanabohwerwe, bakalendera omo katĩkatĩ kʼomuliro, kandi butsira bwagalĩ; nʼerisosa lyʼowʼakani liri ngʼomugala wʼesyonyamuhanga.

²⁶Neryo Nebũkadeneza mwahĩka hakũhĩ nʼolũkyo lwʼerirunga erikagulumira mʼomuliro; neryo mwabũga ati, Sadĩrakĩ na Mesakĩ, na Abedenego, ĩnywe bagombe ba Nyamuhanga Wʼendata Kutsibu, mũlũemo, mwase hano. Neryo Sadĩrakĩ na Mesakĩ, na Abedenego mobalũa omo muliro.

²⁷Neryo abakama, nʼabasokĩ nʼabatabalĩ, nʼabahanĩ bʼomwami, ababya bahĩndene haguma, mobalangira abandu aba, ngoko muliro atabya awite amaka busana nʼemibiri yabo, kutse esyonzwiri syʼemitwe yabo mositabebuka kutse esyongimba syabo mositahinduka, kutse omubebu gʼomuliro mwatahambabo.

²⁸Neryo Nebũkadeneza mwabũga ati, Apipawe Nyamuhanga wa Sadĩrakĩ, na Mesakĩ, na Abedenego, oyo watuma omũlaĩka wuwe, nʼerĩlamya abagombe buwe abayiketera ye, ababindula ekĩnywa kyʼOmwami, nʼeriha emibiri yabo sibakolere kutse erĩramya ogundi nyamuhanga, nina Nyamuhanga wabo.

²⁹Busana nʼekyo, ngahĩra ehamũlĩ nyiti abandu bosĩ nʼebihanda byosĩ, nʼobuli mũbũge abakabũga ebitatolere busana na Nyamuhanga wa Sadĩrakĩ, na Mesakĩ, na Abedenego, basyatsũtsangwa mo bitswe-bitswe, nʼamanyũmba wabo asyayirwa mo byabũ; kusangwa sihali gundi nyamuhanga wangatoka erĩlamya ngʼomuhanda oyũ.

³⁰Neryo mwami mwahamya Sadĩrakĩ na Mesakĩ, na Abedenego omo kihugo kyʼeBabelĩ.