Read nande Danĩelĩ 5 Bible Online

Danĩelĩ 5 - nande bible

Danĩelĩ 5

¹Omwami Belsasarĩ mwayira erirya ĩnene busana nʼabakama buwe elfu nguma (1,000), kandi mwapũlya ebĩnyũ embere syʼeelfu eyo.

²Belsasarĩ, omugulu ageraya ebĩnyũ mwahamula ati esyondehĩ syʼesyamagetsi nʼesyʼekĩtsĩpa siretawe, esyo tata wuwe Nebũkadeneza alũsaya omo Hekalũ eyabya eYerũsalema; omwami nʼabakama buwe nʼabakalĩ buwe nʼabahwekĩ buwe batoke erĩpũlĩrya musyo.

³Neryo mobaleta esyondehĩ esyo syʼesyamagetsi, esyalũsĩbawa omo Hekalũ enyũmba ya Nyamuhanga, eyabya eYerũsalema; neryo omwami nʼabakama buwe, nʼabakalĩ buwe, nʼabahwekĩ buwe, mobapũlĩrya musyo.

⁴Mobapũlya ebĩnyũ, mobapipa esyonyamuhanga syʼesyamagetsi, nʼesyʼekĩtsĩpa, nʼesyʼemiringa, nʼesyʼekyuma, nʼesyʼemiti, nʼesyʼamabwe.

⁵Oko katambĩ ako eminwe yʼebyala byʼomundu moyahuluka, nʼeminwe eyo moyasaka oko mbemba eyʼolũhĩmbo lwʼekikali kyʼOmwami eyisirya aho ahali omutagala wʼetala; nʼomwami mwalangira ekitswe kyʼekiganza ekyasaka.

⁶Neryo obũsũ bwʼomwami mobwahinduka, nʼamalengekanĩa wuwe mwamwĩta bũlĩge; nʼesyongũnyĩro syʼembindi yiwe mosyalegetsana, nʼamarwĩ mwahĩndangana.

⁷Neryo omwami mwabirikira kutsibu ati balete abakũmũ, nʼAbakaldea, nʼabalagũlĩ. Neryo omwami mwabwira abandu bʼamenge bʼeBabelĩ ati, Oyo wasyasoma erisaka erĩ nʼerĩnyĩmĩnyĩsya eribikula lyalyo, asyambalĩbwa olukimba lʼomula, kandi asyahĩrwa kʼobuhulula bwʼesyamagetsi omo bĩkya biwe, kandi asyabya ĩsemumbo wʼomo bwami.

⁸Neryo abandu bosĩ bʼamenge bʼomwami mobahĩkaho; nĩkwa mobatatoka erisoma amasako, kutse erĩmĩnyĩsya omwami eribikula lyago.

⁹Neryo omwami Belsasarĩ mwaganga-ganga kũndũ, nʼobũsũ buwe mobwahinduka, nʼabakama buwe mobaburanganwa.

¹⁰Neryo omwami-kalĩ mwahĩka omo nyũmba yʼeririramo busana nʼebĩnywa byʼOmwami nʼabakama buwe; neryo omwami-kalĩ mwabũga ati, Uwe mwami, ukote; Suleke amalengekanĩa wawe akakwĩta obũlĩge, kutse Suleke obũsũ bwawe bukahinduka.

¹¹Hane mundu omo bwami bwawe, oyuwite ekĩrĩmũ kyʼesyonyamuhanga sĩbũyĩrĩre; nʼomo biro bya tata wawe, ekyakakala nʼobowĩka nʼamenge ngʼamenge wʼesyonyamuhanga, mobyabanika omwisi wuwe. Nʼomwami Nebũkadeneza, ye tata wawe, mwamuyira mo mukulu wʼabasaki, nʼabakũmũ, nʼAbakaldea, nʼabalagũlĩ,

¹²Kusangwa ekĩrĩmũ kibuya nʼeriminya, nʼobowĩka nʼeribikula, nʼerĩbĩsũla emĩsyo, nʼerĩrekya ebiremene, mobyabanika umu Danĩelĩ oyo, oyo mwami ahula mo Beltesaza. Neryo lino Danĩelĩ abirikirawe, naye akandĩkangya eribikula.

¹³Neryo Danĩelĩ mwaletwa embere syʼOmwami. Nʼomwami mwabũlya Danĩelĩ ati, Uwe uli Danĩelĩ oyo, oyuli wʼoko bana ba Yũda abahũngawa, abo tata wage omwami alũsaya eYũda kwehĩ?

¹⁴Nabĩrĩowa engulu yawe ngoko ekĩrĩmũ kyʼesyonyamuhanga kiri umʼuwe, kandi ngoko ekyakakala nʼobowĩka, nʼamenge mabuya, akabanika kuwe.

¹⁵Na lino abandu abʼamenge, nʼabakũmũ, babiriretwa embere syage basome amasako aya nʼerĩnyĩmĩnyĩsya eribikula lyago; nĩkwa mobatatoka erĩmĩnyĩsya eribikula lyʼomwatsi oyo:

¹⁶Nĩkwa nabĩrĩowa engulu yawe, ngoko ukatoka erĩkangya eribikula, nʼerĩrekya ebyalemene; neryo lino wamatoka erisoma amasako aya, nʼerĩnyĩmĩnyĩsya eribikula lyago, wasyambalĩbwa olukimba lʼomula, nʼeribya nʼobuhulula bwʼesyamagetsi omo bĩkya byawe, kandi wasyabya mũtabalĩ wʼakasatu omo bwami.

¹⁷Neryo Danĩelĩ mwasũbĩrya mwabũga embere syʼOmwami ati, Ubye nʼolũsũnzo lwawe, uhe esyonzũnzo syawe syʼogundi; nĩkwa ngandisomera omwami amasako, nʼerĩmũmĩnyĩsya eribikula lyago.

¹⁸Uwe mwami, Nyamuhanga Wʼendata Kutsibu mwaha tata wawe Nebũkadeneza obwami, nʼobukulu, nʼolukengerwa, nʼerĩkangabasanĩa.

¹⁹Neryo busana nʼobukulu obo amuha, abandu bosĩ nʼebihanda, nʼemĩbũge bakatitimana nʼeriubaha embere siwe. Oyo abya anzĩre erĩĩta, ĩnĩamwĩta, nʼoyo anzĩre eribyaho iniabyaho; nʼoyo anzĩre erĩhamya ĩnĩamũhamya, nʼoyo anzĩre erĩkehya ĩnĩamũkehya.

²⁰Nĩkwa omugulu omutima wuwe ayihagata, nʼekĩrĩmũ kiwe kyayiheka, kyaleka ĩnĩayĩhahamĩsya, omwami mwasingulwa omo kĩtũmbĩ kiwe kyʼobwami, nʼolukengerwa luwe molwalũsĩbwa ukwʼiye.

²¹Neryo mwahigirwa hali oko bandu, nʼomutima wuwe mwayirwa, ngʼowʼesyonyama, nʼerĩĩkala liwe molyabya haguma nʼesyopunda syʼomolĩ. Neryo mwalĩsĩrĩrĩbwa oko biti ngʼesyonde, nʼomubiri wuwe mwatsapa omo kimi kyʼekyanya erĩhĩka aho aminyira ko Nyamuhanga Wʼendata Kutsibu yukatabala oko bwami bwʼabandu, kandi ngoko akahanganaya kubo oyo anzĩre.

²²Nawe, uwe mugala wuwe, Belsasarĩ, sũlĩtakehya omutima wawe, ĩnũnasĩ ebĩ byosĩ,

²³nĩkwa ukayihagata erilwa nʼomukama wʼelubula; kandi wabirireta esyondehĩ syʼenyũmba yiwe embere syawe, nawe nʼabakama bawe, nʼabakalĩ bawe, nʼabahwekĩ bawe, mwabĩrĩpũlĩrya musyo mwʼebĩnyũ kandi wabiripipa esyonyamuhanga syʼekĩtsĩpa nʼesyamagetsi, nʼesyʼomulinga, nʼesyʼekyuma, nʼesyʼemiti nʼesyʼamabwe, esitelangira, kutse erĩowa, kutse eriminya; na Nyamuhanga oyuli nʼomuka wawe wʼengebe omo byala biwe, nʼoyuli nʼesyonzira syawe syosĩ omo byala biwe, sulitamupipa.

²⁴Neryo ekitswe kyʼebyala, Nyamuhanga yo watumakyo, nʼamasako aya mwasakwa atya:

²⁵Nʼamasako waya awasakawa, Mene, Mene, Tekelĩ, Ufarsĩnĩ.

²⁶Eribikula lyʼomwatsi oyo lyerĩ: Mene—Nyamuhanga abiriganza obwami bwawe nʼeribugabo.

²⁷Tekelĩ—wabirirengwa oko lulengo, mukabanika ngoko wamakeha.

²⁸Peresĩ—obwami bwawe bwamagabwa, bwabirihabwa oko Bamedĩ nʼAbapersĩ.

²⁹Neryo Belsasarĩ mwahamula, mobambalya Danĩelĩ olukimba lʼomula, mobahĩra obuhulula bwʼesyamagetsi omo bĩkya biwe, mobatũlago busana naye kwʼali mũtabalĩ wʼakasatu omo bwami.

³⁰Oko kiro ekyo, Belsasarĩ omwami wʼAbakaldea mwĩtwa.

³¹Na Darĩo Omũmedĩ mwĩmya obwami, iniawite myaka nga makũmĩ ndatu nʼeyĩbĩrĩ.