Read nande Danĩelĩ 6 Bible Online

Danĩelĩ 6 - nande bible

Danĩelĩ 6

¹Mokyatsemesya Darĩo erĩhĩra abatabalĩ 120 babye omo bwami bosĩ;

²mwahĩra kubo kwʼabakulu basatu, na Danĩelĩ abya muguma wa kubo; abatabalĩ aba batoke erireta emiganzo kubo, neryo, omwami ĩsĩangatalya.

³Neryo Danĩelĩ oyũ mwasĩkĩbwa kwilaba abakulu abo nʼabatabalĩ, busana nʼekĩrĩmũ kibuya ekyabya omwisi wuwe; nʼomwami mwaganĩrya erĩmũhĩra oko kihugo kyosĩ.

⁴Neryo abakulu nʼabatabalĩ mobasondya omwatsi ogo bangatsongera ko Danĩelĩ busana nʼobwami; nĩkwa mobatabana mwatsi kutse erĩlolo, kusangwa abya oyuteregula, kandi mwatabanika kwʼekibi, kutse oluhabo.

⁵Neryo abandu abo mobabũga bati, Sitwendisyabana mwatsi wʼeritsongera Danĩelĩ oyũ, lite eribanago omo bihano bya Nyamuhanga wuwe.

⁶Neryo abakulu abo nʼabatabalĩ mobahĩndana haguma embere syʼOmwami mobamubwira bati, Omwami Darĩo, ukote!

⁷Abakulu bosĩ bʼobwami, nʼabakama, nʼabatabalĩ, nʼabahanĩ, nʼabalemĩ, babĩrĩkanĩa haguma erĩhanganĩa erihana lyʼobwami, nerĩhĩru erĩganĩsya lĩkalĩre, liti, oyo wasyasaba kindi oko gundi nyamuhanga, kutse oko mundu wahi oko biro makũmĩ asatu, ate ukʼuwe mwami, asyaguswa omo kyũna kyʼesyondale.

⁸Na lino, uwe Mwami, uyire erĩganĩsya erĩkalĩre, Usake amasako aya, nʼerĩhĩra erĩna lyawe lyo kugo siabindulawe, ngʼebihano byʼAbamedĩ nʼAbapersĩa, ebitebinduka.

⁹Neryo omwami Darĩo mwasaka erĩna liwe oko masako aya nʼokwʼĩganĩsya eryo.

¹⁰Neryo omugulu Danĩelĩ aminya kwʼamasako ayo abirihandikwa kwʼerĩna lyʼOmwami, mwingira omo nyũmba yiwe (amadĩrĩsa wuwe inianakĩngwĩre omo kyumba kiwe kyʼendata ekikalola ebwanga bwʼeYerũsalema); neryo mwaswakũkamira oko marwĩ wuwe ngendo ĩsatu obuli kiro, mwasaba nʼeriha ewasĩngya embere sya Nyamuhanga wuwe, ngoko anabya akakola.

¹¹Neryo abalume aba mobahĩndana haguma, mobeya Danĩelĩ akasaba nʼerilakira embere sya Nyamuhanga wuwe.

¹²Neryo mobasegera hakũhĩ, nʼerĩbũga embere syʼOmwami busana nʼerĩganĩsya lyʼOmwami bati, Mũtalahĩrya erĩganĩsya liti obuli mundu oyo wasyasaba oko gundi nyamuhanga wahi nʼomundu wahi oko biro makũmĩ asatu, ate uwe mwami, asyaguswa omo kyũna kyʼesyondale kwehĩ? Neryo omwami mwasũbĩrya ati, Omwatsi oyo ni kwenene ngʼebihano byʼAbamedĩ nʼAbapersĩa, ebitebinduka.

¹³Neryo mobasũbĩrya nʼerĩbũga embere syʼOmwami bati, Danĩelĩ oyo, omuguma wʼoko bandu abanyegawa bʼeYũda, sialikukenga uwe mwami, kandi sialikenga erĩganĩsya eryo wasakako, nĩkwa akasaba ngendo ĩsatu obuli kiro.

¹⁴Neryo omwami, omugulu owa ebĩnywa ebĩ, mwatatsema nʼahake, neryo mwahĩra omutima wuwe uku Danĩelĩ erĩmũlamya; mwalenga erĩmũlamya erĩhĩka okwʼirenga lyʼeryuba.

¹⁵Neryo abandu aba mobahĩndana haguma embere syʼOmwami, mobabwira omwami bati, Uwe mwami, Uminye ngoko emigambo yʼAbamedĩ nʼAbapersĩa yiti, sihali eribindula kutse erĩganĩsya omugambo ogo mwami abirihamula.

¹⁶Neryo omwami mwahamula, neryo mobaleta Danĩelĩ, mobamugusa omo kyũna kyʼesyondale. Nʼomwami mwabwira Danĩelĩ ati, Nyamuhanga wawe oyo ukakolera obutusa, asyakũlamya.

¹⁷Nʼerĩbwe molyaletwa molyahĩrwa oko bwingiro bwʼekyũna, nʼomwami mwahĩra eyĩsembo yʼembũka yiwe, nʼomo mbũka yʼabakama buwe Sihabye eribinduka busana na Danĩelĩ.

¹⁸Neryo omwami mwaya omo nyũmba yiwe mwatsira akalyo erĩhĩka okwʼikya; kutse amalimba mwataletwa embere siwe; nʼotũgotserĩ tuwe motwamugana.

¹⁹Neryo omo ngyakya-ngyakya, omwami mwahangana mwanguha eriya oko kyũna kyʼesyondale.

²⁰Nʼomugulu ahĩka hakũhĩ nʼekyũna ahali Danĩelĩ, mwabirikira nʼomulenge wʼobũlĩge; akabwira Danĩelĩ ati, Uwe Danĩelĩ, omugombe wa Nyamuhanga oyuliho, Nyamuhanga wawe, oyo ukakolera obutusa atokĩre erĩkũlamya oko ndale kwehĩ?

²¹Neryo Danĩelĩ mwabwira omwami ati, Uwe mwami, ukote!

²²Nyamuhanga wage abirituma omũlaĩka wuwe abĩrĩkũmba amuno wʼesyondale, nasyo mosĩtetanyagalya; kusangwa embere siwe mondabanika ko musango; nʼakandi embere syawe uwe mwami mondahalya.

²³Neryo omwami mwatsema kutsibu, mwahamula ati balũsaye Danĩelĩ omo kyũna ekyo. Neryo Danĩelĩ mwalũsĩbwa omo kyũna ekyo, mwatabanika ko kandu kabi, kusangwa abya akayiketera Nyamuhanga wuwe.

²⁴Neryo omwami mwahamula, mobaleta abandu abo, abatsongera Danĩelĩ, mobagusabo omo kyũna kyʼesyondale, ibo, nʼabana babo, nʼabakalĩ babo; nʼesyondale mosyakĩndabo, mosyabũnanga amakũha wabo mo bitswe-bitswe, isibebahĩka oko kabuno kʼekyũna.

²⁵Neryo omwami Darĩo mwasakira abandu bosĩ nʼebihanda, nʼemĩbũge abĩkere omo kihugo kyosĩ ati, Obuholo bũkanyĩbawe ũkwʼĩnywe!

²⁶Ĩngye ngahĩra omugambo nyiti, Omwʼitabala lyosĩ lyʼobwami bwage abandu batitimane nʼeriubaha embere sya Nyamuhanga wa Danĩelĩ; kusangwa iye ni Nyamuhanga oyuliho, oyũkotĩre kera na kera, nʼobwami buwe ni bwami obũtendĩsyaherĩbwa; nʼeritabala liwe lyasyakota erĩhĩka oko ndũlĩ.

²⁷Akalamaya nʼerisabula, kandi akakola ebĩmĩnyĩsyo nʼebyʼeriswekera omo lubula nʼomo kihugo, oyũ yũlĩalamaya Danĩelĩ oko maka wʼesyondale.

²⁸Neryo Danĩelĩ oyũ mwabana omũyĩsa omo katĩkatĩ kʼeritabala lya Darĩo, nʼomo butabale bwa Kĩro Omũperesĩ.