Read nande Danĩelĩ 7 Bible Online

Danĩelĩ 7 - nande bible

Danĩelĩ 7

¹Oko mwaka wʼerĩmbere wa Belsasarĩ, omwami wʼeBabelĩ, Danĩelĩ, mwalota akalola oko syonzolĩ syʼomutwe wuwe oko ngyingo yiwe; neryo mwasaka erilota eryo mwatũla omwatsi walyo.

²Danĩelĩ mwabũga ati, Monalangira omwʼilota lyage omo kiro, neryo, lebaya, amahunga ani wʼelubula mwabuhirira oko ngetsi nene.

³Neryo esyonyama nene-nene ĩnĩ mosyalũa omo ngetsi, syabya muhanda muhanda.

⁴Eyʼerĩmbere yabya ngʼendale eyiwite ebĩpũpa byʼerĩsamba; neryo monalebya ebĩpũpa byayo mobyatũbwa, nayo moyasumbirwa oko kihugo moyahanganĩrĩbwa oko mihimbi ĩbĩrĩ ngʼomundu; moyahabwa omutima wʼomundu.

⁵Neryo, lebaya, eyindi nyama eyʼakabiri, eyĩsosĩre edubu. Nayo moyasumbwa luhande luguma, nʼesyonganga ĩsatu syabya omo buno bwayo omo meno wayo; neryo mobabwirayo bati, Hangana, ulye esĩswĩ nyingi.

⁶Nʼenyũma wʼaho monalangira, neryo, lebaya, eyindi nyama ngʼekisoro, nayo yabya nʼebĩpũpa bini byʼenyonyũ oko mugongo wayo; nʼenyama eyo yabya nʼemitwe ĩnĩ; nayo moyahabwa obutabale.

⁷Enyũma wʼaho monalangira omwʼilota lyʼekiro, neryo, lebaya, enyama yʼakani, eyʼerĩũbahya, eyĩkalĩre, nʼeyʼamaka kutsibu; nayo yabya iwite ameno awʼebyuma, amanene manene. Moyalya, moyatsũtsanga mo bitswe-bitswe, moyalyatangirira amasĩgalira omo bisando byayo; nayo moyabya ogundi mũsĩndo oko Sindi nyama syosĩ esyabya embere wayo; kandi yabya iwite amahembe ĩkũmĩ.

⁸Nage monasamalira amahembe ayo, neryo, lebaya, erindi rĩhembe molyalasa omo katĩkatĩ kago, erĩke, embere walyo awandi mahembe asatu wʼerĩmbere mwakulwa nʼemĩrĩhĩ; neryo lebaya omwʼĩhembe erĩ habya ameso ngʼameso wʼomundu, nʼobuno obũkabũga emyatsi yʼeriyihalamba.

⁹Neryo monasiba ngalangira erĩhĩka aho ebĩtũmbĩ byʼobwami byahĩrĩrawaho, nʼomuguma oyo wabya Mukulu Wʼebiro mwĩkala oko kĩtũmbĩ kiwe. Esyongimba siwe syabya nyeru-nyeru ngʼenzururu, nʼesyonzwiri syʼomutwe wuwe syabya ngʼobweya bwʼembũlĩ obũhenĩrye kutsibu; nʼekĩtũmbĩ kiwe kyʼobwami kyabya ngʼebirimi byʼomuliro, nʼebĩrĩngo byako byabya ngʼomuliro owakaka.

¹⁰Nʼolũsĩ lwʼomuliro molwasenda nʼerilaba embere siwe. Amaelfu nʼamaelfu mobamukolera, neʼelfu ĩkũmĩ ngendo elfu ĩkũmĩ mobahangana embere siwe. Eritswerwa molyahĩrwaho, nʼebitabu mobyasanzulwa.

¹¹Nʼoko mugulu oyo monasiba ngalangira busana nʼomulenge wʼebĩnywa byʼeriyiheka ebyo erĩhembe lyabũga; monasiba ngalangira erĩhĩka aho enyama eyo yĩtĩrawa, nʼomubiri wayo mwaherĩbwa, nʼerihabwa erĩhĩsĩrĩrĩbwa oko muliro.

¹²Neryo esindi nyama esyo mosyasagulwa eritabala lyasyo; nĩkwa eribyaho lyasyo molyatomekerwako busana nʼendambĩ eyahulawa.

¹³Kandi monasiba ngalangira omwʼilota lyʼekiro, neryo, lebaya, oyũsosĩre omugala wʼomundu mwasa omo bĩtũ byʼelubula, mwahĩka oko Mukulu Wʼebiro, mobamuleta hakũhĩ embere siwe.

¹⁴Naye mwahabwa eritabala, nʼolukengerwa, nʼobwami, abandu bosĩ nʼebihanda, nʼemĩbũge bamukolere; eritabala liwe ni ʼtabala lya kera na kera, eritendisyahwaho, nʼobwami buwe ni bwami obũtendĩsyaherĩbwa.

¹⁵Nĩkwa ĩngye Danĩelĩ, ekĩrĩmũ kyage mokyakwa obũlĩge omwisi syʼomubiri wage, nʼerilota lyʼomutwe wage molyanyĩta obũlĩge.

¹⁶Neryo monahĩka hakũhĩ nʼomuguma ukwʼabo babya bimeneho, monamũbũlya ekwenene yʼebyosĩ ebĩ. Naye mwambwira mwanyĩmĩnyĩsya eribikula lyʼemyatsi eyo.

¹⁷Esyonyama nene-nene esĩ eSĩnĩ, ni bami bani abakandisyahangana erĩlũa omo kihugo.

¹⁸Nĩkwa ababũyĩrĩre bʼOwendata Kutsibu basyangirira obwami, nʼerĩsĩgalya obwami kera na kera, erĩhĩka kera na kera.

¹⁹Neryo monasonda eriminya ekwenene yʼomwatsi wʼenyama yʼakani, eyabya ogundi muhanda oko Sindi, eyʼerĩũbahya kutsibu, ameno wayo abya wʼebyuma, nʼesyonyala syayo syʼomulinga; eyo yalya, nʼerĩtsũtsanga mo bitswebitswe, eyalyatangirira amasĩgalira omo bisando byayo;

²⁰na busana nʼamahembe ĩkũmĩ awabya oko mutwe wayo, nʼerindi rĩhembe eryalasa, nʼembere kulyo amahembe asatu mwatoga, erĩhembe eryabya liwite ameso, nʼobuno obwabũga emyatsi yʼeriyiheka, nʼerilolwako lyayo lyabya lĩkalĩre. Kandi erĩhembe eryo lyabya nga nĩ rĩnene kwilaba awandi mahembe ayo.

²¹Kandi monasiba ngalebya, neryo erĩhembe eryo molyalwa amalwa nʼabandu ba Nyamuhanga, nʼerĩkĩndabo,

²²erĩhĩka aho Mukulu Wʼebiro ahĩkĩra. Nʼeritswera molyahabwa oko bandu ba Nyamuhanga Owendata Kutsibu, nʼendambĩ moyahĩka busana nʼabandu ba Nyamuhanga erĩsĩgalya obwami.

²³Neryo mwabũga ati, Enyama yʼakani yasyabya bwami bwʼakani oko kihugo, obwasyabya muhanda oko mami gosĩ, nabo bwasyalya ekihugo kyosĩ, nʼeriryatangirirakyo ahisi, nʼerĩhĩnolakyo.

²⁴Neryo busana nʼamahembe ĩkũmĩ ayo, abami ĩkũmĩ basyahangana bakalũa omo bwami obũ; nʼogundi mwami asyahangana enyũma kubo. Naye asyabya ogundi muhanda kwʼabo bʼembere, naye asyatoya abami basatu.

²⁵Naye asyabũga ebĩnywa byʼamalwa busana nʼOwendata Kutsibu, kandi asyalũhya abandu ba Nyamuhanga oyũ Owendata Kutsibu; kandi asyaganĩrya eribindula emigulu nʼemigambo, nʼabandu ba Nyamuhanga basyahĩrwa omo byala biwe oko mugulu nʼemigulu nʼoluhande lwʼomugulu.

²⁶Nĩkwa eritswera lyasyahĩrwa, neryo eritabala liwe lyasyalũsĩbwaho, eribugalyo nʼerĩheryalyo erĩhĩka oko ndũlĩ.

²⁷Nʼobwami nʼobutabale nʼobukulu bwʼamami eyĩkwa wʼamatũkũ gosĩ, byasyahabwa oko bandu ba Nyamuhanga Owendata Kutsibu. Obwami buwe ni bwami bwa kera na kera, nʼamatabale gosĩ asyamukolera nʼerimukenga.

²⁸Eyĩ yo ndũlĩ yʼomwatsi. Nĩkwa ĩngye Danĩelĩ amalengekanĩa wage mwanyĩta obũlĩge bo kutsibu, nʼobũsũ bwage mobwahinduka; nĩkwa monabika omwatsi oyo omo mutima wage.