Read nande Danĩelĩ 9 Bible Online

Danĩelĩ 9 - nande bible

Danĩelĩ 9

¹Oko mwaka wʼerĩmbere wa Darĩo mugala wa Ahasuero wʼekihanda kyʼAbamedĩ, oyo wahĩrawa mo mwami oko bwami bwʼAbakaldea,

²omo mwaka wʼerĩmbere wʼobutabale buwe, ĩngye Danĩelĩ, monalebya omo Masako emiganzo yʼemyaka eyo Mwami Mukulu abwira omũmĩnyererĩ Yeremĩa busana nʼeribuga erihera lyʼeYerũsalema ni myaka amakũmĩ alinda.

³Neryo monalolya obũsũ bwage oko Mwami Mukulu Nyamuhanga, erĩmũsondya busana nʼerisaba nʼerilaka, haguma nʼeritsira akalyo nʼeriambala emitole nʼerĩbũ.

⁴Neryo monasaba Omwami Mukulu Nyamuhanga wage, monakanganĩa, nyiti, Ĩyoo, Uwe Mukama, Nyamuhanga Mukulu nʼowʼerĩũbahya, oyũkategaya endagano yiwe, nʼobubuya buwe bʼolwanzo ukwʼabo abamwanzĩre nʼabakategaya ebihano biwe,

⁵twabirikola nabi, nʼerikola nʼepono, twabirikola amalolo, twabirihona, erikitira emũsĩke oko bihano byawe nʼamahamulo wawe.

⁶Kutse sitwetahulikirira abagombe bawe abamĩnyererĩ, ababũga omo lĩna lyawe oko bami betu, nʼabanya-mwami betu nʼabotata wetu, nʼabandu bosĩ bʼekihugo.

⁷Uwe Mukama, eritunganene ni ryawe, nĩkwa ũkwʼĩtwe tũhemũkĩre, ngoko biri mũnabwĩre; oko bandu ba Yũda, nʼoko ndũlanĩ syʼeYerũsalema, nʼoko Ĩsraelĩ bosĩ, abali hakũhĩ nʼabali ehali omo bihugo byosĩ eyo wahigirabo, busana nʼerĩhalya lyabo eryo bakũhalĩraya.

⁸Uwe Mwami Mukulu, erihemuka ni ryetu, nʼoko bami betu, nʼoko banya-mwami betu, nʼoko botata wetu, kusangwa twabirikukolera nabi.

⁹Eriganyira nʼeribuyira ni byʼOmwami Mukulu Nyamuhanga wetu; kusangwa twabirimuhonako.

¹⁰Kutse sitwetakenga omulenge wʼOmwami Mukulu Nyamuhanga wetu, erirendera omo bihano biwe, ebyo ahĩra embere syetu omo byala byʼabagombe buwe abamĩnyererĩ.

¹¹Ega, Ĩsraelĩ bosĩ babĩrĩhalya oko bihano byawe, nʼerikitira ehandi, sĩbowe omulenge wawe; kyaleka eritakira ĩryahĩrwa ũkwʼĩtwe, nʼerĩlahĩrya eryasakawa omo bihano bya Musa omugombe wa Nyamuhanga; kusangwa twabirimukola nabi.

¹²Naye abĩrĩberererya ebĩnywa biwe ebyo atubambirako, nʼeribambira abatabalĩ betu, abatutabalako, nʼerituletera obũlĩge bunene. Kusangwa eyĩkwa oko matũkũ gosĩ Sihehatakolwa mwatsi ngʼowamakolwa oko Yerũsalema.

¹³Ngoko bĩsakĩre omo Migambo ya Musa, ebibi ebĩ byosĩ byabĩrĩtũhĩkako nĩkwa sitwetasaba olukogo lwʼOmwami Mukulu Nyamuhanga wetu, tuti tuleke ebibi byetu, nʼeriminya ndeke ekwenene yawe.

¹⁴Busana nʼekyo, Omwami Mukulu abiritubikira obũlĩge nʼerituleta boko; kusangwa Omwami Mukulu Nyamuhanga wetu atunganene omo mĩbĩrĩ yiwe yosĩ eyo akakola, nĩkwa ĩtwe sitwetakenga omulenge wuwe.

¹⁵Na lino uwe Mwami Mukulu Nyamuhanga wetu, oyo wabĩrĩlũsya abandu bawe omo kihugo kyʼeMĩsĩrĩ omo byala byʼamaka, kandi wabiriyibanira erĩkũmayira nga mũnabwĩre; twabirikola nabi, twabĩrĩhalya.

¹⁶Uwe Mukama, ngʼemĩbĩrĩ yawe yosĩ itunganene, uleke erihitana lyawe nʼerikarama lyawe bĩlũe oko mũyĩ wawe eYerũsalema, ekitwa kyawe kĩbũyĩrĩre; kusangwa busana nʼebibi byetu, nʼebibi byʼabotata wetu, eYerũsalema nʼabandu bawe babiribya kĩtsũmĩ oko bandu bosĩ abatũtĩmbĩreko.

¹⁷Neryo lino, uwe Nyamuhanga wetu, uhulikirire erisaba lyʼomugombe wawe, nʼemilake yiwe. Busana nʼomwatsi wawe, uwe Mukama, ũkoleraye obũsũ bwawe oko habũyĩrĩre hawe ahabiribya kĩma.

¹⁸Uwe Nyamuhanga wage, utege okũtũ kwawe, wowe; ũlĩbũle ameso wawe, ulangire ebĩma byetũ, nʼomũyĩ owakahulawa omo lĩna lyawe. Kusangwa sĩtwehĩra erisaba lyetu embere syawe busana nʼeritunganene lyetu, nĩkwa busana nʼeriganyira lyawe lĩnene.

¹⁹Uwe Mukama, wowe; uwe Mukama, ubuyire; uwe Mukama, uhulikirire, Ukole! Busana nʼomwatsi wawe wowene siwamale, uwe Nyamuhanga wage, kusangwa omũyĩ wawe, nʼabandu bawe bakahulawa omo lĩna lyawe!

²⁰Neryo omugulu nabya ngabũga, nʼerisaba, nʼerĩkangya ebibi byage nʼebibi byʼabandu bage Ĩsraelĩ, nʼerireta emilake yage embere syʼOmwami Mukulu Nyamuhanga wage busana nʼekitwa kĩbũyĩrĩre kya Nyamuhanga wage.

²¹Ega, omugulu nabya nyikinasaba, omundu oyo ye Gabrĩelĩ, oyo nalangira omwʼilota erĩmbere, mwambĩkako akaguluka lũba, neryo mwanyĩtũlako oko mugulu wʼobuhere bwʼerĩgolo-golo.

²²Gabrĩelĩ mwanyĩkangĩrĩrya nʼerĩkanĩa nage, ati, Uwe Danĩelĩ, lino namakuhulukira erikuha amenge nʼeriminya.

²³Okwʼĩtsũka lyʼemilake yawe erihana erĩ molyahamulwa, nage namasa erikubwira; kusangwa ũkasĩmawa kutsibu; busana nʼekyo uhulikirire omwatsi, Uminye erilota eryo.

²⁴Amayenga makũmĩ alinda abirihamulwa busana nʼabandu bawe, nʼoko mũyĩ wawe abũyĩrĩre eribuga amalolo nʼeribuga ebibi, nʼerireta embanulo busana nʼebibi, nʼerireta eritunganene rya kera na kera, nʼerĩhĩra ekĩbohĩ okwʼilota nʼobũmĩnyererĩ, nʼerĩhakabya amagũta ahabũyĩrĩre kutsibu.

²⁵Neryo Uminye ũyĩtegereraye, erĩtsũka ekihamulo kyʼerĩsũbya nʼerĩswahĩmba eYerũsalema, erĩhĩka oko Mesĩa Munya-mwami, hasyabya amayenga alinda nʼamayenga makũmĩ ndatu nʼabiri. EYerũsalema yasyaswahĩmbwa haguma nʼesyombalu nʼomugende owakatĩmba, omo migulu yʼobũlĩge nibya.

²⁶Neryo enyũma wʼamayenga makũmĩ ndatu nʼawabiri, Mesĩa asyalũsĩbwaho, isiendisyabya nʼekindu; nʼabandu bʼomunya-mwami oyo wasyasa, basyaherya omũyĩ nʼahabũyĩrĩre. Nʼendũlĩ yago yasyabya erigunga lyʼamagetsi, nʼerĩhĩka oko ndũlĩ hasyabya amalwa; emilala yabiritegekwa.

²⁷Naye asyahĩra endagano eyĩsĩkĩre haguma nʼabangi busana nʼebiro birinda, nʼomo katĩkatĩ kʼebiro birinda ebyo, asyatsĩrĩsya ehongo nʼobuhere bwʼeyĩsyano; nʼoko byʼesyonye esĩ, omundu muguma asyasa oyukayira ekĩma; erĩhĩka aho erihera kũndũ lyasyahĩrwa ukwʼoyukayira ekĩma.