Read nande Hosea 2 Bible Online

Hosea 2 - nande bible

Hosea 2

¹Mubwire abagala benyũ Amĩ; nʼabali benyũ, Rũhama muti,

²Munegene na koyo wenyũ, munegene; kusangwa iye sĩ mũkalĩ wage, nage Sindi ĩba wuwe; alũsaye obũsĩngĩrĩ buwe omo bũsũ buwe, nʼoluteto luwe lũlũe omo katĩkatĩ kʼamabere wuwe,

³ngasyamũlũsya ko lukimba akabya ndũmbũ, nʼerimuyira ngʼekiro abutawa, nasyamuyira ngʼembwarara nibya, nʼerimuyira ngʼekitaka eʼkyũmĩre, nʼerĩmwĩta omo nyota.

⁴Kandi, Sindiendisyaganyira abana buwe; kusangwa ni bana bʼobũsĩngĩrĩ.

⁵Kusangwa nyĩnya wabo mwayendya; oyo wahekabo omo bukule abirikola esĩsonĩ; kusangwa abũga ati, Ngandikwama abaragane bage abakamba akalyo kage nʼamagetsi wage, obweya bwʼembũlĩ bwage nʼekĩtanĩ kyage, nʼamagũta wage nʼebyʼerĩpũlya byage.

⁶Busana nʼekyo, lebaya, nasyalĩba enzira yawe omo misakisaki, nasyamũhĩmbĩrako olũhĩmbo isiendisyabana enzira yiwe ahʼerilaba.

⁷Naye asyakwamirira abaragane buwe, nĩkwa sĩendĩsyahĩka kubo; kandi asyasondasondyabo, nĩkwa siendisyabanabo; neryo asyabũga ati, Ngandisuba ũkwʼĩbage wʼerĩmbere; kusangwa oko mugulu oyo nabya ndeke kwilaba lino.

⁸Kusangwa siabya asĩ ko nĩna ngye namuha engano, nʼebĩnyũ bihya-bihya, nʼamagũta, nʼerimuha ebĩtsĩpa nʼesyamagetsi ebyo bakolamo busana na Balĩ.

⁹Busana nʼekyo nasyasũbũlya engano yage oko mugulu wayo, nʼebĩnyũ byage bihya-bihya oko kirimo kyabyo, nʼerĩpũra obweya bwage bwʼembũlĩ nʼekĩtanĩ kyage ebyabya byangaswĩkĩre endũmbũ yiwe.

¹⁰Neryo nasyaswikula esĩsonĩ siwe omo meso wʼabaragane buwe, isihali omundu oyo wangamũlamya erĩlũa omo byala byage.

¹¹Kandi ngandĩsyatsĩrĩsya obutseme buwe, nʼebiro bikulu biwe, nʼemikera mihya-mihya yiwe, nʼesyo Sabato siwe, nʼamahĩndano wuwe wʼeritsemera.

¹²Kandi nasyaherya emĩrĩkĩ yiwe yʼebĩnyũ, nʼemiti yʼemĩtĩnĩ yiwe, eyo ahula ati, Ebĩ ni luhembo lwage olo abaragane bage banyiha; nage ngandiyirabyo mo mũsĩtũ, nʼesyonyama syʼomolĩ syasyalyabyo.

¹³Nasyamusuyira busana nʼebiro bya Baalĩ oyo ahĩsĩraya obukwa, omugulu ayisitika omo syombũka siwe syʼamatwĩ nʼobusanga buwe, nʼeriyakwamirira abaragane buwe, kyaleka inianyibirirwa, Omwami Mukulu atya.

¹⁴Busana nʼekyo, lebaya, ngandimukulula, nʼerimuleta omo mbwarara, nʼerĩbũga ndeke naye.

¹⁵Ngandisyamuha amalima wuwe wʼebĩnyũ erĩlũa eyo, nʼomusya wʼeAkorĩ busana nʼolũyĩ lwʼamaha; naye asyimbira eyo, ngʼebiro ebyo byʼobwana-buto buwe, ngʼebiro ebyo alũa omo kihugo kyʼeMĩsĩrĩ.

¹⁶Neryo Omwami Mukulu akabũga ati, Oko kiro ekyo, wasyanyibirikira mo Ĩsĩ, ĩbage, isiwendisyasyanyahula kandi mo Baalĩ, mukama wage.

¹⁷Kusangwa nasyalũsya amena wa Baalĩ omo buno buwe, nabo sihendisyaswahulwa kandi omo lĩna lyabo.

¹⁸Nʼoko kiro ekyo nasyayira endagano busana nabo haguma nʼesyonyama syʼomolĩ, na haguma nʼesyonyonyũ syʼekyanya, na haguma nʼebindu ebikakululuka byʼekitaka; kandi nasyalũsya obuta, nʼomũyalĩ, nʼamalwa erĩlũa omo kihugo, kandi nasyagotseryabo ahisi nʼobuholo.

¹⁹Nasyakũsĩmolya busana nage kera na kera; ega, nasyakũsĩmolya omo litunganene, nʼomwʼĩbanza, nʼomo bubuya bwʼolwanzo, nʼomwʼiganyira.

²⁰Nasyakũsĩmolya omo butalegula; neryo nawe wasyaminya Omwami Mukulu.

²¹Neryo kyasyabya oko kiro ekyo, Omwami Mukulu akabũga ati, Nasyasũbĩrya; nasyasũbĩrya emyanya, nayo yasyasũbĩrya ekihugo;

²²nʼekihugo kyasyasũbĩrya engano, nʼebĩnyũ bihya-bihya, nʼamagũta; nabyo byasyasũbĩrya Yezreelĩ.

²³Nage nasyamubiba ũkwʼĩngye omo kihugo; nage nasyamuganyira oyutaherwe eriganyira; kandi nasyabwira abatabya bandu bage nyiti, Muli bandu bage! Nabo basyabũga bati, Uwe uli Nyamuhanga wage.