Read nande Hosea 8 Bible Online

Hosea 8 - nande bible

Hosea 8

¹Ũhĩre engubi oko mĩnywa yawe! Ngʼerĩsamba ko likasa, enzĩgũ ikasa oko kĩtũnga kyʼOmwami Mukulu, kusangwa babĩrĩhalya oko ndagano yage nʼerilwa nʼemigambo yage.

²Bakanyilakirako bati, Nyamuhanga wage, ĩtwe Ĩsraelĩ tũnakwasĩ.

³Ĩsraelĩ abirigana ekibuya; enzĩgũ yasyamukwama.

⁴Babĩrĩhanganĩa abami, nĩkwa butsira ũkwʼĩngye; babiriyira abanya-mwami, ĩsĩnyasĩkyo; babĩrĩyĩkokoterya esyosanamu omo bĩtsĩpa byabo nʼesyamagetsi syabo, batoke erĩherĩbwa.

⁵Abirigana ekyana kyʼende kyawe, uwe Samarĩa bati erihitana lyage lyabiriaka kubo! Erĩtwĩryahi basyabya bate nʼolubanza kwehĩ?

⁶Kusangwa ekĩ kyahamulawa na Ĩsraelĩ; omunyima yo wakolakyo, nakyo si Nyamuhanga nʼahake; kwenene ekyana kyʼende kyʼeSamarĩa kyasyatulangwa mo bihande bihande.

⁷Kusangwa abakabiba erihunga, basyagesa akanyabungu; engano ihangene siyiwite embuto siyendisyayira eyĩsyano; yamasohola abʼehandi basyamerayo.

⁸Ĩsraelĩ abirimerwa; lino bali omo katĩkatĩ kʼebihanda ngʼenyungu ĩyitetsemesaya mundu.

⁹Kusangwa babirihetukira eAsũrĩa, ngʼepunda yʼomolĩ eyiri ĩyoyene; Efũraĩmũ abĩrĩkondesya abaragane.

¹⁰Ega, nomo bangakondesya abĩra omo katĩkatĩ kʼebihanda, lino ngandĩhĩndanĩabo; nabo bakandĩsyatsũka erikeha busana nʼomuheke wʼOmwami wʼabanya-mwami.

¹¹Kusangwa Efũraĩmũ abĩrĩkanyĩa ebiherero busana nʼebibi, byabiribya biherero byʼerikola ebibi busana naye.

¹²Nomo nabirimusakira emilondo yʼemigambo elfu ĩkũmĩ, nĩkwa ikaganzawa ngʼekindu kyʼehandi.

¹³Nĩkwa amahongo wʼamahere wage, bakahonga esĩswĩ ibalyasyo; nĩkwa Omwami Mukulu sĩalĩrĩgasyo; lino akandisyibuka ebibi byabo, nʼerisuyirabo busana nʼebibi byabo; basyasuba eMĩsĩrĩ.

¹⁴Kusangwa Ĩsraelĩ abiribirirwa Omũhangĩkĩ wuwe nʼerĩhĩmba ebikali; na Yũda abĩrĩkanyĩa emĩyĩ ikongotere; nĩkwa nasyatuma omuliro omo mĩyĩ yako, nago asyahĩsya amanyũmba awasosĩre ebikali.