Read nande Hosea 9 Bible Online

Hosea 9 - nande bible

Hosea 9

¹Uwe Ĩsraelĩ, Sutseme busana nʼeritsema, ngʼebihanda! Kusangwa wabĩrĩsĩngĩra erĩlũa uku Nyamuhanga wawe; wabirianza erĩkondesya oko buli kibuga kyʼengano.

²Ekibuga kyʼerĩhũmbĩrako, nʼekikamiro kyʼebĩnyũ sĩbyendĩsyalĩsyabo, nʼebĩnyũ bihya-bihya byasyamubulako.

³Sĩbendĩsyĩkala omo kihugo kyʼOmwami Mukulu; nĩkwa Efũraĩmũ asyasuba eMĩsĩrĩ, kandi eAsũrĩa basyalya akalyo katowene.

⁴Sĩbendĩsyũtũlĩra amahere wʼebĩnyũ oko Mwami Mukulu, amahere wabo sĩendĩsyamũtsemesya; obundu bwabo bwasyabya kubo ngʼakalyo kʼabandu abakalira; abosĩ abakalya kuko basyatsanda; kusangwa akalyo kabo kasyabya busana nʼengumbu yabo; sikendisyingira omo nyũmba yʼOmwami Mukulu.

⁵Mwasyakolakĩ oko kiro kyʼerĩhĩndana lĩbũyĩrĩre, oko kiro kikulu kyʼOmwami Mukulu kwehĩ?

⁶Kusangwa, lebaya, basyagenda busana nʼerihera; eMĩsĩrĩ yasyakuma-kumabo, Memfĩsĩ asyatabo; ebiti byasyaheka ebindu byabo byʼebĩtsĩpa; emisakisaki yasyabya omo mahema wabo.

⁷Ebiro byʼerisuyira byahĩkĩre, ebiro byʼerĩtũhũlya byahĩkĩre; Ĩsraelĩ baminye omwatsi oyũ, omũmĩnyererĩ nĩ mũkĩrũ, omundu wʼekĩrĩmũ oyũ nĩ mũsĩre, busana nʼobungi bwʼebibi byawe, na kusangwa obũyĩgũ ni bunene.

⁸Efũraĩmũ abya mũteya haguma na Nyamuhanga wage; abya mũmĩnyererĩ, nĩkwa ekitego kyʼoyukahamba enyonyũ kiri omo syonzira siwe syosĩ, kandi obũyĩgũ buli omo nyũmba ya Nyamuhanga wuwe.

⁹Babĩrĩyĩtsandya kutsibu, ngʼomo biro bya Gĩbea; Nyamuhanga asyibuka ebibi byabo, asyasuyira amalolo wabo.

¹⁰Moneya Ĩsraelĩ ngʼebĩgũma byʼebĩnyũ omo mbwarara; monalangira abotata-kulu wenyũ ngʼamayilula wʼomuti wʼomũtĩnĩ owakatsũka eriheta. Nĩkwa mobasa eBaalĩ-peorĩ, mobayihigula oko kindu kyʼesĩsonĩ, mobabya nye ngʼekyo banzĩre.

¹¹Nĩkwa Efũraĩmũ, olukengerwa lwabo lwasyaguluka ngʼenyonyũ. Sihendisyabya eributa kutse omukule, kutse oyũkahekĩbawa obukule.

¹²Nomo bangakũlya abana babo, nĩkwa nasyaholĩabo, isihali mundu oyo wasyasĩgala; ega, obũlĩge kubo omugulu nasyalũa kubo!

¹³Efũraĩmũ ngoko nalangira, ahandĩrwe omo kiharo kyowene; nĩkwa Efũraĩmũ asyahũlũkya abana buwe busana nʼerĩkwa.

¹⁴Uhebo, uwe Mwami Mukulu wasyaha bokĩ kwehĩ? Uhebo enda yʼerĩtesya nʼamabere awũmĩre.

¹⁵Ebibi byabo byosĩ biri eGĩlĩgalĩ; kwenene eyo monakwabo obusu! Busana nʼobubi bwʼemikolere yabo nasyahigabo balũe omo nyũmba yage; sindiendisyanzabo kandi; abanya-mwami babo bosĩ nĩ bahonĩ.

¹⁶Efũraĩmũ abĩrĩkwa, omũlĩhĩ wabo abiriuma, sibendisyabuta ebĩgũma; ega, nomo bangabuta abana, nĩkwa nasyĩta abana babuya abanzĩrwe bʼenda yabo.

¹⁷Nyamuhanga wage asyagusabo, kusangwa sibetamuhulikirira; nabo basyabya baganga-gangĩ omo katĩkatĩ kʼebihanda.