Read nande Yoelĩ 3 Bible Online

Yoelĩ 3 - nande bible

Yoelĩ 3

¹Kusangwa, lebaya, omo biro ebyo, nʼomo mugulu oyo, omugulu nasyasũbya abanyegwa bʼeYũda nʼabʼeYerũsalema,

²nasyahĩndanĩa ebihanda byosĩ, nasyandagalyabo omo musya wʼeYehosafatĩ; nasyaberererya eyo eritswera kubo busana nʼabandu bage na busana nʼabandu bage ye Ĩsraelĩ, abo bapanza-panza omo katĩkatĩ kʼebihanda: kandi mobagaba ekihugo kyage.

³Babirigusa omugereko busana nʼabandu bage, kandi babĩrĩhĩnganĩa omũlwana busana nʼomũmalaya, babĩrĩgũlya omumbesa busana nʼebĩnyũ, bapũlayebyo.

⁴Ega, ĩnywe Tĩro, na Sĩdonĩ, nʼoluhande losĩ lwʼeFĩlĩstĩa mũlĩkĩ ũkwʼĩngye kwehĩ? Mwasyamba endĩhĩ kwehĩ? Nĩkwa mwamanyiriha endĩhĩ, nasyasũbũlya endĩhĩ yenyũ oko mitwe yenyũ yo lũba nʼobwangu.

⁵Kusangwa mwabĩrĩmya ebĩtsĩpa byage nʼesyamagetsi syage, kandi mwabiritwala omo syohekalũ syenyũ ebindu byage byʼobũgũlĩ bunene,

⁶kandi mwabĩrĩgũlya abana ba Yũda nʼabana bʼeYerũsalema oko bagala bʼAbagĩrĩkĩ, imwatoka erĩhũmĩryabo hali erĩlũa oko mitano yabo;

⁷lebaya, nasyabũkyabo erĩlũa aho mwagũlayabo, nasyasũbũlya endĩhĩ yenyũ oko mitwe yenyũ.

⁸Kandi nasyagũlya abagala benyũ nʼabali benyũ omo byala byʼabana ba Yũda, nabo basyagũlyabo oko bandu ba Seba, oko kihanda kiri hali; kusangwa Omwami Mukulu abĩrĩbũgakyo.

⁹Mũkũmayĩraye ekĩ omo katĩkatĩ kʼebihanda; muhande amalwa; mwĩmanaye esyombangĩ; abandu bosĩ bʼamalwa base hakũhĩ, bahetukireho.

¹⁰Muhese esĩsũka syenyũ mo mĩyalĩ, nʼebisara byenyũ mo matũmo; omundu molo abũge ati nage indi mbangĩ.

¹¹Mwanguhe, mwase, ĩnywe ebihanda byosĩ byʼesyombande syosĩ, mũyĩhĩndanaye haguma; ũkĩmaye esyombangĩ syawe syʼeyo, uwe Mwami Mukulu.

¹²Ebihanda bĩyĩmũkaye, bihetuke omo musya wa Yehosafatĩ; kusangwa eyo nasyĩkala nʼeritswera ebihanda byosĩ ebĩtĩmbĩreko.

¹³Hĩra omũtemĩ; kusangwa obugese bwamahĩka; mwase mukame; kusangwa ekikamiro kyʼebĩnyũ kyoswĩre, amalega amabwaga; kusangwa ebibi byabo ni binene.

¹⁴Esyondeko, esyondeko omo musya wʼerĩtwa olubanza! Kusangwa ekiro kyʼOmwami Mukulu kiri hakũhĩ omo musya wʼerikatula.

¹⁵Eryuba nʼomukera byamayirwa mo mwĩrĩmya, nʼesyongũnũnũ sikaleka erĩkolerya lyasyo.

¹⁶Omwami Mukulu asyaruruma erĩlũa eSĩonĩ, nʼerĩbũga nʼomulenge wuwe eYerũsalema; nʼekyanya nʼekihugo byasyatitimana; nĩkwa Omwami Mukulu asyabya obusayiro bwʼabandu buwe, nʼahakongotere busana nʼabana ba Ĩsraelĩ.

¹⁷Litya mwasyaminya ko ndi Mwami Mukulu Nyamuhanga wenyũ, erĩĩkala eSĩonĩ ekitwa kyage kĩbũyĩrĩre; oko mugulu oyo, eYerũsalema yasyabya nyĩbũyĩrĩre, kandi sihendisyabya owʼehandi oyukalaba mugo kandi.

¹⁸Neryo oko kiro ekyo, ebitwa byasyatogongya ebĩnyũ bĩsĩhĩre, nʼehitwa hyasyalũa mwʼamasabũ, nʼehyũsĩ hyosĩ hyʼeYũda hyasyasenda mwʼamagetsi; nʼengũnũnũko yasyahuluka erĩlũa omo nyũmba yʼOmwami Mukulu, yasyaheherya omusya wʼeSĩtĩmũ.

¹⁹EMĩsĩrĩ yasyabya mulala, nʼeEdomũ yasyabya mbwarara yʼekĩma, busana nʼomwaga owakolawa oko bana ba Yũda, kusangwa babĩrĩũta omusasi owate ko lubanza omo kihugo kyabo.

²⁰Nĩkwa eYũda yasyĩkalwamo kera na kera, nʼeYerũsalema oko ndengo nʼoko ndengo.

²¹Nage nasyakĩsya omusasi wabo, ngoko ndakĩsaya; kusangwa Omwami Mukulu ĩkere eSĩonĩ.