Read nande Amosĩ 2 Bible Online

Amosĩ 2 - nande bible

Amosĩ 2

¹Omwami Mukulu akabũga ati, Busana nʼamalolo asatu wʼeMoabũ, ega, busana nʼawani, sindiendisyakakĩrya erisuyira lyako; kusangwa mwahĩsya amakũha wʼOmwami wʼeEdomũ, eribya mbemba yʼeswakara.

²Nĩkwa nasyatuma omuliro oko Moabũ, nago asyahĩsya ebikali byʼeKĩrĩotĩ; na Moabũ asyaholera omo mwaga nʼerĩũta obogo bwʼamalwa, haguma nʼomulenge wʼengubi.

³Omwami Mukulu ati, Nage nasyabuga omũtswerĩ erĩlũa omo katĩkatĩ kago; nasyĩta abanya-mwami bosĩ bako haguma naye.

⁴Omwami Mukulu akabũga ati, Busana nʼamalolo asatu wʼeYũda, ega, busana nʼawani, sindiendisyakakĩrya erisuyira lyako, kusangwa babirigana emigambo yʼOmwami Mukulu, kandi sĩbetateya emigambo yiwe, nʼamabehĩ wabo abĩrĩtalyabo, amabehĩ, ebyo abotata-kulu wabo bakwama.

⁵Nĩkwa nasyatuma omuliro oko Yũda, nago asyatogotya ebikali byʼeYerũsalema.

⁶Omwami Mukulu akabũga ati, Busana nʼamalolo asatu wa Ĩsraelĩ, ega, busana nʼawani, sindiendisyakakĩrya erisuyira lyako; kusangwa babĩrĩgũlya abatunganene busana nʼesyofranka, nʼabera busana nʼesyongendero ĩbĩrĩ.

⁷Abakahumayirira olũtũtũ lwʼekitaka oluli oko mitwe yʼabera, kandi nʼerĩkĩtya enzira yʼabandu bolo; nʼomundu na tata wuwe bakasĩngĩra omwana-muto muguma, busana nʼeritsuma erĩna lyage lĩbũyĩrĩre.

⁸Kandi bakagotsera oko mũsĩke wʼobuli kiherero oko ngimba esyahambawa mo muwato; kandi omo nyũmba ya Nyamuhanga wabo bakapũlaya ebĩnyũ byʼabandu abaliha endĩhĩ.

⁹Nĩkwa nĩ ngye naheraya Omũamorĩ embere syabo, obuli buwe bwʼendata bwabya ngʼobuli bwʼemĩerezĩ, naye abya wʼamaka ngʼemĩrĩngate; nĩkwa monaherya ebĩgũma biwe endata, nʼemĩrĩhĩ yiwe eyĩkwa.

¹⁰Omwami Mukulu ati, Kandi nĩna ngye nibya nabĩrũkaya erĩbalũsya omo kihugo kyʼeMĩsĩrĩ, monabasondola emyaka makũmĩ ani omo mbwarara, erĩsĩgalya ekihugo kyʼOmũamorĩ.

¹¹Kandi monahanganĩa oko bagala benyũ eribya bamĩnyererĩ, nʼoko balwana benyũ eribya Banazĩrĩ. Ĩnywe bana ba Ĩsraelĩ, ko bite bitya kwehĩ? Omwami Mukulu atya.

¹²Nĩkwa ĩnywe momwapũlĩsya Abanazĩrĩ ebĩnyũ, kandi momwahana abamĩnyererĩ muti, Simusyeminyerera!

¹³Lebaya, namalĩtoherwa eyĩkwa kwʼĩnywe ngʼegalĩ eyoswĩre mwʼemiganda ĩkalĩtoherawa.

¹⁴Esyondibito syasyabula oko mũtĩbĩtĩ; nʼowʼamaka siendisyatomeka oko maka wuwe; kutse owʼobũtokĩ sĩendĩsyalamya engebe yiwe.

¹⁵Kutse omũkandĩ wʼobuta Siendisyahangana; nʼomũtĩbĩtĩ omo bisando Siendisyabala; kutse oyukagenda oko sabayĩrĩ sĩendĩsyabalya engebe yiwe.

¹⁶Nʼoko kiro ekyo Omwami Mukulu ati, Oyukayisiga mo mbangĩ yʼamalwa asyatibita ndũmbũ oko kiro ekyo.