Read nande Amosĩ 3 Bible Online

Amosĩ 3 - nande bible

Amosĩ 3

¹Mowe ekĩnywa ekĩ, Omwami Mukulu abĩrĩbũga erilwa nenyũ, ĩnywe bana ba Ĩsraelĩ, erilwa nʼekĩtũnga kyosĩ ekyo nalũsaya omo kihugo kyʼeMĩsĩrĩ, nyiti;

²Omo katĩkatĩ kʼebĩtũnga byosĩ byʼekihugo ĩnywebene ĩngye munawite; busana nʼekyo ngabasuyira oko bibi byenyũ byosĩ.

³Ababiri banganalendera haguma batalagene kwehĩ?

⁴Endale yanganarurumira omo mũsĩtũ omugulu itawite ekyo yĩtĩre kwehĩ? Omusuko wʼendale anganalakira omo mwangalũ wago atetahamba kindu kwehĩ?

⁵Enyonyũ yanganawa omo muguli oko kitaka omugulu kute muguli busana nayo kwehĩ? Ekitego kyanganakosa oko kitaka kĩtahambĩre kindu kwehĩ?

⁶Engubi yanganabuhirwa omo mũyĩ nʼabandu ibatubaha kwehĩ? Ekitsibu kyanganawa oko mũyĩ Omwami Mukulu atetakolakyo kwehĩ?

⁷Kwenene Omukama Omwami Mukulu siendisyakola kindu, ate abĩsũlĩra abagombe buwe abamĩnyererĩ ekĩbĩsĩre kiwe.

⁸Endale yamabiruruma nindi yute wangubaha kwehĩ? Omukama, Omwami Mukulu amabĩbũga! Nindi yute wangaminyerera kwehĩ?

⁹Mũtũlego omo bikali byʼeAsĩdodĩ, nʼomo bikali byʼekihugo kyʼeMĩsĩrĩ, muti, Mũyĩhĩndanaye oko bitwa byʼeSamarĩa, neryo mũlebaye omwaga munene owaliyo, nʼomunubo munene wahi owali omo katĩkatĩ kabo.

¹⁰Omwami Mukulu ati, Nĩkwa sĩbasĩ erikola eritunganene, abakabika omwaga nʼobũrahĩ omo bikali byabo.

¹¹Busana nʼekyo Omukama, Omwami Mukulu akabũga ati, Enzĩgũ, eyĩkatĩmba oko kihugo; yasyakũtoya kwʼamaka wawe, nʼebikali byawe byasyahũngwa.

¹²Omwami Mukulu ati, Ngoko mũlĩsya kwʼakanyegũlaya ebihinga bibiri omo buno bwʼendale, kutse ekihande kyʼokũtũ, abana ba Ĩsraelĩ ko basyanyegũlĩbwa batya abĩkere eSamarĩa haguma nʼomũsĩke wʼengyingo, nʼoko musegemo wʼeharĩrĩ wʼengyingo.

¹³Omukama, Omwami Mukulu, Nyamuhanga wʼemilondo akabũga ati, Ĩnywe mowe, mũtũlego oko kĩtũnga kya Yakobo.

¹⁴Kusangwa oko kiro ekyo nasyasuyira amalolo wa Ĩsraelĩ, nibya nasyasuyira ebiherero byʼeBetelĩ; nʼamahembe wʼekiherero asyatũbwa, nʼeriwa oko kitaka.

¹⁵Omukama, Omwami Mukulu akabũga ati, Nasyaswĩrya enyũmba yʼomugulu wʼeritsuku nibya nʼenyũmba yʼomugulu wʼeryuba; nʼamanyũmba wʼameno wʼesyonzogũ asyahera, nʼamanyũmba manene manene asyahwaho.