Read nande Amosĩ 7 Bible Online

Amosĩ 7 - nande bible

Amosĩ 7

¹Omukama, Omwami Mukulu mwanyĩkangya atya; neryo, lebaya, abya akahangika esyongĩke omugulu wʼekirimo kyʼerilasa lyʼebiti. Neryo ekirimo kyʼerilasa lyʼebiti kyabya enyũma, omwami abigesa.

²Neryo esyongĩke syabere syabibuga erirya ebiti byosĩ byʼoko kitaka, neryo monabũga nyiti, Uwe Mukama, Omwami Mukulu, ngakulembalemba nyiti, unyibuyire! Ko Yakobo asyahangana ati kwehĩ? Kusangwa iye ni muke!

³Omwami Mukulu mwasuba oko mutima busana nʼekĩ. Omwami Mukulu ati, Sikyendisyabya.

⁴Omukama, Omwami Mukulu mwanyĩkangya atya: neryo lebaya, Omukama, Omwami Mukulu mwabirikira erilwa nabo omo muliro; nago mwabuga emirindi minene, kandi mwasonda erirya ekitaka.

⁵Neryo monabũga nyiti, Uwe Mukama, Omwami Mukulu, ngakulembalemba, uleke! Yakobo asyahangana ati kwehĩ? Kusangwa ni muke!

⁶Ũkwʼekĩ Omwami Mukulu mwasuba oko mutima. Omukama, Omwami Mukulu mwabũga ati, Ekĩ sikyendisyabya.

⁷Mwanyĩkangya atya; neryo, lebaya, Omukama mwahangana oko lũhĩmbo olwahĩmbawa omo ngohe eyikalenga, inianawite oko ngohe eyikalenga omo byala biwe.

⁸Neryo Omwami Mukulu mwanyibwira ati, Amosĩ, Wamalangirakĩ kwehĩ? Monabũga nyiti, Engohe eyikalenga. Neryo Omwami Mukulu mwabũga ati, Lebaya, nasyahĩra engohe eyikalenga omo katĩkatĩ kʼabandu bage Ĩsraelĩ; sindiendisyaswabalyabo.

⁹Kandi ahʼendata ha Ĩsaka hasyabya kĩma, nʼahabũyĩrĩre ha Ĩsraelĩ hasyatsandĩbwa; nage nasyahangana nʼerilwa nʼekĩtũnga kya Yeroboamũ omo mũyalĩ.

¹⁰Neryo omũhererĩ wʼeBetelĩ, ye Amazĩa, mwatuma uku Yeroboamũ omwami wʼeĨsraelĩ ati, Amosĩ abiriya embĩta erilwa nawe omo kĩtũnga kya Ĩsraelĩ; ekihugo sikyangatoka ebĩnywa biwe byosĩ.

¹¹Kusangwa Amosĩ amabũga ati, Yeroboamũ asyakwa omo mũyalĩ, na Ĩsraelĩ kwenene asyatwalwa omo bunyegwa erĩlũa omo kihugo kiwe.

¹²Amazĩa nibya mwabwira Amosĩ ati, Uwe mũhanĩ, ugende, utibite omo kihugo kya Yũda, eyo ulye ebyalya nʼeyo yʼuyaminyerere!

¹³Nĩkwa eBetelĩ eno Susyeminyerera, kusangwa nĩ habũyĩrĩre hʼOmwami, kandi nĩ nyũmba yʼobwami.

¹⁴Neryo Amosĩ mwasũbĩrya, mwabwira Amazĩa ati, Sinabya mũmĩnyererĩ, kutse sinabya mugala wʼomũmĩnyererĩ; nĩkwa nabya mũlĩsya, nʼomũkolerĩ wʼemiti yʼemikuyu.

¹⁵Nĩkwa Omwami Mukulu mwanyĩlũsya okwʼikwama ekihangulo. Kandi Omwami Mukulu mwambwira ati, Ugende, uminyerere busana nʼabandu bage Ĩsraelĩ.

¹⁶Neryo lino wowe ekĩnywa kyʼOmwami Mukulu, uwe ũkabũga uti, Suminyerere amalwa oko Ĩsraelĩ, kandi sũsyekangĩrĩraya amalwa nʼekĩtũnga kya Ĩsaka.

¹⁷Busana nʼekyo Omwami Mukulu ati, Omũkalĩ wawe asyabya mũsĩngĩrĩ omo mũyĩ, nʼabagala bawe nʼabali bawe basyakwa omo mũyalĩ, nʼekitaka kyawe kyasyagabwa omo ngohe; nawe wasyahola omo kihugo kĩtsandĩre. Na Ĩsraelĩ kwenene asyatwalwa omo bunyegwa erĩlũa omo kihugo kiwe.