Read nande Amosĩ 8 Bible Online

Amosĩ 8 - nande bible

Amosĩ 8

¹Neryo Omukama, Omwami Mukulu mwanyĩkangya atya; neryo, lebaya, ihali ekĩbo kyʼebĩgũma byʼomugulu wʼengarayi.

²Neryo mwabũga ati, Amosĩ, Wamalangirakĩ kwehĩ? Nage monabũga nyiti, Ekĩbo kyʼebĩgũma byʼomugulu wʼengarayi. Neryo Omwami Mukulu mwambwira ati, Endũlĩ yamahĩka oko bandu bage Ĩsraelĩ; sĩndĩendĩsyaswabalyabo.

³Nʼesyonyimbo syʼekikali syasyabya biriro oko kiro ekyo, Omukama, Omwami Mukulu atya; ebĩnda byasyabya bingi; basyagusabyo ehosĩ bũkũtũ.

⁴Mowe ekĩ, ĩnywe mukalyatanga abʼobwaga, nʼeribuga abolo bʼekihugo,

⁵muti, Omukera muhya-muhya, asyahwa kiro kyahi kwehĩ itwatoka erigula engano? NʼeSabato yasyahwa kiro kyahi kwehĩ itwatoka erĩtsũka akatale? Nʼeriyira akalengĩ mo kake, nʼeriyira esekelĩ mo nene, nʼerĩbĩra omo kĩlo kyʼeriteba;

⁶itwatoka erigula abandu abalekerenĩe oko franka, nʼabʼobwaga oko ngendero ĩbĩrĩ, nʼerĩgũlya amahũmbĩra wʼengano.

⁷Omwami Mukulu abĩrĩlahĩrya omwʼiyiheka lya Yakobo ati, Kwenene sindiendisyasyibirirwa nʼahake emĩbĩrĩ yabo na kera.

⁸Ekihugo sikyendisyatitimana busana nʼekĩ, nʼobuli mundu oyo wĩkere mukyo eririra kwehĩ? Ega, kyasyahangana ekyosĩ ngʼolũsĩ lwʼeNĩlĩ, kandi kyasyagusangwa nʼerihotoka kandi, ngʼolũsĩ lwʼeNĩlĩ lwʼeMĩsĩrĩ.

⁹Omukama, Omwami Mukulu akabũga ati, Oko kiro ekyo, kyasyabya, ngandĩsyakĩmya eryuba omwʼitungi, kandi nasyayira ekihugo mo mwĩrĩmya ĩbũnalolĩre ndeke.

¹⁰Kandi nasyahindula erirya ĩnene lyenyũ mo kiriro, nʼesyonyimbo syenyũ syosĩ mwʼĩsũsũmana; nasyahĩra emisarandwe omo mbindi syʼabandu bosĩ, nʼesyombala oko buli mutwe. Kandi nasyayirakyo ngʼomugulu wʼeririra busana nʼekyusa, nʼendũlĩ yakyo yasyabya ngʼekiro kyʼerikaliha.

¹¹Omukama, Omwami Mukulu akabũga ati, Ebiro bikasa, ngandisyatuma enzala omo kihugo; si nzala yʼakalyo, kutse nyota yʼamagetsi, nĩkwa eyʼerĩowa ebĩnywa byʼOmwami Mukulu.

¹²Basyaganga-ganga bakalũa oko ngetsi nʼerĩhĩka oko yindi, nʼerĩlũa elutambi lwʼendata nʼerĩhĩka eyo eryuba likasira; basyatibita eyĩ nʼeyĩ, erĩsonda-sondya ekĩnywa kyʼOmwami Mukulu, nĩkwa sibendisyabanakyo.

¹³Oko kiro ekyo, abambesa babuya nʼabalwana basyalembera busana nʼenyota.

¹⁴Nĩkwa abakalahĩraya Omwʼĩlolo lyʼeSamarĩa, bati, Uwe Danĩ, ngoko Nyamuhanga wawe aliho; kandi, ngoko enzira yʼeBerĩ-seba ikakota; basyawa isibendisyaswahangana kandi.