Read nande Yona 1 Bible Online

Yona 1 - nande bible

Yona 1

¹Neryo ekĩnywa kyʼOmwami Mukulu mokyahĩka uku Yona mugala wa Amĩtaĩ, kiti,

²Hangana, uye eNĩnawe, omũyĩ munene oyo, ubirikire kugo; kusangwa ebibi byabo byabiriminyikala embere syage.

³Nĩkwa Yona mwahangana mwatibita eTarsisi atoke erihigukala omo meso wʼOmwami Mukulu, neryo mwandagalira eYopa, mweyayo obwato bukaya eTarsisi. Neryo mwaliha etĩke yabo, neryo mwaya mubo, erigenda haguma nabo eTarsisi erĩlũa omo meso wʼOmwami Mukulu.

⁴Nĩkwa Omwami Mukulu mwatuma erihunga ĩnene omo ngetsi, neryo mohabya erigunga ĩnene omo ngetsi, kyaleka obwato ibwasonda eritulangika.

⁵Neryo abakasokaya obwato mobubaha, obuli mundu mwalakira nyamuhanga wuwe; neryo mobagusa omo ngetsi ebindu ebyabya omo bwato, ibwatoka erianguha. Nĩkwa Yona iniabiriandagalira omwisi wʼobwato; neryo mwagotsera mwayato.

⁶Neryo omukulu wʼobwato mwamũhĩkako, mwamubwira ati, Wabere uti, iwe, wayĩreto uti kwehĩ? Hangana, Ulakire Nyamuhanga wawe, kwamũhwa Nyamuhanga anganatwibuka situhere.

⁷Neryo mobabwirana obuli mundu nʼomũlĩkyabo bati, Mwase tugereke tutoke eriminya nga ni busana nandi obubi obũ bwamatũhĩkako. Neryo mobagereka, nʼomugereko mwawira uku Yona.

⁸Neryo mobamubwira bati, Tũkakũbũlaya tuti utubwire nga ni busana nandi obubi obũ bwamatũhĩkako; omũbĩrĩ wawe ni wahi kwehĩ? Kandi ũkalũahi kwehĩ? Nʼewenyũ ni hayi kwehĩ? nʼekĩtũnga kyawe ni kyahi kwehĩ?

⁹Naye mwabwirabo ati, Ingye indi Muebrania; ngubaha Omwami Mukulu Nyamuhanga wʼelubula, oyo wabumba engetsi nʼekitaka kyũmĩre.

¹⁰Neryo abandu mobubaha kutsibu mobamubwira bati, Uliakola ekyo busana nakĩ kwehĩ? Kusangwa abandu abo ĩbanasĩ kwʼakatswa omo meso wʼOmwami Mukulu, kusangwa iniabiribwirabo.

¹¹Neryo mobamubwira bati, Tukuyire tuti engetsi ĩyatũlera busana netu kwehĩ? Kusangwa engetsi moyabera erigunga.

¹²Naye mwabwirabo ati, Munyihambe munyiguse omo ngetsi; neryo engetsi iyatekana busana nenyũ. Kusangwa nyĩnasĩ erigunga lĩnene erĩ nĩ ngye ngaleka ĩryabahĩkako.

¹³Nĩkwa abandu mobagoya obwato bo kutsibu erĩsũbyabo oko kitaka; nĩkwa mobataluka. Kusangwa engetsi moyabera erigunga.

¹⁴Kyaleka ibalakira Omwami Mukulu bati, Tũkabũgangana ukʼuwe, Uwe Mwami Mukulu, Suleke tukahera busana nʼengebe yʼomundu oyũ, kandi sũtũhĩre kwʼomusasi ate ko musango; kusangwa Uwe Mwami Mukulu wabirikola ekĩkakũtsemesaya.

¹⁵Neryo mobahamba Yona mobamugusa omo ngetsi; nʼengetsi moyũmbya okwʼigunga.

¹⁶Neryo abandu abo mobubaha Omwami Mukulu yo kutsibu? mobahongera Omwami Mukulu obuhere, mobalahĩrya nʼerimulaga.

¹⁷Neryo Omwami Mukulu mwategekanĩa esamakĩ nene erimera Yona; na Yona mwabya omo nda yʼesamakĩ nene eyo, ebiro bisatu omo kiro nʼomwʼitungi.