Read nande Yona 4 Bible Online

Yona 4 - nande bible

Yona 4

¹Nĩkwa mokĩtatsemesya Yona nʼahake, neryo mwagalirwa.

²Neryo mwasaba Omwami Mukulu, ati, Ngakusaba uwe Mwami Mukulu, ekĩ si kyo nabũga, omugulu nabya inyikine omo kihugo kyʼewetu? Neryo, busana nʼeritindakola ekĩ monatibita eTarsisi, kusangwa nabya nyasĩ kʼuli Nyamuhanga. Owʼeriganyira, ko goswĩre nʼolukogo, isulihitana lũba, iguli wʼerisasira lingi, igukayisubako busana nʼobũhasya.

³Busana nʼekyo lino, Uwe Mwami Mukulu ngakũbũganganako, ũndũsaye kwʼengebe yage; kusangwa lyowene ũkwʼĩngye erihola kwilaba eribyaho.

⁴Neryo Omwami Mukulu mwabũga ati, Wamakola ndeke ukahitana kwehĩ?

⁵Neryo Yona mwahuluka erĩlũa omo mũyĩ, mwĩkala oko luhande lwʼomũyĩ eyo ryuba likasira, neryo mwayĩhĩmbĩra akatalikirire kʼeyo, mwĩkala omwisi wako omo kyũtsũtsũ, eririnda ekikandibya oko mũyĩ nga nĩkĩ.

⁶Neryo Omwami Mukulu Nyamuhanga, mwategekanĩa olungu, mwalasyalo busana na Yona, ati lubye kyũtsũtsũ oko mutwe wuwe, erĩmũlamya omo mibere yiwe mibi. Neryo Yona mwatsemera olungu olo lo kutsibu-tsibu.

⁷Nĩkwa Nyamuhanga mwakokotya omunyole omugulu wʼengyakya ukwʼaho, neryo omunyole mwakenza olungu olo, nalo moluma.

⁸Neryo, omugulu eryuba lyasingirira, Nyamuhanga mwakokotya erihunga erĩhũhene lĩkalũa ebwanga bwʼendata; nʼeryuba molyakola oko mutwe wa Yona, neryo Yona mwalembera, kyaleka iniayisabira erihola, ati, Lyowene ũkwʼĩngye erihola kwilaba eribyaho.

⁹Kandi Nyamuhanga mwabũga na Yona ati, Ukakola ndeke erihitana oko lungu kwehĩ? Naye mwabũga ati, Namakola ndeke erihitana, erĩhĩka okwʼihola.

¹⁰Neryo Omwami Mukulu mwabũga ati, Wamaganyira olungu, olo utalimira, kutse ũtalasaya; olwalasa omo kiro kiguma, nʼerihera omo kiro kiguma.

¹¹Nage sinangaganyira eNĩnawe, omũyĩ munene oyo, omuli abandu bangi kwilaba elfu erĩgana nʼamakũmĩ abiri (120,000), abatasĩ erisombola ebyala byʼamali oko byala byabo byʼamalembe; nʼesyonde nyingi nibya kwehĩ?