Read nande Emiganzo 13 Bible Online

Emiganzo 13 - nande bible

Emiganzo 13

¹Neryo Omwami Mukulu mwabũga na Musa ati,

²Utume abandu, balinge ekihugo kyʼeKanana, ekyo ngaha abana ba Ĩsraelĩ; mutume mundu muguma oko buli kihanda kyʼabotata wabo, obuli muguma omukulu wa mubo.

³Neryo Musa mwatumabo erĩlũa omo mbwarara yʼeParanĩ ngʼerihana lyʼOmwami Mukulu; abosĩ ba kubo abandu ababya basondolĩ bʼabana ba Ĩsraelĩ.

⁴Amena wabo waya: omo kihanda kya Rũbenĩ, Samũa mugala wa Zakũrĩ.

⁵Omo kihanda kya Sĩmeonĩ, Safatĩ mugala wa Hũrĩ.

⁶Owʼekihanda kya Yũda, Kalebũ mugala wa Yafũne.

⁷Owʼekihanda kya Ĩsakarĩ, Ĩgalĩ mugala wa Yosefũ.

⁸Owʼekihanda kya Efũraĩmũ, Hosea mugala wa Nũnĩ.

⁹Owʼekihanda kya Benyamĩna, Paltĩ mugala wa Rafũ.

¹⁰Owʼekihanda kya Zebũlũnĩ, Gadĩelĩ mugala wa Sodĩ.

¹¹Owʼekihanda kya Yosefũ, ekyo kye kihanda kya Manase, Gadĩ mugala wa Sũsĩ.

¹²Owʼekihanda kya Danĩ, Amĩelĩ mugala wa Gemalĩ.

¹³Owʼekihanda kya Aserĩ, Setũrĩ mugala wa Mĩkaelĩ.

¹⁴Owʼekihanda kya Nafũtalĩ, Nabĩ mugala wa Wopĩsĩ.

¹⁵Owʼekihanda kya Gadĩ Geũelĩ mugala wa Makĩ.

¹⁶Aya ni mena wʼabandu abo Musa atuma eriyalinga ekihugo. Na Musa mwahula erĩna lya Hosea mugala wa Nũnĩ mo Yosũa.

¹⁷Omugulu Musa atumabo eriringa ekihugo kyʼeKanana, mwabwirabo ati, Muhetuke omo nzira eyĩ oko luhande lwʼeLutambi lwʼeyĩkwa muhetuke omo kihugo kyʼebitwa.

¹⁸Mũlebaye ekihugo nga kiri kiti; nʼabandu bĩkere mukyo, nga ni bʼamaka kutse bolo, nga ni bake kutse bangi.

¹⁹Nʼekihugo ekyo bĩkeremo nga kiri kiti, nga kyowene kutse kibi? Nʼemĩyĩ eyo bĩkeremo ngʼiri yiti? Bĩkere omo bilaliriro, kutse omo mĩyĩ ikongotere?

²⁰Nʼekihugo nga kiri kiti? Nga kĩbogĩre kutse nga kyũmĩre? Nga kiri ko miti, kutse iyihi? Nenyũ mubye nʼemitima ĩsĩkĩre, kandi mulete oko bĩgũma byʼekihugo. Neryo omugulu oyo abya mugulu wʼeriera lyʼebĩnyũ byʼerĩmbere.

²¹Ko bahetuka batya, mobayalinga ekihugo erĩtsũka omo mbwarara yʼeSĩnĩ erĩhĩka oko Rehobĩ, okwʼingira lyʼeHamatĩ.

²²Kandi mobahetuka oko luhande lwʼelutambi lwʼeyĩkwa, mobahĩka eHebũronĩ; nʼeAhĩmanĩ, eSesaĩ, nʼeTalamaĩ, aho abana ba Anakĩ babya. Nĩkwa Hebũronĩ yahĩmbawa emyaka irinda emuliro wʼeSoanĩ eMĩsĩrĩ.

²³Kandi mobahĩka omo musya wʼeEskolĩ, mobatwa eyo Omutahi owali kwʼekĩkũto kiguma kyʼebĩgũma byʼebĩnyũ, nʼabandu babiri mobahekakyo oko muti; mobaleta nibya amakomamanga nʼemĩtĩnĩ.

²⁴Aho hahulawa omusya wʼeEskolĩ busana nʼekĩkũto abana ba Ĩsraelĩ batwaho.

²⁵Kandi mobasubula okwʼiringa ekihugo, ebiro makũmĩ ani byabihwa.

²⁶Mobayahĩka uku Musa, nʼuku Harũnĩ, nʼendeko yosĩ yʼabana ba Ĩsraelĩ, omo mbwarara yʼeParanĩ, eKadesĩ; neryo mobaleterabo nʼendeko yosĩ engulu, mobakangyabo ebĩgũma byʼekihugo.

²⁷Litya mobabwira Musa bati, Motwahĩkĩre omo kihugo eyo watutuma; kandi kwenene kyoswĩre mwʼamasabũ nʼobuki; nʼebĩ bye bĩgũma byakyo.

²⁸Nĩkwa abandu abĩkere omo kihugo ekyo ni bʼamaka, nʼemĩyĩ ikongotere, ni minene-minene kutsibu; nʼakandi motwalolĩre oko bana ba Anakĩ kweyo.

²⁹Amalekĩ ĩkere omo kihugo kyʼelutami lwʼeyĩkwa; nʼOmũhĩtĩ, nʼOmũyebũsĩ nʼOmũamorĩ, bĩkere omo kihugo kyʼebitwa, nʼOmukanana ĩkere oko mũsĩke wʼengetsi, oko mũsĩke wʼeYorodanĩ.

³⁰Neryo Kalebũ mwasũbya abandu bʼomutima omo nda emuliro wa Musa, ati, Tuhetukireyo lino, twĩmayekyo; kusangwa twangatoka kũndũ erĩkĩndakyo.

³¹Nĩkwa abandu abahetukirayo haguma naye mobabũga bati, Sitwangatoka erihetuka nʼeribambira abandu abo; kusangwa ni bʼamaka kwilaba twe.

³²Mobaletera abana ba Ĩsraelĩ bʼengulu nyibi yʼekihugo ekyo bayalinga, bati, Ekihugo ekyo twalabamo eriringakyo, ni kihugo kikalya esyondũlanĩ syamo; nʼabandu bosĩ twalolako mukyo, ni bandu bali-bali kutsibu.

³³Nʼeyo motwalola oko Banefĩlĩ, bagala ba Anakĩ, ni bʼAbanefĩlĩ; netu motwabya ngʼemĩsyenene omo meso wetu, ko twabya tutya omo meso wabo.