Read nande Emiganzo 14 Bible Online

Emiganzo 14 - nande bible

Emiganzo 14

¹Nʼendeko yosĩ moyasumba omulenge nge wayo, moyalaka; nʼabandu mobalira mobatoya emĩsonĩ omo kiro ekyo.

²Nʼabana bosĩ ba Ĩsraelĩ mobatonga Musa na Harũnĩ; nʼendeko yosĩ moyabwirabo iti, Kumbe twaholera omo kihugo kyʼeMĩsĩrĩ! Kutse kumbe twaholera omo mbwarara!

³Kandi busana nakĩ Omwami Mukulu akatuleta omo kihugo ekĩ eriwa omo mũyalĩ kwehĩ? Abakalĩ betu nʼabana betu basyabya banyegwa; Sĩryowene busana netu erisuba eMĩsĩrĩ kwehĩ?

⁴Neryo mobabwirana bati, Tũhĩre mũsondolĩ, neryo tusube eMĩsĩrĩ.

⁵Neryo Musa na Harũnĩ mobawa erilambama embere syʼerĩhĩndana lyosĩ lyʼendeko yʼabana ba Ĩsraelĩ.

⁶Neryo Yosũa mugala wa Nũnĩ, na Kalebũ mugala wa Yefũne, ababya bandu abayalinga ekihugo ekyo, mobasatangya esyongimba syabo;

⁷mobabwira endeko yosĩ yʼabana ba Ĩsraelĩ, bati, Ekihugo ekyo, twalabamo eriringakyo, ni kihugo kyowene kutsibu.

⁸Omwami Mukulu amatusĩma, asyatũlyatya omo kihugo ekĩ, nʼerituhakyo; ekihugo ekyoswĩre mwʼamasabũ nʼobuki.

⁹Ekiguma kisa simuyisamambule oko Mwami Mukulu kandi simubahe abandu bʼekihugo; kusangwa basyabya kalyo busana netu; ekilondero kyabo kyamalũsĩbwa kubo, Omwami Mukulu ali haguma netu; simubahebo.

¹⁰Nĩkwa endeko yosĩ moyahamula iti, twĩtebo omo mabwe, Neryo olukengerwa lwʼOmwami Mukulu molwahuluka oko bana bosĩ ba Ĩsraelĩ omo Hema yʼerĩhĩndanamo.

¹¹Neryo Omwami Mukulu mwabwira Musa ati, Kwʼabandu aba basyanyipona migulu yingahi? Nʼerĩhĩka emigulu yingahi sĩbendĩsyanyĩkĩrĩrya, nomo nanakola ebiminyikalo byosĩ ebĩ omo katĩkatĩ kabo kwehĩ?

¹²Ngandĩswĩryabo omo ndwala yʼakasũsũ, nʼerĩlũsya omwandu wabo, kandi nasyakuyira mo kihanda kinene nʼekyʼamaka kwilababo.

¹³Neryo Musa mwabũga nʼOmwami Mukulu, ati, Abanya Mĩsĩrĩ basyowa, kusangwa mowaleta abandu aba omo maka wawe erĩlũa omo katĩkatĩ kabo;

¹⁴nabo basyabwira esyondũlanĩ syʼekihugo ekĩ. Babĩrĩowa ngoko uwe Mwami Mukulu uli omo katĩkatĩ kʼabandu aba; kusangwa uwe Mwami Mukulu ukalolawako erĩso nʼerĩso, nʼekĩtũ kyawe kyikimana endata wabo, nawe ukagenda embere syabo, omo ndũyĩ yʼekĩtũ omo musibo, nʼomo ndũyĩ yʼomuliro omo kiro.

¹⁵Neryo wamĩta abandu aba ngʼomundu muguma, neryo ebihanda ebyowa engulu yawe, basyabũga bati,

¹⁶Kusangwa Omwami Mukulu mwataluka erikolya abandu aba bʼomo kihugo ekyo alahĩrĩrayabo, kikaleka ĩnĩtĩrabo omo mbwarara.

¹⁷Neryo lino, ngakusaba, Uleke amaka wʼOmwami Mukulu abye manene, ngoko wabĩrĩbũga uti,

¹⁸Omwami Mukulu sialihitana lũba, kandi oswĩre nʼeriganyira, akabuyira ebibi nʼamalolo; kandi sĩendĩsyabalya nʼahake oyuli kʼomusango, erĩtũhũlya ebibi byʼabotata oko bana erĩhĩka oko ndengo syʼakasatu nʼesyʼakani.

¹⁹Ngakusaba, ubuyire ebibi byʼabandu aba ngʼobunene bwʼeriganyira lyawe ko buli, kandi ngoko wabiribuyira abandu aba, erĩtsũka eMĩsĩrĩ erĩhĩka na lino.

²⁰Neryo Omwami Mukulu mwabũga ati, Nabiribuyirabo ngʼekĩnywa kyawe ko kiri,

²¹nĩkwa kwenene ngoko nyiriho, ekihugo kyosĩ kyasyũsũlĩbwa nʼolukengerwa lwʼOmwami Mukulu.

²²Kwenene abandu bosĩ abalangira olukengerwa lwage, nʼebiminyikalo byage, ebyo nakola eMĩsĩrĩ nʼomo mbwarara nĩkwa babirinyirengako esyongendo ĩkũmĩ esĩ, ĩsĩbetowa omulenge wage;

²³kwenene sibendisyalangira ekihugo ekyo nalahĩrĩraya abotata wabo, kutse sihali nʼomuguma wa kubo abanyipona oyo wasyalola kukyo.

²⁴Nĩkwa Kalebũ omugombe wage, kusangwa abya nʼogundi mutima omwisi wuwe, kandi abirinyikwama nʼomutima gosĩ, iye nasyamuleta omo kihugo ekyo ayamo; nʼabana buwe basyĩmyako.

²⁵Neryo Omũamalekĩ nʼOmukanana bĩkere omo musya; omo ngyakya mũbũnũkale, mugende omo mbwarara omo nzira ikaya oko Ngetsi yʼEngula.

²⁶Kandi Omwami Mukulu mwabũga na Musa na Harũnĩ, ati,

²⁷Nasyakolyahi nʼendeko nyibi eyĩ, eyikanyitonga nabi kwehĩ? Nabĩrĩowa emiyitongo yʼabana ba Ĩsraelĩ, eyo bakanyitonga nabi.

²⁸Ubwirebo uti Omwami Mukulu akabũga ati, Ngoko nyiriho, kwenene ngoko mwabĩrĩbũgĩra omo matwĩ wage, ko nasyabakola nyitya.

²⁹Ebĩnda byenyũ byasyawa omo mbwarara eyĩ; kandi abosĩ abaganzawa ũkwʼĩnywe, ngʼemiganzo yenyũ yosĩ, erĩtsũka oko myaka makũmĩ abiri nʼabakulu kwʼaho, abanyitonga nabi,

³⁰kwenene sĩmwendĩsyahĩka omo kihugo ekyo nalahĩraya busana nakyo nyiti nasyabĩkalya mukyo, nina Kalebũ musa, mugala wa Yefũne, na Yosũa mugala wa Nũnĩ.

³¹Nĩkwa abana benyũ, abo mwahula muti basyabya banyegwa, bo nasyaleta mukyo, nabo basyaminya ekihugo mwagana.

³²Nĩkwa Ĩnywe, ebĩnda byenyũ byasyawa omo mbwarara eyĩ.

³³Nʼabana benyũ basyabya balĩsya omo mbwarara emyaka makũmĩ ani, basyagalwa busana nʼeriregula lyenyũ erĩhĩka aho ebĩnda byenyũ byasyahwerera omo mbwarara.

³⁴Ngʼemiganzo yʼebiro mwalinga ekihugo, mwasyaheka omusango wenyũ emyaka makũmĩ ani, busana nʼobuli kiro Omwaka muguma, ye myaka makũmĩ ani, neryo mwasyaminya obũyĩgũ bwage.

³⁵Ĩngye Mwami Mukulu nabĩrĩbũga, kwenene nasyakola ekĩ oko ndeko nyibi yosĩ eyĩ, eyĩhĩndene nʼerinyipona. Basyahwera omo mbwarara eyĩ, basyaholerayo.

³⁶Nʼabandu abo Musa atuma eriringa ekihugo, abasubula, kandi abaleka endeko yosĩ ibamutonga nabi, busana nʼerireta engulu nyibi yʼekihugo,

³⁷abandu abo abaleta engulu nyibi yʼekihugo, mobahola omo ndwala yʼakasũsũ embere syʼOmwami Mukulu.

³⁸Nĩkwa Yosũa mugala wa Nũnĩ, na Kalebũ mugala wa Yefũne, mobasĩgala ibaneho oko bandu abayalinga ekihugo.

³⁹Omugulu Musa abwira abandu ba Ĩsraelĩ ebĩnywa ebĩ, abandu mobalira kutsibu.

⁴⁰Nĩkwa mobahangana omo ngyakya-ngyakya, mobahetukira oko singi yʼekitwa, bati, Lebaya, tune hano, kwenene twabirikola nabi, nĩkwa tukandihetukira aho Mwami Mukulu abirilaga.

⁴¹Nĩkwa Musa mwabũga ati, Busana nakĩ lino mukaketa erihana lyʼOmwami Mukulu, ĩmũnasĩ ko kite nʼomũyĩsa kwehĩ?

⁴²Simuhetuke, mũkasyaswĩrĩbwa ahisi embere syʼesyonzĩgũ syenyũ kusangwa Omwami Mukulu siali haguma nenyũ.

⁴³Kusangwa Omũamalekĩ nʼOmukanana bali embere syenyũ, kandi mwasyawa omo mũyalĩ kusangwa mwabirisuba enyũma butsira erikwama Omwami Mukulu. NʼOmwami Mukulu siendisyabya nenyũ.

⁴⁴Nĩkwa mobagana erĩowa mobahetukira oko singi yʼekitwa; nĩkwa erĩsandũkũ lyʼerilagana lyʼOmwami Mukulu, kutse Musa mobatalũa omo kilaliriro.

⁴⁵Neryo Abaamalekĩ nʼAbanya Kanana mobandagala, ababya bĩkere omo kihugo ekyo kyʼebitwa, mobaswĩryabo, mobaswĩryabo ahisi erĩhĩka eHorma.