Read nande Emiganzo 17 Bible Online

Emiganzo 17 - nande bible

Emiganzo 17

¹Neryo Omwami Mukulu mwabũga na Musa, ati,

²Ubwire abana ba Ĩsraelĩ, wĩmaye kubo kwʼemyũtso, omuguma busana nʼobuli kihanda, oko basondolĩ bosĩ ngʼebĩtũnga byʼabotata wabo, emyũtso erĩkũmĩ nʼeyĩbĩrĩ; Usake erĩna lyʼobuli mundu oko mũtso wuwe.

³Kandi wasyasaka erĩna lya Harũnĩ oko mũtso wa Lawĩ; kusangwa hasyabya omũtso muguma busana nʼobuli mukulu wʼebihanda byʼabotata wabo.

⁴Wasyabikayo omo Hema yʼerĩhĩndanamo embere wʼerĩtũlago, aho nasyahĩndana nenyũ.

⁵Neryo kyasyabya, omũtso wʼomundu oyo nasyayisoga asyalasya erĩsasa. Nasyayĩtsĩrĩsĩrya emiyitongo yʼabana ba Ĩsraelĩ, eyo bakabatonga

⁶Neryo Musa mwabwira abana ba Ĩsraelĩ; kandi abasondolĩ babo bosĩ mobamuha emyũtso, omuguma busana nʼobuli mũsondolĩ ngʼebĩtũnga byʼabotata wabo, emyũtso erĩkũmĩ nʼeyĩbĩrĩ; nʼomũtso wa Harũnĩ abya omo katĩkatĩ kʼemyũtso yabo.

⁷Neryo Musa mwabika emyũtso eyo embere syʼOmwami Mukulu omo Hema yʼerĩtũlago.

⁸Neryo engyakya, Musa mwingira omo Hema yʼerĩtũlago; neryo, omũtso wa Harũnĩ owabya busana nʼekihanda kya Lawĩ mwahũlũkya erĩsasa, kandi mwalasya erĩsasa, mwayira omusanga, kandi mwahetya ebĩgũma byʼamalozĩ ebyerĩre.

⁹Na Musa mwahũlũkĩrya abana ba Ĩsraelĩ beʼmyũtso yosĩ erĩlũa embere syʼOmwami Mukulu; nabo mobasamalira, nʼobuli mundu mwĩmya omũtso wuwe.

¹⁰Nĩkwa Omwami Mukulu mwabũga na Musa ati, Sũbaya omũtso wa Harũnĩ aho embere wʼerĩtũlago, ibikawe eribya kiminyikalo oko bana bʼepono; iwatoka erikunga emiyitongo yabo ũkwʼĩngye, bakasyahola.

¹¹Neryo Musa mwakola atya; ngoko Mwami Mukulu amuhana, mwakola atya.

¹²Nʼabana ba Ĩsraelĩ mobabwira Musa, bati, Tungerera, tukahwa, tukatsika, ĩtwe bosĩ tukatsika.

¹³Obuli mundu oyũkahĩka hakũhĩ, oyũkahĩka hakũhĩ nʼahʼerĩĩkala lyʼOmwami Mukulu, iniahola; twasyahera ĩtwe bosĩ kwehĩ?