Read nande Emiganzo 19 Bible Online

Emiganzo 19 - nande bible

Emiganzo 19

¹Neryo Omwami Mukulu mwabũga na Musa na Harũnĩ, ati,

²Ekĩ kyo kihano kyʼemigambo ekyo Mwami Mukulu abirihana ati, Ubwire abana ba Ĩsraelĩ, uti, bakuletere enyana yʼende yʼomula eyite ko kĩtĩngũ, eyite ko bulema, eyite yaya kwʼengomo.

³Mwasyahayo uku Eleazarĩ omũhererĩ, naye asyaletayo ekyaswa kyʼekilaliriro, nʼomundu muguma asyakererayo embere syʼobũsũ buwe.

⁴Neryo Eleazarĩ omũhererĩ asyĩmya oko musasi wayo oko munwe wuwe, nʼeritsatsanga oko musasi wayo engendo sirinda erĩlolyago oko luhande lwʼembere lwʼeHema yʼerĩhĩndanamo.

⁵Neryo enyana eyo yasyahĩsĩbwa embere syʼameso wuwe. Oluhu lwayo nʼesĩswĩ syayo, nʼomusasi wayo, haguma nʼebise byayo, byasyahĩsĩbwa.

⁶Nʼomũhererĩ asyĩmya omuti wʼekĩlagũ nʼehĩsopo, nʼolukimba lwʼomunyama, nʼerigusabyo omo muliro owakokereraya enyana yʼende.

⁷Neryo omũhererĩ asyerya esyongimba siwe, kandi asyakosa omubiri wuwe omo magetsi, nʼenyũma wʼaho ĩnĩahĩka omo kilaliriro, nʼomũhererĩ asyabya mũtsandĩrya erĩhĩka omwʼĩgolo-golo.

⁸Nʼoyũkahĩsayayo asyerya esyongimba siwe omo magetsi, nʼerikosa omubiri wuwe omo magetsi, naye asyabya mũtsandĩrya erĩhĩka omwʼĩgolo-golo.

⁹Nʼomundu oyo werĩre asyakuma-kuma erĩbũ lyʼenyana eyo nʼeribikalyo ekyaswa kyʼekilaliriro ahowene; nalyo lyasyabikirwa endeko yʼabana ba Ĩsraelĩ eribya magetsi wʼerĩlũsya obũtsandĩrya; ni buhere bwʼerĩlũsya ebibi.

¹⁰Nʼoyukakuma-kuma erĩbũ lyʼenyana eyo asyerya esyongimba siwe, asyabya mũtsandĩrya erĩhĩka omwʼĩgolo-golo; ekĩ kyasyabya kihano kya kera na kera busana nʼabana ba Ĩsraelĩ, kandi busana nʼomundu wʼehandi oyukabungira ewenyũ.

¹¹Nʼoyũkatũla oko kĩnda kyʼomundundi asyabya mũtsandĩrya ebiro birinda.

¹²Asyayerya omo magetsi ayo oko kiro kyʼebisatu, nʼoko kiro kyʼebirinda, neryo asyera; nĩkwa amatindayerya ekiro kyʼebisatu, nʼoko kiro kyʼebirinda, isiendisyera.

¹³Omundundi oyũkatũla oko kĩnda kyʼomundu ũholĩre, amatindayerya, akatasandaya ahʼerĩĩkala hʼOmwami Mukulu; nʼomundu oyo asyatahulwa oko Baĩsraelĩ; kusangwa amagetsi wʼobũtsandĩrya mwatatsatsangwa kwiye, asyabya mũtsandĩrya; obũtsandĩrya buwe bukinamuliko.

¹⁴Ekĩ kye kihano kyʼomugulu omundu akaholera omo Hema; obuli mundu oyũkahĩka omo Hema eyo, nʼobuli mundu oyuli omo Hema, basyabya batsandĩrya ebiro birinda.

¹⁵Nʼobuli nyungu ĩtakũnĩngĩre, eyite ko kĩkũnĩngo ekĩbohĩre kuyo, ĩnĩtsandĩre.

¹⁶Nʼomundundi oyuli okolĩ amatũla oko yo wĩtawa omo mũyalĩ, kutse ekĩnda, kutse erĩkuha lyʼomundu, kutse eyisinda, asyabya mũtsandĩrya ebiro birinda.

¹⁷Kandi busana nʼomũtsandĩrya basyĩmya okwʼĩbũ lyʼerĩhĩsya obuhere bwʼerĩlũsya ebibi; nʼamagetsi awakasenda asyahĩrwa kubyo omo nyungu.

¹⁸Nʼomundu werĩre asyĩmya ehĩsopo, ĩnĩakolyayo omo magetsi, nʼeritsatsangago oko Hema, nʼoko bindu byosĩ, nʼoko bandu ababyaho, nʼoko yo watũla okwʼĩkũha, kutse oyo wĩtawa, kutse oyũholĩre buyira, kutse eyisinda.

¹⁹Nʼomundu oyo werĩre asyatsatsangira omũtsandĩrya ekiro kyʼebisatu, nʼekiro kyʼebirinda; nʼoko kiro kyʼebirinda asyamwerya oko bũtsandĩrya, kandi asyerya esyongimba siwe, nʼeriyikosa omo magetsi, neryo iniera omwʼĩgolo-golo.

²⁰Nĩkwa omundu oyũtsandĩre, ĩsĩendĩyerya oko bũtsandĩrya, omundu oyo asyagabulirwa hali oko ndeko, kusangwa abĩrĩtsandya ahabũyĩrĩre hʼOmwami Mukulu; amagetsi wʼobũtsandĩrya sialitatsatsangwa kwiye; iye nĩ mũtsandĩrya.

²¹Litya kyasyabya kihano kyʼebiro byosĩ busana nabo. Nʼoyukatsatsanga amagetsi wʼobũtsandĩrya asyerya esyongimba siwe; nʼoyũkatũla oko magetsi wʼobũtsandĩrya asyabya mũtsandĩrya erĩhĩka omwʼĩgolo-golo.

²²Nʼekĩndũkĩ omundu oyũtsandĩre akatũlako kyasyabya kĩtsandĩrya; nʼomundu wasyatũla kukyo asyabya mũtsandĩrya erĩhĩka omwʼĩgologolo.