Read nande Emiganzo 2 Bible Online

Emiganzo 2 - nande bible

Emiganzo 2

¹Kandi Omwami Mukulu mwabũga na Musa na Harũnĩ, ati,

²Abana ba Ĩsraelĩ basyalalirira obuli mundu hakũhĩ nʼebendera yiwe, haguma nʼebiminyikalo byʼebĩtũnga byʼabotata wabo; basyapanga aho lutambi oko Hema yʼerĩhĩndanamo nʼerĩtĩmba kuyo.

³Nabo basyalalirira oko luhande lwʼeyo eryuba likahuluka basyabya bʼebendera yʼekilaliriro kya Yũda, ngʼemilondo yʼamalwa yabo; nʼomukulu wʼabana ba Yũda asyabya Nasonĩ mugala wa Amĩnadabũ.

⁴Nʼemilondo yiwe yʼamalwa, nʼabo baganzawa kubo, babya elfu makũmĩ alinda nʼĩnĩ nʼamagana ndatu (74,600).

⁵Nʼabakandisyalalirira hakũhĩ naye basyabya ekihanda kya Ĩsakarĩ; nʼomukulu wʼabana ba Ĩsakarĩ asyabya Netanelĩ mugala wa Zũarĩ.

⁶Nʼomulondo wuwe wʼamalwa, nʼabaganzawa kugo, babya elfu makũmĩ atanu nʼĩnĩ nʼamagana ani (54,400).

⁷Nʼekihanda kya Zebũlũnĩ; nʼomukulu wʼabana ba Zebũlũnĩ asyabya Elĩabũ mugala wa Helonĩ.

⁸Nʼomulondo wuwe wʼamalwa, nʼabaganzawa ba kugo babya elfu makũmĩ atanu nʼirinda nʼamagana ani (57,400).

⁹Abosĩ abaganzawa abʼekilaliriro kya Yũda babya elfu ĩgana nʼamakũmĩ munani na ndatu nʼamagana ani (186,400), ngʼemilondo yabo yʼamalwa. Basyatsũka erihongoka.

¹⁰Nʼoko luhande lwʼelutambi lwʼeyĩkwa, ebendera yasyabya yʼekilaliriro kya Rũbenĩ ngʼemilondo yabo yʼamalwa; nʼomukulu wʼabana ba Rũbenĩ asyabya Elĩsũrĩ, omugala wa Sedeũrĩ.

¹¹Nʼomulondo wuwe wʼamalwa, nʼabaganzawa kugo, babya elfu makũmĩ ani nʼendatu nʼamagana atanu (46,500).

¹²Nʼabakasyalalirira hakũhĩ naye basyabya ekihanda kya Simeonĩ; nʼomukulu wʼekihanda kya Sĩmeonĩ asyabya Selũmĩelĩ, mugala wa Sũrĩ-sadaĩ.

¹³Nʼomulondo wuwe wʼamalwa, nʼabaganzawa kugo, babya elfu makũmĩ atanu nʼomwenda nʼamagana asatu (59,300).

¹⁴Nʼekihanda kya Gadĩ: nʼomukulu wʼabana ba Gadĩ asyabya Elĩasafũ mugala wa Reũelĩ.

¹⁵Nʼomulondo wuwe wʼamalwa, nʼabaganzawa kugo babya elfu makũmĩ ani nʼĩtanu nʼamagana ndatu nʼamakũmĩ atanu (45,650).

¹⁶Abosĩ abaganzawa bʼekilaliriro kya Rũbenĩ babya elfu ĩgana nʼamakũmĩ atanu na nguma nʼamagana ani nʼamakũmĩ atanu, ngʼemilondo yabo (151,450). Nabo basyahongoka mo bʼakabiri.

¹⁷Neryo eHema yʼerĩhĩndanamo yasyahongoka, haguma nʼekilaliriro kyʼAbalawĩ omo katĩkatĩ kʼebilaliriro; ngoko bakalalirira, ko bakandisyahongoka batya, obuli mundu omo mwanya wuwe, ahali esyobendera syabo.

¹⁸Oko luhande lwʼeyĩkwa kwasyabya ebendera yʼekilaliriro kya Efũraĩmũ ngʼemilondo yabo yʼamalwa; nʼomukulu wʼabana ba Efũraĩmũ asyabya Elĩsama mugala wa Amĩhũdĩ.

¹⁹Nʼomulondo wuwe, nʼabaganzawa kugo babya elfu makũmĩ ani nʼamagana atanu (40,500).

²⁰Nʼobũhereranĩa naye hasyabya ekihanda kya Manase; nʼomukulu wʼabana ba Manase asyabya Gamalĩelĩ mugala wa Pedazũrĩ.

²¹Nʼomulondo wuwe wʼamalwa, nʼabaganzawa kugo, babya elfu makũmĩ asatu nʼĩbĩrĩ nʼamagana abiri (32,200).

²²Nʼekihanda kya Benyamĩna; nʼomukulu wʼabana ba Benyamĩna asyabya Abĩdanĩ mugala wa Gĩdeonĩ.

²³Nʼomulondo wuwe wʼamalwa, nʼabaganzawa kugo babya elfu makũmĩ asatu nʼĩtanu nʼamagana ani (35,400).

²⁴Abosĩ abaganzawa bʼekilaliriro kya Efũraĩmũ babya elfu ĩgana na munani nʼerĩgana (108,100), ngʼemilondo yabo. Nabo basyahongoka mo bʼakasatu.

²⁵Nʼoko luhande lwʼelutambi lwʼendata hasyabya ebendera yʼekilaliriro kya Danĩ ngʼemilondo yabo yʼamalwa; nʼomukulu wʼabana ba Danĩ asyabya Ahĩezerĩ mugala wa Amĩsadaĩ.

²⁶Nʼomulondo wuwe wʼamalwa, nʼabaganzawa kugo, babya elfu makũmĩ ndatu nʼĩbĩrĩ nʼamagana alinda (62,700).

²⁷Nʼabalalirira erĩhereranĩa naye kyasyabya ekihanda kya Aserĩ; nʼomukulu wʼabana ba Aserĩ asyabya Pagĩelĩ mugala wa Okranĩ.

²⁸Nʼemilondo yiwe yʼamalwa; nʼabaganzawa kubo, babya elfu makũmĩ ani na nguma nʼamagana atanu (41,500).

²⁹Neryo ekihanda kya Nafũtalĩ; nʼomukulu wʼabana ba Nafũtalĩ asyabya Ahĩra mugala wa Enanĩ.

³⁰Nʼomulondo wuwe wʼamalwa, nʼabaganzawa kugo, babya elfu makũmĩ atanu nʼĩsatu nʼamagana ani (53,400).

³¹Abosĩ abaganzawa abʼekilaliriro kya Danĩ babya elfu erĩgana nʼamakũmĩ atanu nʼirinda nʼamagana ndatu (157,600). Nabo basyahongoka enyũma wʼabosĩ ahali esyobendera syabo.

³²Aba bo baganzawa oko bana ba Ĩsraelĩ oko bĩtũnga byʼabotata wabo; abosĩ abaganzawa abʼebilaliriro ngʼemilondo yabo yʼamalwa, babya elfu magana ndatu nʼĩsatu nʼamagana atanu nʼamakũmĩ atanu (603,550).

³³Nĩkwa Abalawĩ mobataganzirwa oko bana ba Ĩsraelĩ; ngoko Mwami Mukulu ategeka Musa.

³⁴Abana ba Ĩsraelĩ mobakola batya ngʼebyosĩ Omwami Mukulu ategeka Musa, mobalalirira batya hakũhĩ nʼesyobendera syabo, kandi mobahongoka batya, obuli muguma, oko kihanda kyabo ngʼebĩtũnga byʼabotata wabo.