Read nande Emiganzo 22 Bible Online

Emiganzo 22 - nande bible

Emiganzo 22

¹Nʼabandu ba Ĩsraelĩ mobahongoka, mobalalirira omo bwerere bwa Moabũ eyisirya wʼeYorodanĩ, eYerĩko.

²Neryo Balaka mugala wa Zĩporĩ mwalangira ebyosĩ Abaĩsraelĩ bakolera Abaamorĩ.

³Na Moabũ mubaha kutsibu busana nʼabandu, kusangwa babya bangi; kandi Moabũ mubaha busana nʼabana ba Ĩsraelĩ.

⁴Na Moabũ mwabwira abakulu bʼeMĩdĩanĩ ati, Lino endeko eyĩ ikandisyabuga ebyosĩ bĩtũtĩmbĩreko ngoko enume yʼende ikalyatsira nʼerirya ebiti byʼomolĩ. Neryo Balaka mugala wa Zĩporĩ abya mwami wʼeMoabũ oko mugulu oyo.

⁵Neryo mwatuma abakwenda bʼuku Balama mugala wa Beorĩ, ePetorĩ, eyiri oko mũsĩke wʼolũsĩ Efurata, oko kihugo kyʼabana buwe, erimubirikira ati, Lebaya, hali abandu abalũa eMĩsĩrĩ. Tungerera, bamalĩba-lĩbanĩa ekihugo, kandi bĩkere eyisirya kwĩngye.

⁶Neryo ngakusaba nyiti, Wase, unyitsumire abandu aba; kusangwa bakalĩre kwĩngye; kwamũhwa nasyatoka erĩkĩndabo, inatoka erihigabo omo kihugo kusangwa nyĩnasĩ oyo gukatsumula ni mutsumulwa, nʼoyo gukatakira ni mutakirwa.

⁷Nʼabakulu bʼeMoabũ nʼabakulu bʼeMĩdĩanĩ mobagenda nʼebindu byʼeririha erilagula omo byala byabo; mobahĩka uku Balama, mobamubwira ebĩnywa bya Balaka.

⁸Naye mwabũga nabo ati, Mugotsere hano ekiro kino, nage ngandibaletera ekĩnywa kandi, ngoko Mwami Mukulu asyambwira. Neryo abakulu bʼeMoabũ mobĩkala haguma na Balama.

⁹Neryo Nyamuhanga mwahĩka uku Balama mwabũga ati, Aba ni bandu bahi abali haguma nawe kwehĩ?

¹⁰Na Balama mwabwira Nyamuhanga ati, Balaka, mugala wa Zĩporĩ, omwami wʼeMoabũ, abirinyitumirako, ati,

¹¹Lebaya, hali abandu abalũa eMĩsĩrĩ, bamalĩba-lĩbanĩa ekihugo; lino Wase utakirebo; kwamũhwa nasyatoka erilwa nabo, nʼerihigabo.

¹²Neryo Nyamuhanga mwabũga na Balama ati, Susyegenda nabo; Susyetakira abandu; kusangwa ni batsumulwa.

¹³Neryo Balama mwabuka engyakya, mwabũga nʼabakulu ba Balaka ati, Musube omo kihugo kyenyũ; kusangwa Omwami Mukulu aganĩre erinyihamula erigenda nenyũ.

¹⁴Nʼabakulu bʼeMoabũ mobahangana mobaya ewa Balaka, mobabũga bati, Balama aganĩre eriasa haguma netu.

¹⁵Kandi Balaka mwaswatuma abasondolĩ bangi nʼabakengĩrwe kwilaba bandi.

¹⁶Mobahĩka uku Balama, mobamubwira, bati, Balaka mugala wa Zĩporĩ amabũga ati, Ngakusaba, Suleke ekindu kikakũkakĩrya erĩhĩka aho nyiri.

¹⁷Kusangwa nasyakuyirira erĩsĩkya lĩnene kũndũ, nʼekĩndũkĩ wasyabũga nage, nasyakolakyo; neryo ngakusaba nyiti wase, utsume abandu aba.

¹⁸Na Balama mwasũbĩrya mwabũga nʼabagombe ba Balaka, ati, Balaka nomo mwangamba enyũmba yiwe eyoswĩre nʼebĩtsĩpa nʼesyamagetsi, sinangatoka erikola mwatsi muke kutse munene, lite erihana lyʼOmwami Mukulu, Nyamuhanga wage.

¹⁹Neryo lino nyiti kumbe mulinde hano ekiro ekĩ, inatoka eriminya ekindi ekyo Mwami Mukulu asyaswambwira.

²⁰Neryo Nyamuhanga mwahĩka uku Balama omo kiro ekyo, mwamubwira ati, Abandu bamabya babiriasa erikubirikira, hangana, ugende nabo; nĩkwa ekĩnywa ekyo nasyakubwira kisa, kyo wasyakola.

²¹Neryo Balama mwahangana omo tũtũtũ, mwasesa epunda yiwe, mwagenda nʼabakulu bʼeMoabũ.

²²Nĩkwa erihitana lya Nyamuhanga molyagulumira kusangwa Balama mwagenda, nʼomũlaĩka wʼOmwami Mukulu mwayikika omo nzira eribya enzĩgũ yiwe. Neryo Balama abere akagenda oko punda yiwe nʼabagombe buwe babiri babya haguma naye.

²³Nʼepunda omugulu yalangira omũlaĩka wʼOmwami Mukulu iniahangene omo nzira, nʼomũyalĩ owabirikulwa omo byala biwe, epunda moyakita erĩlũa omo nzira, moyaya omolĩ; nĩkwa Balama mwaswĩrya epunda erĩsũbya yʼomo nzira.

²⁴Neryo omũlaĩka wʼOmwami Mukulu mwahangana omo nzira nyike omo katĩ-katĩ kʼamalima wʼebĩnyũ ihali olũhĩmbo oko luhande olũ nʼolũ.

²⁵Neryo omugulu epunda yalangira omũlaĩka wʼOmwami Mukulu, moyayĩtũnda oko mukingi, moyahĩmatira ekisando kya Balama oko mukingi; naye mwaswĩryayo kandi.

²⁶Nʼomũlaĩka wʼOmwami Mukulu mwasegera embere, mwahangana ahahatatene, isihali bũyĩhambũlĩryo eribindukira oko byala byʼamali kutse oko malembe.

²⁷Neryo omugulu epunda yalangira omũlaĩka wʼOmwami Mukulu, moyabundama ahisi uku Balama; neryo Balama mwahitana, mwaswĩrya epunda yʼomo muti wuwe.

²⁸Neryo Omwami Mukulu mwakũmbũla obuno bwʼepunda, moyabwira Balama iti, Nakũjolĩrekĩ, kikaleka ĩwanzwĩrya esyongendo ĩsatu esĩ kwehĩ?

²⁹Na Balama mwabũga nʼepunda ati, Kusangwa wabirinyigana! Kumbe halwe mũyalĩ omo byala byage, kumbe nabĩrĩkwĩta manga-hatya.

³⁰Nʼepunda moyabũga na Balama iti, Sindi punda yawe eyo wabirigenderako omo buyingo bwawe bosĩ erĩhĩka mũnabwĩre kwehĩ? Ko nanagenda ngakukola nyitya na kera kwehĩ? Neryo Balama mwabũga ati, Iyihi.

³¹Neryo Omwami Mukulu mwalĩbũla ameso wa Balama, mwalangira omũlaĩka wʼOmwami Mukulu inianimene omo nzira, nʼomũyalĩ wuwe omo byala biwe; neryo Balama mũnamya omutwe wuwe, mwawa nʼerĩtũlamira oko bũsũ.

³²Neryo omũlaĩka wʼOmwami Mukulu mwamubwira ati, Busana nakĩ wabĩrĩswĩrya epunda yawe yʼengendo ĩsatu esĩ kwehĩ? Lebaya, nabirikuhulukira eribya nzĩgũ, kusangwa enzira yawe ni yʼepono embere syage.

³³Nĩkwa epunda moyikanyilolako, nʼerikitira oko mũsĩke embere syage esyongendo ĩsatu esĩ. Kumbe italyakita embere syage, kwenene nga nabĩrĩkwĩta lino, nʼerĩbalyayo.

³⁴Na Balama mwabũga nʼomũlaĩka wʼOmwami Mukulu ati, Nabĩrĩhalya; kusangwa sĩnyĩlwe nyasĩ ngoko wimene omo nzira erĩnyĩkakĩrya; na lino, kyamatindakũtsemesya, ngandisubula.

³⁵Nĩkwa omũlaĩka wʼOmwami Mukulu mwabũga na Balama ati, Ugende nʼabandu aba; nĩkwa wasyabũga ekĩnywa ekyo nasyakubwira kisa. Neryo Balama mwagenda nʼabakulu ba Balaka.

³⁶Nʼomugulu Balaka owa ngoko Balama akasa, mwayahĩndana naye oko mũyĩ wʼeMoabũ, owali oko mutano wʼeArnonĩ, owali, oko luhande lwʼendũlĩndũlĩ yʼomutano.

³⁷Na Balaka mwabũga na Balama ati, Mondakutumirako ndekendeke erikubirikira kwehĩ? Busana nakĩ mutasa kwĩngye kwehĩ? Kwenene sinangatoka erĩkũsĩkya kwehĩ?

³⁸Neryo Balama mwabũga na Balaka ati, Lebaya, lino namakũhĩkako! Ko ngwite bũtokĩ nʼobuke erĩbũga mwatsi kwehĩ? Ekĩnywa ekyo Mwami Mukulu akahĩra omo buno bwage, kyo nasyabũga.

³⁹Na Balama mwagenda haguma na Balaka, mobahĩka eKĩrĩatĩ-Hũzotĩ.

⁴⁰Na Balaka mwakera esyonume syʼesyonde nʼesyombũlĩ, mwatuma esindi uku Balama, nʼoko basondolĩ ababya haguma naye.

⁴¹Neryo engyakya, Balaka mwatwala Balama, mwamũhetũkĩrya ahʼendata ha Baalĩ; neryo eyo mwalangira aho abandu batwĩrĩrye.