Read nande Emiganzo 25 Bible Online

Emiganzo 25 - nande bible

Emiganzo 25

¹Na Ĩsraelĩ mwĩkala eSĩtĩmũ; nʼabandu mobatsũka eriteta abali bʼeMoabũ.

²Kusangwa babirikira abandu okwʼihongera lyʼesyonyamuhanga syabo; nʼabandu mobalya, mobũnamira esyonyamuhanga syabo.

³Na Ĩsraelĩ mwalandikana na Baalĩ-Peorĩ; nʼOmwami Mukulu mwahitana uku Ĩsraelĩ.

⁴Neryo Omwami Mukulu mwabwira Musa ati, Wĩmaye abasondolĩ bosĩ bʼabandu aba, nʼerĩĩtĩrabo embere syʼOmwami Mukulu omo mwisi, erihitana lĩkalĩre lyʼOmwami Mukulu litoke erĩlũa uku Ĩsraelĩ.

⁵Na Musa mwabwira abatswerĩ ba Ĩsraelĩ ati, Obuli mundu kwĩnywe ĩte abandu buwe abalandikene na Baalĩ-Peorĩ.

⁶Neryo omuguma gʼoko bana ba Ĩsraelĩ mwasa, mwaleta abagala babo mũkalĩ wʼeMĩdĩanĩ omo meso wa Musa nʼomo meso wʼendeko yosĩ yʼabana ba Ĩsraelĩ omugulu babya bakalira oko lũkyo lwʼeHema yʼerĩhĩndanamo.

⁷Nʼomugulu Fĩnehasĩ, mugala wa Eleazarĩ, mugala wa Harũnĩ omũhererĩ, alangirakyo mwahangana omo ndeko, mwĩmya erĩtũmo omo byala biwe;

⁸mwakwama omundu oyo wa Ĩsraelĩ omo Hema, mwahũrũnganĩa erĩtũmo omo babiri bosĩ, omulume wa Ĩsraelĩ, nʼomũkalĩ oyo, erĩlabyalyo omo mibiri yabo. Litya ekĩhũnzo mokyakakĩrĩbwa oko bana ba Ĩsraelĩ.

⁹Nʼabahola omo kĩhũnzo ekyo babya bandu elfu makũmĩ abiri nʼĩnĩ (24,000).

¹⁰Neryo Omwami Mukulu mwabũga na Musa ati,

¹¹Fĩnehasĩ mugala wa Eleazarĩ, mugala wʼomũhererĩ Harũnĩ, abiribindula erihitana lyage oko bana ba Ĩsraelĩ, kusangwa mwakwa obũha omo bũha bwage kubo, kyaleka ĩnĩndaherya abana ba Ĩsraelĩ omo bũha bwage.

¹²Busana nʼekyo ũbũge uti, Lebaya, ngamuha endagano yage yʼobuholo.

¹³Neryo yasyabya kwiye nʼoko bana buwe enyũma wuwe, endagano yʼobũhererĩ kera na kera; kusangwa abya nʼobũha busana na Nyamuhanga wuwe, kandi mwaliha embanulo busana nʼabana ba Ĩsraelĩ.

¹⁴Nĩkwa erĩna lyʼomundu wa Ĩsraelĩ oyo wĩtawa haguma nʼomũkalĩ wʼeMĩdĩanĩ lyabya Sĩmũrĩ, mugala wa Salũ, omũsondolĩ wʼekihanda kya tata omo Basĩmeonĩ.

¹⁵Nʼerĩna lyʼomũkalĩ Omunya Mĩdĩanĩ oyo wĩtawa lyabya Kozĩbĩ, mwali wa Zũrĩĩ abya mukulu wʼabandu bʼekihanda kyʼabotata wabo omo Banya Mĩdĩanĩ.

¹⁶Neryo Omwami Mukulu mwabũga na Musa ati,

¹⁷Mwagalaye Abamĩdĩanĩ, mũswĩrayebo.

¹⁸Kusangwa babĩrĩbagalĩranĩa omo matebo wabo, ago babiribatebamo omo mwatsi wa Peorĩ, nʼomo mwatsi wa Kozĩbĩ, mwali wʼomũsondolĩ wʼeMĩdĩanĩ, mwali wabo, oyo wĩtawa oko kiro kyʼekĩhũnzo busana nʼomwatsi wa Peorĩ.