Read nande Emiganzo 36 Bible Online

Emiganzo 36 - nande bible

Emiganzo 36

¹Neryo abakulu bʼebĩtũnga byʼabotata byʼekihanda kyʼabagala ba Gĩleadĩ, mugala wa Makĩrĩ, mugala wa Manase, wʼebĩtũnga byʼabagala ba Yosefũ, mobasegera hakũhĩ, mobabũgĩra embere sya Musa, nʼembere syʼabasondolĩ, abakulu bʼebĩtũnga byʼabotata byʼabagala ba Ĩsraelĩ.

²Mobabũga bati, Omwami Mukulu mwahana omukama wage eriha ekihugo mo mwandu okwʼigereka oko bagala ba Ĩsraelĩ; kandi omukama wage mwahanwa nʼOmwami Mukulu eriha omwandu wa Zelofehadĩ mugala wetu oko bali buwe.

³Kandi bamahĩkĩbwa nʼabagala bʼebindi bihanda byʼabana ba Ĩsraelĩ, neryo omwandu wabo ĩnĩalũsĩbwa oko botata wetu, iniatomekerwa oko mwandu wʼekihanda ekyo basyabyako; neryo omwandu asyalũsĩbwa okwʼigereka lyʼomwandu wetu.

⁴Nʼomugulu eYũbĩle yʼabana ba Ĩsraelĩ yasyahĩka, omwandu wabo asyatomekerwa oko mwandu wʼekihanda ekyo baliko; neryo omwandu wabo ĩnĩalũsĩbwa omo mwandu wʼekihanda kyʼabotata wetu.

⁵Neryo Musa mwahana abana ba Ĩsraelĩ ngʼekĩnywa kyʼOmwami Mukulu, ati, Ekihanda kyʼabagala ba Yosefũ kĩkabũga ndeke.

⁶Oyũ go mwatsi ogo Mwami Mukulu abiritegeka busana nʼabali ba Zelofehadĩ, ati, Bahĩkĩbawe nʼabo banzĩre; nĩkwa litolere ĩbahĩkĩbwa omo kĩtũnga kyʼekihanda kya tata wabo.

⁷Neryo sihendisyabya mwandu wʼabagala ba Ĩsraelĩ owakandĩsyahũmĩra oko kindi kihanda nʼekindi kihanda; kusangwa abagala ba Ĩsraelĩ basyamakirira obuli mundu oko mwandu wʼekihanda kyʼabotata wuwe.

⁸Nʼobuli mwali, oyuwite omwandu omo kihanda kyahi omo bagala ba Ĩsraelĩ, asyabya mũkalĩ wʼomundu wʼekĩtũnga kyʼekihanda kya tata wuwe, abagala ba Ĩsraelĩ batoke erĩsĩgalya obuli mundu omwandu wʼabotata wuwe.

⁹Neryo Sihabye omwandu owakahũmĩra oko kihanda kiguma eriya oko kindi kihanda; kusangwa ebihanda byʼabagala ba Ĩsraelĩ byasyamakirira obuli mundu oko mwandu wuwe.

¹⁰Ngoko Mwami Mukulu ahana Musa, litya abali ba Zelofehadĩ mobakola batya;

¹¹kusangwa Mala, Tĩrza, na Hogla, na Mĩlka, na Noa, bali ba Zelofehadĩ, mobahĩkĩbwa nʼabagala bʼĩse-mulere wabo.

¹²Mobahĩkĩbwa omo bĩtũnga byʼabagala ba Manase, mugala wa Yosefũ; nʼomwandu wabo mwĩkala omo kihanda kyʼebĩtũnga kya tata wabo.

¹³Ebĩ bye bihano nʼebilayiro ebyo Mwami Mukulu ahana bagala ba Ĩsraelĩ omo buno bwa Musa omo bwerere bwʼeMoabũ hakũhĩ nʼeYorodanĩ eyisirya kwʼeYeriko.