Read nande Emiganzo 4 Bible Online

Emiganzo 4 - nande bible

Emiganzo 4

¹Kandi Omwami Mukulu mwabũga na Musa na Harũnĩ, ati,

²Tondeka eriganza lyʼabana ba Kohatĩ omo katĩkatĩ kʼabagala ba Lawĩ, oko bĩtũnga byabo, nʼoko manyũmba wʼabotata wabo,

³erĩtsũka oko myaka makũmĩ asatu nʼabakulu kwʼaho erĩhĩka oko myaka makũmĩ atanu, abosĩ abakingira oko mũbĩrĩ, abakakola omũbĩrĩ omo Hema yʼerĩhĩndanamo.

⁴Oyũ go mũbĩrĩ wʼabagala ba Kohatĩ omo Hema yʼerĩhĩndanamo, omo bindu bĩbũyĩrĩre kutsibu.

⁵Omugulu abʼomo kilaliriro bakahongoka, Harũnĩ nʼabagala buwe basyingira omo Hema, basyakĩmya olukimba olũkasũkũlĩraya nʼeriswika erĩsandũkũ lyʼerĩtũlago mulo,

⁶nʼeriswika kulyo kwʼengobĩ yʼepombolo, nʼerisesa kulyo olukimba lʼomũnĩkĩ mubuya, kandi mwasyĩngĩrya mulyo mwʼemigamba yalyo.

⁷Kandi oko mesa yʼobundu bwʼerikanganĩa basyasesa olukimba lʼomũnĩkĩ, nʼerĩhĩra kulo kwʼamatuba, nʼemyũko, nʼebibindi, nʼesyondehĩ syʼerĩũtũlĩramo; nʼobundu obutyusa bwasyabya kulyo.

⁸Kandi basyasesa kubyo kʼolukimba lwʼengula, nʼeriswika kubyo kwʼengobĩ yʼepombolo, kandi basyahĩra emigamba yabo.

⁹Kandi basyĩmya olukimba lʼomũnĩkĩ, nʼeriswika omutagala wʼetala, nʼesyotala syakyo, nʼebĩkalĩmaya etala byasyo, nʼebibindi byʼebĩrĩmĩryo, nʼamatambya gosĩ wʼamagũta, ebyo bakakolerako.

¹⁰Kandi basyahĩrakyo haguma nʼebindu byakyo byosĩ omo kiswiko kyʼengobĩ yʼepombolo, basyahĩrakyo oko migamba yʼerihekabyo.

¹¹Nʼoko kiherero kyʼesyamagetsi basyasesa kukyo kwʼolukimba lʼomũnĩkĩ, nʼeriswikakyo omo ngobĩ yʼepombolo, nʼerĩhĩramo emigamba yakyo.

¹²Kandi basyĩmya ebindu byosĩ byʼomũbĩrĩ ebyo bakakoleramo ahabũyĩrĩre, basyahĩrabyo omo lukimba lʼomũnĩkĩ, nʼeriswikabyo omo ngobĩ yʼepombolo, nʼerĩhĩrabyo oko migamba yʼerihekabyo.

¹³Neryo basyalũsya erĩbũ lyʼoko kiherero, nʼerisesa kukyo kwʼolukimba lʼomula.

¹⁴Neryo basyahĩra endata kukyo kwʼebindu byaho byosĩ, ebyo bakakolamo, esyongyo syʼomuliro, esyokanya syʼesĩswĩ, nʼemyũko, nʼebibindi, ebindu byosĩ byʼekiherero; basyasesa kukyo kwʼengobĩ yʼepombolo, nʼerĩhĩramo emigamba yʼerihekakyo.

¹⁵Kandi omugulu Harũnĩ nʼabagala buwe bakabuga eriswika ahabũyĩrĩre, nʼebindu byosĩ byʼahabũyĩrĩre, omugulu abʼekilaliriro bakahongoka; enyũma wʼaho, abagala ba Kohatĩ ibasa nʼerihekabyo; ĩsĩbatũla oko habũyĩrĩre, bakasyahola. Ebindu ebĩ byo muheke wʼabagala ba Kohatĩ omo Hema yʼerĩhĩndanamo.

¹⁶Nʼobũteya bwa Eleazarĩ mugala wa Harũnĩ omũhererĩ bwasyabya amagũta busana nʼetala, nʼobukwa obũsĩhĩre, nʼobuhere bwʼeyĩsyano obutyusa, nʼamagũta wʼerĩhakabya, obũteya, bwʼahʼerĩĩkala hosĩ, nʼobwʼebyosĩ ebirimo haguma nʼahabũyĩrĩre, nʼebindu byaho.

¹⁷Neryo Omwami Mukulu mwabũga na Musa na Harũnĩ, ati,

¹⁸Simugabe ekihanda kyʼebĩtũnga byʼAbakohatĩ oko Balawĩ.

¹⁹Nĩkwa mukolerebo mutya, batoke eribyaho nʼeritindahola, omugulu bakasegera hakũhĩ nʼebindu bĩbũyĩrĩre kutsibu; Harũnĩ nʼabagala buwe basyingira omo Hema; nʼerikangirirabo obuli muguma oko mũbĩrĩ wuwe nʼoko muheke wuwe;

²⁰nĩkwa isibingira erisamalira ebindu bĩbũyĩrĩre nʼakatambĩ nʼakaguma, bakasyahola.

²¹Kandi Omwami Mukulu mwabũga na Musa ati,

²²Utondeke emiganzo yʼabagala ba Gerĩsonĩ omo bĩtũnga byʼabotata wabo, nʼoko bĩtũnga byabo;

²³erĩtsũka oko myaka makũmĩ asatu nʼabakulu kwʼaho erĩhĩka emyaka amakũmĩ atanu wasyaganzabo; abosĩ abakingira erikola omũbĩrĩ bakole omũbĩrĩ omo Hema yʼerĩhĩndanamo.

²⁴Oyũ go mũbĩrĩ wʼebĩtũnga byʼAbagerĩsonĩ omwʼikola nʼeriheka emiheke.

²⁵Basyaheka esyongimba esĩkasũkũlĩraya ahʼerĩĩkala, nʼeHema yʼerĩhĩndanamo nʼekiswiko kyayo, nʼekiswiko kyʼengobĩ yʼepombolo ekiri endata kuyo, nʼolukimba olũkasũkũlĩraya busana nʼolũkyo lwʼeHema yʼerĩhĩndanamo,

²⁶nʼesyongimba esikaleremba syʼekibuga, nʼolukimba olũkasũkũlĩraya busana nʼolũkyo lwʼekikiraga kyʼekibuga ekĩkatĩmba oko hʼerĩĩkala hʼekiherero, nʼemikoba yakyo, nʼebindu byosĩ byʼomũbĩrĩ wabo, nʼekĩndũkĩ kyasyakolwa mubyo; basyakola umwʼebyo.

²⁷Omũbĩrĩ gosĩ wʼabagala ba Gerĩsonĩ, omo miheke yabo yosĩ, nʼomo mĩbĩrĩ yabo yosĩ, yasyabya omo hamũlĩ ya Harũnĩ nʼabagala buwe; nenyũ mwasyahanabo omo mũbĩrĩ emiheke yabo yosĩ.

²⁸Oyũ go mũbĩrĩ wʼebihanda byʼabagala ba Gerĩsonĩ omo Hema yʼerĩhĩndanamo; nʼomũbĩrĩ wabo asyabya omo byala bya Ĩtamarĩ mugala wa Harũnĩ omũhereri.

²⁹Nĩkwa busana nʼabagala ba Merarĩ, wasyaganzabo oko bĩtũnga byabo nʼoko bĩtũnga byʼabotata wabo;

³⁰erĩtsũka oko myaka makũmĩ asatu nʼabakulu kwʼaho erĩhĩka oko myaka makũmĩ atanu wasyaganzabo, obuli mundu oyukingira omo mũbĩrĩ, erikola omũbĩrĩ wʼeHema yʼerĩhĩndanamo.

³¹Nʼoyũ go mũbĩrĩ wʼemiheke yabo, oko mũbĩrĩ wabo gosĩ omo Hema yʼerĩhĩndanamo; ebisayi byʼeHema, nʼebibatsi byayo, nʼesyondũyĩ syayo, nʼebitindo byayo,

³²nʼesyondũyĩ esĩkatĩmba oko kibuga oko syombande syosĩ, nʼebitindo byayo, nʼemĩsũmalĩ yayo, nʼemikoba yayo, haguma nʼebindu byayo byosĩ, nʼomũbĩrĩ wabo gosĩ; kandi mwasyaganzira oko mena wʼobuli mundu ebindu byosĩ ebyo asyaheka.

³³Oyũ go mũbĩrĩ wʼebĩtũnga bya Merarĩ oko mũbĩrĩ wabo gosĩ, omo Hema yʼerĩhĩndanamo, omo byala bya Ĩtamarĩ mugala wa Harũnĩ omũhererĩ.

³⁴Kandi Musa na Harũnĩ nʼabakulu bʼendeko mobaganza abagala ba Kohatĩ oko bĩtũnga byabo, nʼoko bĩtũnga byʼabotata wabo,

³⁵erĩtsũka oko myaka makũmĩ asatu nʼabakulu kwʼaho erĩhĩka oko myaka makũmĩ atanu, obuli mundu oyo wingira oko mũbĩrĩ, erikola omo Hema yʼerĩhĩndanamo.

³⁶Neryo abaganzawa kubo oko bĩtũnga byabo babya elfu ĩbĩrĩ nʼamagana alinda nʼamakũmĩ atanu (2,750).

³⁷Aba bo baganzawa omo bĩtũnga byʼAbakohatĩ, abosĩ abakolera omo Hema yʼerĩhĩndanamo, abo Musa na Harũnĩ baganza ngʼerihana lyʼOmwami Mukulu uku Musa.

³⁸Neryo abandu abaganzawa oko bagala ba Gerĩsonĩ, ebĩtũnga byabo, nʼoko bĩtũnga byʼabotata wabo,

³⁹erĩtsũka oko myaka makũmĩ asatu nʼabakulu kwʼaho, erĩhĩka oko myaka makũmĩ atanu, obuli mundu oyukingira oko mũbĩrĩ, erikola omũbĩrĩ omo Hema yʼerĩhĩndanamo.

⁴⁰Neryo abandu baganzawa kubo, oko bĩtũnga byabo, nʼoko bĩtũnga byʼabotata wabo, babya elfu ĩbĩrĩ nʼamagana ndatu nʼamakũmĩ asatu (2,630).

⁴¹Aba bo baganzawa abʼebĩtũnga byʼabagala ba Gerĩsonĩ, abosĩ abakolera omo Hema yʼerĩhĩndanamo, abo Musa na Harũnĩ baganza ngʼerihana lyʼOmwami Mukulu.

⁴²Neryo abandu abaganzawa abʼebĩtũnga byʼabagala ba Merarĩ, oko bĩtũnga byabo, nʼoko bĩtũnga byʼabotata wabo,

⁴³erĩtsũka oko myaka makũmĩ asatu nʼabakulu kwʼaho erĩhĩka oko myaka makũmĩ atanu, obuli mundu oyo wingira oko mũbĩrĩ, erikola omũbĩrĩ omo Hema yʼerĩhĩndanamo,

⁴⁴abo bo baganzawa kubo oko bĩtũnga byabo, babya elfu ĩsatu nʼamagana abiri (3,200).

⁴⁵Aba bo baganzawa omo bihanda byʼabagala ba Merarĩ, abo Musa na Harũnĩ baganza ngʼerihana lyʼOmwami Mukulu uku Musa.

⁴⁶Abosĩ abaganzawa bʼAbalawĩ, abo Musa na Harũnĩ nʼabakulu ba Ĩsraelĩ baganza, oko bĩtũnga byabo, nʼoko bĩtũnga byʼabotata wabo,

⁴⁷erĩtsũka emyaka makũmĩ asatu nʼerĩhĩka oko myaka makũmĩ atanu, obuli mundu oyo wingira erikola omũbĩrĩ, omũbĩrĩ wʼeriheka emiheke omo Hema yʼerĩhĩndanamo,

⁴⁸abo baganzawa kubo, babya elfu munani nʼamagana atanu nʼamakũmĩ munani (8,580).

⁴⁹Ngʼerihana lyʼOmwami Mukulu uku Musa, mobaganzwa, obuli mundu ngʼomũbĩrĩ wuwe, nʼakandi ngʼeriheka liwe. Neryo aba ko babya bandu buwe batya, ngoko Mwami Mukulu ahana Musa.