Read nande Mĩka 1 Bible Online

Mĩka 1 - nande bible

Mĩka 1

¹Ekĩnywa kyʼOmwami Mukulu ekyahĩka uku Mĩka Omũmorasĩtĩ omo biro bya Yotama, Ahazĩ, na Hezekĩa, abami bʼeYũda, ekyo alangira omo nzolĩ busana nʼeSamarĩa nʼeYerũsalema.

²Ĩnywe bihanda, ĩnywe bosĩ, mowe! Uwe kihugo nʼebyosĩ birimo uhulikirire, kandi Omukama, Omwami Mukulu abye mũlangĩrĩ busana nenyũ, Omukama omo Hekalũ yiwe ĩbũyĩrĩre.

³Kusangwa, lebaya, Omwami Mukulu akalũa aho wuwe, akandiandagala, nʼeriryatanga oko hʼendata hʼekihugo.

⁴Nʼebitwa byasyasendekererĩbwa eyĩkwa ukwʼiye, nʼemisya yasyatulika, ngʼekisese ahali omuliro, ngʼamagetsi awakũtawa erisendera omo ngwangwa.

⁵Busana nʼerĩhalya lya Yakobo ko liri ritya, na busana nʼebibi byʼekihanda kya Ĩsraelĩ. Erĩhalya lya Yakobo ni ryahi kwehĩ? Si ye Samarĩa kwehĩ? Nʼahendata hʼeYũda ni hayi kwehĩ? Si ye Yerũsalema kwehĩ?

⁶Busana nʼekyo nasyayira eSamarĩa ngʼekilundo kyʼekĩma omo bwerere kandi ngʼahʼerihera amalima wʼebĩnyũ. Nasyũtũlĩra amabwe wako omo musya, nasyakunula ebibanza byako.

⁷Nʼesyosanamu siwe syosĩ esĩbatsĩre syasyatulangwa mo bihande bihande, nʼebihembo byage byasyahĩsĩbwa omo muliro, kandi nasyatsandya esyosanamu syago syosĩ; kusangwa abirikuma-kumasyo oko luhembo lʼomũmalaya, nasyo Syasyasuba oko luhembo lʼomũmalaya.

⁸Busana nʼekĩ nasyalira nʼerĩsũsũmana; nasyagenda butsira kiryato nʼendũmbũ; nasyalira ngʼesyoboha, nʼerĩsũsũmana ngʼesyombũnĩ.

⁹Kusangwa ebironda byago sibyangatoka erĩlamĩbwa; kusangwa byabĩrĩhĩka eYũda; bĩkahĩka oko lũkyo lwʼabandu bage, erĩhĩka eYerũsalema.

¹⁰Sĩmũtũlego eGatĩ, simulire nʼahake. EBetĩ-leafũra ũyĩkũmbagalaye omo lũtũtũ.

¹¹Uwe ndũlanĩ yʼeSafĩrĩ, Ulabe omo ndũmbũ nʼomwʼĩsonĩ. Endũlanĩ yʼeZanana sialibala. Ekiriro kyʼeBetĩ-ezelĩ, asyakũlũsyako omwanya wʼerihanganamo.

¹²Kusangwa endũlanĩ yʼeMarotĩ ikalinda ebibuya omwʼisweka kusangwa ekibi kĩkalũa oko Mwami Mukulu kĩkahĩka oko lũkyo lwʼeYerũsalema.

¹³Uwe ndũlanĩ yʼeLakĩsĩ, Ubohe egalĩ oko sabayĩrĩ ĩbĩrĩ; iye abya nzũko yʼebibi busana nʼomwali wʼeSĩonĩ; kusangwa amalolo wʼerihona lya Ĩsraelĩ abanika omwisi syawe.

¹⁴Busana nʼekyo wasyaha busana na Moresetĩ-gatĩ oluhembo lwʼerilagana; ebĩtũnga bya Akĩzĩbũ byasyabya kindu kyʼeriteba busana nʼabami ba Ĩsraelĩ.

¹⁵Uwe ndũlanĩ yʼeMaresa, nyinemwendisyakuletera oyo wasyakũsĩgalya; olukengerwa lwa Ĩsraelĩ lwasyingira eAdũlamũ.

¹⁶Ũyĩhĩre kwʼoluhala, ugembe esyonzwiri syawe busana nʼabana abakakũtsemesaya; Ũkanyaye oluhala lwawe ngʼerĩsamba; kusangwa basyaya omo bunyegwa erĩlũa ukʼuwe.