Read nande Mĩka 3 Bible Online

Mĩka 3 - nande bible

Mĩka 3

¹Neryo monabũga nyiti, Ĩnywe bakulu ba Yakobo, nʼabatabalĩ bʼekĩtũnga kya Ĩsraelĩ, muhulikirire. Ĩnywe simwangaminya erĩbanza litunganene kwehĩ?

²ĩnywe mukagalirawa oko bibuya, imukanza ebibi; mũkapũra kubo esyongoba syabo, mũkabũna amakũha wabo.

³Imukalya nibya emĩnyokũ yʼabandu bage, nʼeribongola esyongoba syʼabandu bage, nʼeritulanga amakũha wabo; nʼerĩtsũtsangago mo bihindi bihindi, ngʼomo nyungu, ngʼesĩswĩ omo nyungu.

⁴Neryo basyalakira Omwami Mukulu, nĩkwa siendisyasũbĩryabo; ega, oko mugulu oyo asyabĩsabo obũsũ buwe, kusangwa babirikola emĩbĩrĩ mibi.

⁵Omwami Mukulu akabũga busana nʼabamĩnyererĩ abakatalaya abandu bage! Omugulu bawite ekindu kyʼerirya, bakabirikira bati, Obuholo; nʼoyũtehĩra akalyo omo buno bwabo, abakamũtegekanĩraya amalwa.

⁶Busana nʼekyo kyasyabya ekiro busana nenyũ, imutalangira ekindu, bwasyĩra ũkwʼĩnywe, imutaminyerera. Eryuba lyasyalenga busana nʼabamĩnyererĩ, nʼeritungi lyasyĩra kubo.

⁷Abahanĩ basyahemulwa, nʼabalagũlĩ basyakwa esĩsonĩ; ega, abosĩ basyaswika obuno bwabo; kusangwa Nyamuhanga sĩalĩsũbĩrayabo.

⁸Nĩkwa ĩngye nyoswĩre nʼamaka, nyoswĩre nʼOmũlĩmũ wʼOmwami Mukulu, nʼerĩbanza, nʼobulume-lume erĩtũlĩra Yakobo amalolo wuwe na Ĩsraelĩ ebibi biwe.

⁹Neryo, mowe ekĩ, ĩnywe bakulu bʼekĩtũnga kya Yakobo, nʼĩnywe batabalĩ bʼekĩtũnga kya Ĩsraelĩ abakakwa erĩbanza lyʼekwenene lyʼesyonye, nʼerĩhengemya ebitunganene byosĩ.

¹⁰Bakahĩmba eSĩonĩ omo musasi, nʼeYerũsalema omo mwaga ahate erĩbanza litunganene.

¹¹Abasondolĩ bako bakatswera busana nʼerihembwa, nʼabahererĩ bako bakakangĩrĩraya busana nʼobũhĩngĩ, nʼabamĩnyererĩ bako bakalagula busana nʼesyofranka. Nĩkwa bakayegemeraya oko Mwami Mukulu, bakabũga bati, Omwami Mukulu siali omo katĩkatĩ ketu kwehĩ? Erĩkwa siryendĩsyatũhĩkako.

¹²Neryo busana nenyũ, eSĩonĩ yasyakwangurwa ngʼeririma, nʼeYerũsalema yasyabya ngʼekĩhĩnga, nʼekitwa kyʼenyũmba yʼeHekalũ kyasyabya ngʼahʼendata hʼomũsĩtũ.