Read nande Mĩka 4 Bible Online

Mĩka 4 - nande bible

Mĩka 4

¹Nĩkwa oko biro byʼenyũma ebyasyabya, ekitwa kyʼenyũmba yʼOmwami Mukulu kyasyahanganĩbwa ngʼekikulu kyʼebitwa, kyasyasumbwa endata oko hitwa; nʼebihanda byasyaya kukyo.

²Nʼebihanda bingi byasyasa nʼerĩbũga biti, Mwase tuhetukire oko kitwa kyʼOmwami Mukulu nʼoko nyũmba ya Nyamuhanga wa Yakobo, naye asyatũkangĩrĩrya esyonzira siwe, netu twasyalendera omo syombalu siwe. Kusangwa ebihano byasyasira eSĩonĩ, nʼekĩnywa kyʼOmwami Mukulu kyasyahuluka eYerũsalema.

³Naye asyatswera omo katĩkatĩ kʼebihanda bingi, nʼerĩtwa esyombanza busana nʼebihanda byʼamaka ebiri ehali. Nabo basyahesa emĩyalĩ yabo mwʼesĩsũka, nʼamatũmo wabo mo bisara; ekihanda sikyendisyasumba omũyalĩ erilwa nʼekindi kihanda, kutse sibendisyaswiga amalwa.

⁴Nĩkwa obuli mundu asyĩkala oko ndĩna yʼomũlĩkĩ wuwe wʼebĩnyũ nʼomo ndĩna yʼomũtĩnĩ wuwe; kandi sihali oyo wasyũbahyabo; kusangwa obuno bʼOmwami Mukulu Wʼemilondo bwabĩrĩbũgakyo.

⁵Kusangwa ebihanda byosĩ byasyalendera obuli mundu oko lĩna lya nyamuhanga wuwe; netu twasyalendera kera na kera omo lĩna lyʼOmwami Mukulu Nyamuhanga wetu.

⁶Omwami Mukulu ati, Oko kiro ekyo, nasyahĩndanĩa abakatsokondaya, kandi nasyahĩndanĩa oyo wahigawa, nʼoyo nagalaya.

⁷Nasyayira oyũkatsokondaya eribya basĩgalira, nʼoyo wahigawa eribya ekihanda kyʼamaka; nʼOmwami Mukulu asyatabalirabo oko kitwa kyʼeSĩonĩ erĩtsũka lino erĩhĩka kera na kera.

⁸Nĩkwa uwe musunguliko wʼekihangulo, uwe katwa ka mwali wʼeSĩonĩ kyasyakũhĩkako, ega, eritabala lyʼerĩmbere lyasyasa, bo bwami bwʼomwali wʼeYerũsalema.

⁹Na lino ukalaka busana nakĩ kwehĩ? Ewawe siri mwami kwehĩ? Kutse omũhanĩ wawe abirihera ati? Eriluma lyabirikuhamba ngʼomũkalĩ oyukakunda kwehĩ?

¹⁰Uwe mwali wʼeSĩonĩ wagalawe, ukunde busana nʼeributa, ngʼomũkalĩ kwʼakakunda; kusangwa lino ũkandĩlũa omo mũyĩ, Wasyĩkala omo kisuki, wasyahĩka eBabelĩ. Eyo wasyalamĩbwa; eyo Omwami Mukulu asyakũtongolya omo byala byʼesyonzĩgũ syawe.

¹¹Na lino ebihanda bingi byabĩrĩhĩndana busana nʼerilwa nawe, bakabũga bati, Atsandĩbawe, nʼameso wetu asamalire eSĩonĩ.

¹²Nĩkwa sĩbasĩ amalengekanĩa wʼOmwami Mukulu, kandi sibaliminya erĩyĩsũnza liwe; kusangwa abĩrĩhĩndanĩabo ngʼemiganda oko kĩhũmbĩro.

¹³Uwe mwali wʼeSĩonĩ, uhangane ũhũmbe; kusangwa nasyayira erĩhembe lyawe mo kyuma, kandi nasyayira ebigere byawe mo miringa; kandi iwatoka erĩtsũtsanga ebihanda bingi mo bitswebitswe; iwatoka eriha Omwami Mukulu endũndĩ yabo nyibi, nʼobũsokĩ bwabo oko Mukama wʼekihugo kyosĩ.