Read nande Mĩka 5 Bible Online

Mĩka 5 - nande bible

Mĩka 5

¹Uwe mwali wʼemilondo, lino uyitondeke omo milondo; babiritugotera omo malwa; omo mũtso basyaswĩrya omũtswerĩ wa Ĩsraelĩ oko matema.

²Nĩkwa uwe Betelehemũ-Efurata, oyuli muke eribya omo katĩkatĩ kʼamaelfu wʼeYũda, umʼuwe mwasyahuluka omuguma busana nage oyo wasyabya mũtabalĩ omo Ĩsraelĩ, erihuluka liwe litula kera oko migulu ya kera na kera.

³Busana nʼekyo asyalekabo erĩhĩka oko mugulu oyo, oyukakunda amabibuta omwana, neryo abasĩgalira bʼoko bagala babo basyasuba oko bana ba Ĩsraelĩ.

⁴Naye asyahangana, asyalĩsya ekihangulo kiwe omo maka wʼOmwami Mukulu, omo lukengerwa lwʼerĩna lyʼOmwami Mukulu Nyamuhanga wuwe. Nabo basyĩkalaho; kusangwa oko mugulu oyo asyabya mukulu erĩhĩka oko syondũlĩ syʼekihugo.

⁵Omwami Mukulu asyabya buholo bwetu. Omugulu Omũsũrĩa asyabya akasa omo kihugo kyetu, nʼomugulu asyalyatangirira ebikali byetu, neryo twasyamũhanganĩrya abalĩsya balinda nʼabandu bakulu munani.

⁶Nabo basyaherya ekihugo kyʼeAsũrĩa omo mũyalĩ, nʼekihugo kya Nĩmũrodĩ omo bwingiriro bwakyo. Omwami Mukulu asyatũlamya oko Mũasũrĩa, omugulu akalwa nʼekihugo kyetu, nʼomugulu akalyatanga emitano yetu.

⁷Neryo abasĩgalira uku Yakobo basyabya omo katĩkatĩ kʼabandu ngʼekimi ekĩkalũa oko Mwami Mukulu ngʼembũla oko biti ebiterinda omundu, kutse eriamala oko bagala bʼabandu.

⁸Nʼabasĩgalira uku Yakobo basyabya omo katĩkatĩ kʼebihanda, nʼomo katĩkatĩ kʼabandu bangi, ngʼendale omo katĩkatĩ kʼesyonyama syʼomolĩ, ngʼekyana kyʼendale omo katĩkatĩ kʼebihangulo byʼesyombũlĩ; nayo yamalabamo, ikalyatangirira ahisi, nʼeritulanga-tulanga mo bihande bihande, isihali oyo wangabala.

⁹Ebyala byawe byasyasumbwa erilwa nʼesyonzĩgũ syawe, nʼesyonzĩgũ syawe syosĩ syasyalĩgwa.

¹⁰Neryo Omwami Mukulu ati, Oko kiro ekyo, nasyabuga esyosabayĩrĩ syawe omo katĩkatĩ kawe, kandi nasyaherya esyogalĩ syawe.

¹¹Nasyaherya emĩyĩ yʼekihugo kyawe, nasyaterya ahakongotere hawe hosĩ.

¹²Nasyaherya obũkũmũ erĩlũa omo byala byawe; nawe siwendisyaswabya nʼabalagũlĩ.

¹³Kandi nasyaherya esyosanamu syawe esĩbatsĩre nʼesyondũyĩ syawe omo katĩkatĩ kawe; kandi sĩwendĩsyaswaramya emĩbĩrĩ yʼebyala byawe.

¹⁴Kandi nasyakula esyosanamu sya Asera omo katĩkatĩ kawe; kandi nasyaherya emĩyĩ yawe.

¹⁵Kandi nasyaberererya erĩkĩsya omwʼihitana nʼomwʼigalirwa oko bihanda ebyo ebĩtyowa.