Read nande Mĩka 7 Bible Online

Mĩka 7 - nande bible

Mĩka 7

¹Obũlĩge ũkwʼĩngye! Kusangwa nyiri ngʼabandu abakoha ebĩgũma byʼomugulu wʼekirimo, nʼabakoha ebĩnyũ; sihali kĩkũto kyʼebĩnyũ kyʼerirya, kutse ekĩgũma ekĩkatsũka eriera kyʼomũtĩnĩ ekyo nyanzĩre.

²Oyukakenga Nyamuhanga abirihwerekerera omo kihugo, kandi sihali oyutunganene omo katĩkatĩ kʼabandu. Abosĩ bakalĩmbaya omusasi; obuli mundu akasonda-sondaya mugala wabo yʼomo butimba.

³Busana nʼebibi, ebyala bibiri byosĩ bikakolabyo nabi. Omunya-mwami akabũlaya, nʼomũtswerĩ nibya busana nʼekyũtũlĩro; nʼomundu mukulu akabũga erisonda lyʼekĩrĩmũ kiwe; ko bakalukakyo batya haguma.

⁴Omundu mubuya wabo ali ngʼamahwa; omutunganene kwilaba, ali ngʼekikunda kyʼemisakisaki. Ekiro Wasyahĩra omũteya eritswera lyawe lyasyahĩka; erĩhũka-hũka lyʼomutima lyasyahĩka kubo.

⁵Suyiketere omũlĩkyenyũ, suyiketere omwĩra wawe. Ũtegaye emĩnywa yawe oko mũkalĩ oyukagotsera oko kĩkũba kyawe.

⁶Kusangwa omugala akahemula tata wuwe, na mwali akahangana erilwa na nyĩnya wuwe, na mwalyana akalwa na nyĩnyĩbyala; esyonzĩgũ syʼomundu ba bandu bʼekĩtũnga kiwe.

⁷Nĩkwa ĩngye, nasyalinda Omwami Mukulu nʼomũhwa, nasyalindirira Nyamuhanga wʼerilama lyage. Nyamuhanga wage asyanyowa.

⁸Uwe enzĩgũ yage, Sunyitsemere; nomo nangawa, nasyahangana; omugulu ngĩkala omo mwĩrĩmya, Omwami Mukulu asyabya kyakakala busana nage.

⁹Nasyaheka erihitana lyʼOmwami Mukulu, kusangwa nabĩrĩmũhalyako, erĩhĩka aho asyahanganira omwatsi wage, nʼerĩhĩka aho asyaberererya erĩbanza busana nage. Asyanyĩhũlũkĩrya eyĩhya omo kyakakala, nage nasyasamalira eritunganene riwe.

¹⁰Neryo enzĩgũ yage yasyasamalirakyo, nʼesĩsonĩ syasyaswika oyo wambwira ati, Omwami Mukulu, Nyamuhanga wawe, ali hahi kwehĩ? Ameso wage asyasamalira; nayo yasyalyatangirirwa ngʼolondo lwʼenzira.

¹¹Kyasyabya kiro kyʼerĩhĩmba esyombĩmbo syawe. Oko kiro ekyo omutano wawe asyasegerĩbwa eribya muli.

¹²Oko kiro ekyo basyakũhĩkako bakalũa eAsũrĩa, nʼemĩyĩ yʼeMĩsĩrĩ, erĩlũa eMĩsĩrĩ nʼerĩhĩka oko Lũsĩ lwʼeEfurata, nʼerĩlũa oko ngetsi, nʼerĩhĩka oko yindi, nʼerĩlũa oko kitwa nʼokokindi.

¹³Nʼekihugokyasyabyakĩma, busana nʼabĩkalanĩ ba mukyo, busana nʼemikolere yʼemĩbĩrĩ yabo.

¹⁴Ũlĩsaye abandu bawe omo mũtso wawe wʼobwami, ekihangulo kyʼomwandu wawe, abĩkere aho wabo omo mũsĩtũ, omo katĩkatĩ kʼeririma lĩbogĩre, balye eBasanĩ nʼeGĩleadĩ, ngʼomo biro bya kera.

¹⁵Ngʼebiro ebyo mwalũa omo kihugo kyʼeMĩsĩrĩ, nasyabakangya ebitiko-tiko.

¹⁶Ebihanda byasyalangira nʼerihemuka busana nʼamaka wabo gosĩ; basyahĩra ebyala byabo oko muno wabo; amatwĩ wabo asyabya bitsiha.

¹⁷Basyalyatsirira olũtũtũ ngʼenzoka, ngʼesyonzoka syʼekitaka. Basyahuluka nʼerititimana bakalũa omo hakongotere habo; basyasa oko Mwami Mukulu Nyamuhanga wetu nʼobuba, basyubaha embere syawe.

¹⁸Nindi yo Nyamuhanga nga we, oyukabuyira ebibi, nʼerikiruka okwʼihona lyʼamasĩgalira wʼabandu buwe kwehĩ? Sialibika erihitana liwe kera na kera, kusangwa akatsemera obubuya bʼolwanzo.

¹⁹Akandisyaswatuganyira; asyalyatangirira ebibi byetu omwisi wʼebisando; ega, wasyagusa ebibi byabo byosĩ omo mitobero yʼengetsi.

²⁰Wasyaha ekwenene uku Yakobo, nʼobubuya bʼolwanzo uku Abrahamũ, ebyo walahĩrĩraya ukwʼabo tata wetu erĩtsũka oko biro bya kera.