Read nande Nahũmũ 1 Bible Online

Nahũmũ 1 - nande bible

Nahũmũ 1

¹Enzumwa yʼeNĩnawe. Ekitabu kyʼesyonzolĩ sya Nahũmũ Omũelkosĩ.

²Omwami Mukulu ni Nyamuhanga wʼobũha nʼowʼerĩkĩsya; Omwami Mukulu akakĩsaya, kandi ni wʼerihitana. Omwami Mukulu akakĩsaya esyonzĩgũ siwe, kandi akabikira esyonzĩgũ siwe eryagalirwa.

³Omwami Mukulu syalihitana lũba; ni wʼobũtokĩ bunene; Omwami Mukulu sĩendĩsyalekeranĩa eritindasuyira abʼomusango. Omwami Mukulu awite enzira yiwe omo kanyabungu nʼomo mutunzi, nʼebĩtũ nĩ lũtũtũ lwʼebisando biwe.

⁴Akakunga engetsi, ĩnĩũmyayo, akũmaya esyonyũsĩ syosĩ. EBasanĩ yatsekemene, nʼeKaramelĩ: obũsoyo bwʼeLebanonĩ bukatsekemana.

⁵Ebitwa bikatitimana embere siwe, nʼehitwa hĩkanũna; nʼekitaka kikayisumba busana nʼameso wuwe, ega, ekihugo kyosĩ, nʼesyondũlanĩ syosĩ sya mukyo.

⁶Nindi wangatoka erihangana embere wʼerihitana liwe kwehĩ? Kandi nindi wangatoka erĩĩkala omo bukali bwʼerihitana liwe kwehĩ? Erihitana liwe lĩkũtũkala ngʼomuliro, nʼamabwe akatulawa naye.

⁷Omwami Mukulu ni mubuya, ni hakongotere omo kiro kyʼomwaga; kandi anasĩ abakamusagirako.

⁸Nĩkwa omwʼigunga lyʼeribwaga asyabuga abakalwa naye, kandi asyahigira esyonzĩgũ siwe omo mwĩrĩmya.

⁹Ebyosĩ mũkayĩsũnza erilwa nʼOmwami Mukulu, asyasĩngabyo ndeke. Obũlĩge sibwendisyahangana engendo yʼakabiri.

¹⁰Kusangwa ngʼemisakisaki ĩyĩgobenĩe haguma, kandi ngʼabandu babĩrĩkũnda omwʼĩlũmba lyabo, basyaherĩbwa kutsibu ngʼesyombuba syũmĩre.

¹¹Hali muguma oyukahuluka akalũa ewenyũ, oyo wabiritegekera ebibi oko Mwami Mukulu, Oyukahana erĩtobo.

¹²Omwami Mukulu ati, Nomo bangabya nʼamaka gosĩ, nomo bangabya bangi, neryo bine bitya basyatwĩrwa ahisi, kandi basyalenga. Nomo nabĩrĩkwagalya, sĩndĩendĩsyaswakwagalya kandi.

¹³Na lino ngandĩbũna engomo yiwe ĩkũlũeko, kandi nasyakũlũsya kwʼemĩrĩkĩ yawe.

¹⁴NʼOmwami Mukulu abirihamula busana nawe, erĩna lyawe siryendisyaswakota. Nasyatwa esanamu eyĩbatsĩre nʼesanamu yʼerĩnũnĩa ĩlũe omo nyũmba yʼesyonyamuhanga syawe; nasyakokotya eyisinda yawe, kusangwa uli nye.

¹⁵Lebaya, oko bitwa ebisando byʼoyukaleta engulu yowene, oyũkakũmayĩraya Obuholo! Uwe Yũda, ulye ũtegaye ebiro bikulu byawe; Ũberereraye amalahĩryo wawe. Kusangwa omundu mubi oyo siendisyaswalaba ukʼuwe; abĩrĩtũbwa kutsibu.