Read nande Habakũkĩ 1 Bible Online

Habakũkĩ 1 - nande bible

Habakũkĩ 1

¹Eriminyerera eryo mũmĩnyererĩ Habakũkĩ alangira.

²Uwe Mwami Mukulu, nasyakolyahi ngalira busana nʼerĩwatĩkĩbwa, nawe sulisonda erĩowa kwehĩ? Ngakulakira nyiti, Omwaga! nĩkwa sũlĩlamaya.

³Busana nakĩ ukaleka inalangira ebibi, nʼerisamalira obubi kwehĩ? Ega, obũherya nʼomwaga biri embere syage; kandi hali amalwa, nʼerinegena bikahuluka.

⁴Busana nʼekyo, emigambo ikaponawa, nʼerĩbanza siryebanika; kusangwa ababi bakatĩmba oko batunganene; busana nʼekyo erĩbanza likahuluka ĩrĩnahengemĩre.

⁵Mũlebaye omo katĩkatĩ kʼebihanda! Musamalire! Musweke! Nʼerisweka! Kusangwa ngakola omũbĩrĩ omo biro byenyũ, ogo mute mwangĩkĩrĩrya nomo mwangabwirwago.

⁶Kusangwa lebaya, ngahanganaya Abakaldea, ekihanda kĩkalĩre ekyangũhĩre ekikalaba omo katĩkatĩ kʼekihugo, erĩhũnga ahʼerĩĩkala ahate aho wabo.

⁷Ibo nĩ bʼerĩũbahya nʼerisagwa; erĩbanza lyabo nʼehamũlĩ yabo bĩkalũa kubo ĩbobene.

⁸Esyosabayĩrĩ syabo syangũhĩre kwilaba esyosoro, nasyo sĩkalĩre kwilaba esyombwa syʼomolĩ esyʼerĩgologolo; nʼabakagenda oko syosabayĩrĩ bakatibita lũba; ega, abakagenda oko syosabayĩrĩ bakalũa ehali; bakaguluka ngʼerĩsamba erikanguha eriyigusa okwʼirya.

⁹Abosĩ bakasira omwaga; bakahanda amũsũ wabo mangi erĩlolyago embere; kandi bakakuma-kuma abanyegwa ngʼemisege.

¹⁰Ega, bakaseka abami, nʼabakulu, ni kindu kyʼerisekwa busana nabo. Bakaseka obuli hakongotere; kusangwa bakahĩndanaya olũtũtũ mo bilundo busana nʼerĩhũngaho.

¹¹Neryo bakalaba ngʼerihunga nʼerilaba embere. Nĩkwa basyabanika kʼomusango, abakayira amaka wabo mo nyamuhanga wabo.

¹²Uwe Mwami Mukulu, Nyamuhanga wage, Oyũbũyĩrĩre wage, suli Wʼerikota kwehĩ? Sitwendisyahola. Uwe Mwami Mukulu, wabirihamulirabo omũbĩrĩ wʼeritswera; kandi nawe, uwe Lukuka, wabĩrĩhanganĩabo busana nʼerihabula.

¹³Uwite ameso awatũkwĩre awate angatoka erĩrĩga ebibi. Kandi siwangatoka erisamalira esyongĩyĩnĩ syo ndeke, busana nakĩ ukatungerera abakakola Obũgobya nʼerĩsĩma kwehĩ? Busana nakĩ ukahuna omugulu ababi bakamera abandu batunganene kwilababo kwehĩ?

¹⁴Busana nakĩ ukayira abandu ngʼamahere wʼomo ngetsi, ngʼebindu ebikakululuka, ebitawite Oyukatabala kubyo kwehĩ?

¹⁵Abanya Kaldea bakasumbabo abosĩ omo burobo, nʼerihekabo omo kĩsohĩ kyabo, nʼerĩhĩndanĩabo omo kĩsohĩ kyabo. Busana nʼekyo bakatsema nʼeritsanga.

¹⁶Busana nʼekyo, bakaherera obutimba bwabo bʼobuhere. Nʼerĩhĩsĩrĩrya ekĩsohĩ kyabo kyʼamahere kyʼobukwa; kusangwa busana nʼemyatsi eyĩ, bakahamba amahere mangi, nʼakalyo kabo katswagĩre.

¹⁷Neryo basyalũsya ebiri omo butaha-taha bwabo, nʼerĩĩta ebihanda emigulu yosĩ, butsira erĩbalyabo kwehĩ?