Read nande Zefania 2 Bible Online

Zefania 2 - nande bible

Zefania 2

¹Uwe kihanda kite nʼesĩsonĩ, mũyĩhĩndanaye haguma, ega mũhĩndane haguma;

²ekihano kite kyabererera, ekiro kikalaba ngʼomusunga, embere wʼerihitana lĩkalĩre lyʼOmwami Mukulu lite lyabahĩkako, embere wʼekiro kyʼerihitana lyʼOmwami Mukulu lite lyabahĩkako.

³Mũsondaye Omwami Mukulu, ĩnywe bosĩ bʼekihugo abakayĩkehaya, ĩnywe mwabirikola erĩbanza liwe; mũsondaye eritunganene, mũsondaye obũyĩkehyo; kwamũhwa mwasyabĩswa oko kiro kyʼerihitana lyʼOmwami Mukulu.

⁴Kusangwa eGaza yasyasĩganĩbwa, nʼeAskelonĩ yasyabya kĩma; eAsĩdodĩ yasyahigwa omwʼitungi, nʼeEkronĩ yasyakowa.

⁵Obũlĩge oko syondũlanĩ oko mũsĩke wʼengetsi, kyo kihanda kyʼAbakeretĩ! Ekĩnywa kyʼOmwami Mukulu kikalwa nawe, uwe Kanana, ekihugo kyʼAbafĩlĩstĩnĩ; nasyakũherya, isihendisyabya ndũlanĩ.

⁶Neryo omũsĩke wʼengetsi asyabya lũlĩsĩryo, nʼebiharo busana nʼabalĩsya, nʼebĩyĩte busana nʼebihangulo byʼesyombũlĩ.

⁷Nʼomũsĩke wʼengetsi asyabya busana nʼabasĩgala oko kĩtũnga kya Yũda; basyalĩsĩrya kugo ebihangulo byabo. Basyagotsera omwʼĩgolo-golo omo manyũmba wʼeAskelonĩ; kusangwa Omwami Mukulu, Nyamuhanga wabo asyalemberabo, nʼerĩsũbyabo buholo.

⁸Nabĩrĩowa eritsuma lya Moabũ, nʼebĩtsũmĩ byʼabana ba Amona, ebyo batsumamo abandu bage, nʼerĩyĩhamya eriyira omwaga busana nʼekihugo kyabo.

⁹Omwami Mukulu Wʼemilondo, Nyamuhanga wa Ĩsraelĩ akabũga ati, Neryo ngoko nyiriho, kwenene Moabũ asyabya ngʼeSodomo, nʼabana ba Amona ngʼeGomora, ahali ekyatsinge nʼebĩho byʼomũnyũ, nʼekĩma kyʼemigulu yosĩ; abakasĩgala oko bandu bage basyahũngabo, nʼabakasĩgala abʼoko kihanda kyage basyasĩgalyabo.

¹⁰Ebĩ byo basyabana busana nʼeriyiheka lyabo, kusangwa babiritsuma nʼerĩyĩhamya busana nʼabandu bʼOmwami Mukulu Wʼemilondo.

¹¹Omwami Mukulu asyabya wʼerĩũbahya kubo, kusangwa asyabondya esyonyamuhanga syosĩ syʼekihugo omo nzala; nʼabandu bosĩ bʼebihanda ebiri oko mũsĩke wʼengetsi basyamũramya, obuli mundu aho ali.

¹²Ĩnywe Abaetĩopĩa nibya mwasyĩtwa omo mũyalĩ wage.

¹³Kandi Omwami Mukulu asyalolya ebyala biwe erilwa nʼelutambi lwʼendata, nʼerĩherya eAsũrĩa. Kandi asyayira eNĩnawe mo kĩma, nʼeriuma ngʼembwarara.

¹⁴Nʼebihangulo byasyabundama omo katĩkatĩ kago, nʼesyonyama syosĩ syʼemihanda mihanda omo bihangulo; omũrobĩ nʼendĩko byasyagotsera oko mitwe-mitwe yʼesyondũyĩ syago. Esyonyonyũ syasyimbira omo maseryo; omulala asyabya omo kyaswa kyʼesyongyo; kusangwa abiriswikula omũbĩrĩ wʼemĩerezĩ.

¹⁵Oyũ nĩ mũyĩ wʼobutseme owĩkere buholo, owakabũga omo mutima wago ati, Nyineho, kandi sihali ogundi butsira ngye. Nago abiribya kĩma ati, aho esyonyama sikabundama! Obuli mundu oyukalaba aho ali asyasyolya ati, Esss, nʼerĩtsĩngya ebyala biwe eriponago.