Read nande Zefania 3 Bible Online

Zefania 3 - nande bible

Zefania 3

¹Obũlĩge ukwʼoyukahona nʼerĩyĩtsandya! Oko mũyĩ owakanũbaya!

²Mwatakenga omulenge nʼomuguma; mwatalĩga erĩkangĩrĩrya; mwatayiketera Omwami Mukulu; mwatayĩtũnda hakũhĩ na Nyamuhanga wuwe.

³Abanya-mwami buwe abali omo katĩkatĩ kago ni ndale esikaruruma; abatswerĩ bago ni mbwa syʼomolĩ syʼerĩgolo-golo, sĩsyesĩganaya ekindu busana nʼengyakya-ngyakya.

⁴Abamĩnyererĩ buwe ni batya-batya nʼabandu batebya; abahererĩ buwe babĩrĩtsandya eHema ahabũyĩrĩre, babĩrĩhalya oko migambo.

⁵Omwami Mukulu omo katĩkatĩ kago ni mutunganene; siendisyakola ekite kyʼerĩbanza lyʼekwenene; obuli ngyakya akaleta erĩbanza litunganene liwe oko kyakakala, sialiusa; nĩkwa oyute wʼerĩbanza litunganene sĩasĩ esĩsonĩ.

⁶Nabĩrĩtĩnda ebihanda; amanyũmba wabo awayĩsũngũlĩkĩre nĩ bĩhũma. Nabiriyira esyonzira syabo mo kĩhũma, isihali mundu oyukalabaho; emĩyĩ yabo yabiriyirwa mo kĩma isihakiri mundu, isihakiri endũlanĩ.

⁷Monabũga nyiti, Kwenene wasyanyikenga; nʼerĩrĩga erĩkangĩrĩrya; litya erĩĩkala lyago siryendĩsyaherĩbwa, ngʼebyosĩ nabirihamula busana nayo; nĩkwa babya banzĩre erĩtsandya emĩbĩrĩ yabo yosĩ.

⁸Busana nʼekyo, Omwami Mukulu ati, Mundinde, busana nʼekiro ekyo omugulu nasyahangana oko buhiyi. Kwenene erĩyĩsũnza lyage nĩʼhĩndanĩa ebihanda, nʼerĩhĩndanĩa amami, erĩũtũlĩra kubo kwʼerihitana lyage, lye rihitana lyage erĩkahĩsaya; kusangwa ekihugo kyosĩ kyasyalibwa omo muliro wʼobũha bwage.

⁹Kusangwa oko mugulu oyo nasyaha ebihanda emĩnywa yerĩre, abosĩ batoke erilakira erĩna lyʼOmwami Mukulu, erimukolera nʼeriyisinga hagumaguma.

¹⁰Kusangwa erĩlũa eyisirya oko syonyũsĩ syʼeEtĩopĩa, abakanyĩramaya abapanzawa bage basyaleta amahere wage.

¹¹Oko kiro ekyo simwendisyahemulwa busana nʼemĩbĩrĩ yenyũ yosĩ, eyo mwanyihonako; kusangwa oko mugulu oyo nasyalũsya omo katĩkatĩ kenyũ abakayipipa nʼerĩyĩtsemesya benyũ, kandi siwendisyaswayĩhamya oko kitwa kyage kĩbũyĩrĩre.

¹²Nĩkwa nasyasĩga omo katĩkatĩ kenyũ abandu abakayĩkehaya nʼabandu bolo, kandi basyabana ahʼerisagira omo lĩna lyʼOmwami Mukulu.

¹³Neryo abasĩgalira ba Ĩsraelĩ sibendisyakola ebibi, kutse erĩbũga amabehĩ; kutse omo muno wabo simwendisyabanika olulimi lwʼeriteba; kusangwa basyalya nʼerigotsera, isihali oyo wasyatĩtĩmanĩabo.

¹⁴Uwe mwali wa Sĩonĩ, ugoromoke omo butseme! Uwe Ĩsraelĩ, Usumbe omulenge nʼerĩkĩnda! Uwe mwali wʼeYerũsalema, utseme, nʼerĩyĩsyandira nʼomutima wawe gosĩ!

¹⁵Omwami Mukulu abĩrĩlũsya esyombanza syawe, abirigusa esyonzĩgũ syawe syʼeyĩhya. Omwami wa Ĩsraelĩ, iye Omwami Mukulu, ali omo katĩkatĩ kawe; siwendisyasyubaha erĩkwa kandi.

¹⁶Oko kiro ekyo eYerũsalema asyabwirwa ambu, Uwe Sĩonĩ, Sigubahe; Suleke ebyala byawe bikoloba.

¹⁷Omwami Mukulu Nyamuhanga wawe ali omo katĩkatĩ kawe, omũlwĩ Oyũkakinda. Asyakutsemera nʼobutseme; asyabasũbya mo bahya-bahya omo lwanzo luwe; asyakutsemera nʼeriimba.

¹⁸Nasyahĩndanĩa abo abakakwa obũlĩge busana nʼebiro bikulu ebyahamulawa, mobyalũa ukʼuwe Sĩonĩ; esĩsonĩ syʼabasayĩ sĩrĩtohĩre kubo.

¹⁹Lebaya, oko mugulu oyo, nasyasoha nʼabosĩ abo abakakwagalaya; kandi nasyalamya oyũkatsokondaya, nʼerĩhĩndanĩa oyo wahigawa; nasyahindula esĩsonĩ syabo omwʼipipa nʼerĩkũmayirwa omo kihugo ekyo kyosĩ.

²⁰Omwami Mukulu ati, Nʼoko mugulu oyo nasyabaletamo, nʼoko mugulu oyo nasyabahĩndanĩa haguma; ega, nasyabaha olũkũmayiro nʼeripipwa omo katĩkatĩ kʼebihanda byosĩ byʼekihugo, omugulu nasyabasũbya kʼobuholo bwenyũ embere syʼameso wenyũ.