Read nande Zekarĩa 1 Bible Online

Zekarĩa 1 - nande bible

Zekarĩa 1

¹Oko mukera wʼomunani, oko mwaka wʼakabiri wa Darĩo, ekĩnywa kyʼOmwami Mukulu mokyasira uku Zekarĩa mugala wa Berekĩa, mugala wa Ĩdo, omũmĩnyererĩ kiti,

²Omwami Mukulu mwahitana kutsibu oko botata-kulu wenyũ.

³Busana nʼekĩ ubwirebo uti, Omwami Mukulu Wʼemilondo akabũga ati, Musube ũkwʼĩngye, Omwami Mukulu Wʼemilondo akabũga, nage nasyasuba ũkwʼĩnywe, Omwami Mukulu Wʼemilondo atya.

⁴Simubye ngʼabotata wenyũ, ababwirawa nʼabamĩnyererĩ bʼembere, bati, Omwami Mukulu Wʼemilondo akabũga ati, Musubule lino, erĩlũa omo syonzira syenyũ nyibi, nʼoko mĩbĩrĩ yenyũ mibi; nĩkwa mobatetowa kandi mobatetanyihulikirira, Omwami Mukulu akabũga.

⁵Abotata wenyũ bali hayi kwehĩ? Nʼabamĩnyererĩ, bakasyabya ibane biro byosĩ kwehĩ?

⁶Nĩkwa ebĩnywa byage nʼemigambo yage, eyo nalayira abagombe bage abamĩnyererĩ, mobĩtahĩka oko abotatakulu wenyũ kwehĩ? Neryo mobabinduka erireka ebibi bati, Ngoko Mwami Mukulu Wʼemilondo aganĩraya eritukola, ngʼesyonzira syetu ko siri, kandi ngʼemĩbĩrĩ yetu ko yiri, abiritukolera atya.

⁷Oko kiro kyʼamakũmĩ abiri nʼebini kyʼomukera wʼerĩkũmĩ nʼomuguma, go mukera Sebatĩ, omo mwaka wʼakabiri wa Darĩo, ekĩnywa kyʼOmwami Mukulu mokyahĩka uku Zekarĩa mugala wa Berekĩa, mugala wa Ĩdo, omũmĩnyererĩ, kiti,

⁸Monalangira omo kiro, neryo, lebaya, omundu iniakagenda oko sabayĩrĩ yʼengula, neryo mwahangana omo katĩkatĩ kʼemiti yʼemĩhandasĩ eyabya eyĩkwa; nʼenyũma siwe habya esyosabayĩrĩ, eyʼengula, nʼeyʼebitanga-bitanga, nʼeyʼenzeru.

⁹Neryo monabũga nyiti, Uwe mukama wage, esĩ nĩkĩ kwehĩ? Omũlaĩka oyo wakanaya nage mwambwira ati, Ngandĩkũkangya esĩ nga nĩkĩ.

¹⁰Neryo mundu oyo wahangana omo katĩkatĩ kʼemiti yʼemĩhandasĩ mwasũbĩrya ati, Esĩ bʼabo Mwami Mukulu abirituma erirendera eyĩ nʼeyĩ omo kihugo.

¹¹Nabo mobasũbĩrya omũlaĩka wʼOmwami Mukulu oyo wahangana omo katĩkatĩ kʼemiti yʼemĩhandasĩ, bati, Twabirirendera eyĩ nʼeyĩ omo kihugo, neryo lebaya, ekihugo kyosĩ kĩkere bũkũtũ, erĩtũlera.

¹²Neryo omũlaĩka wʼOmwami Mukulu mwabũga ati, Uwe Mwami Mukulu Wʼemilondo, erĩhĩka oko mugulu wahi siwendisyaganyira eYerũsalema nʼemĩyĩ yʼeYũda, eyo wahitanako emyaka amakũmĩ alinda eyĩ kwehĩ?

¹³Neryo Omwami Mukulu mwasũbĩrya omũlaĩka oyo wakanaya nage omo bĩnywa byowene ebyʼerĩkĩranĩa.

¹⁴Neryo omũlaĩka oyo wakanaya nage mwambwira ati, Ũtũlego, uti, Omwami Mukulu Wʼemilondo akabũga ati, Nyĩkwĩre obũha bo kutsibu busana nʼeYerũsalema na busana nʼeSĩonĩ.

¹⁵Nabirihitana kutsibu busana nʼebihanda ebĩkere bĩnatũlere, kusangwa monahitana hake, nabo mobakanyĩa erihera eryo.

¹⁶Busana nʼekyo, Omwami Mukulu ati, Nasyasuba eYerũsalema nʼeriganyira; enyũmba yage yasyahĩmbwa mugo, Omwami Mukulu Wʼemilondo atya, nʼolukoba lwʼerirenga lwasyakakĩbwa endata oko Yerũsalema.

¹⁷Mũtũlego kandi muti, Omwami Mukulu Wʼemilondo ati, Emĩyĩ yage yasyabwaga mʼomũyĩsa; Omwami Mukulu asyakĩranĩa eSĩonĩ kandi, asyayisoga eYerũsalema yo kandi.

¹⁸Neryo monasumba ameso wage, monalebya, neryo, lebaya, mohabya amahembe ani.

¹⁹Neryo monabwira omũlaĩka oyo wakanaya nage nyiti, Aya ni mahi kwehĩ? Naye mwanyĩsũbĩrya ati, Aya ni mahembe awapanza-panza Yũda, na Ĩsraelĩ, nʼeYerũsalema.

²⁰Neryo Omwami Mukulu mwanyĩkangya abanyima-nyima bani.

²¹Neryo monabũga nyiti, Aba bakasyakolakĩ kwehĩ? Naye mwabũga ati, Aya ni mahembe awapanza-panza Yũda, isihakiri mundu wangasumba omutwe wuwe; nĩkwa aba bamahĩka erĩũbahyabo nʼerĩterya amahembe wʼebihanda, ebyasumba amahembe wabyo erilwa nʼekihugo, kya Yũda eripanza-panzakyo.