Read nande Zekarĩa 10 Bible Online

Zekarĩa 10 - nande bible

Zekarĩa 10

¹Musabe Omwami Mukulu embũla oko mugulu wʼembũla yʼekirimo, Omwami Mukulu oyukahangika ebĩtũ byʼerĩpalya; naye asyahabo embũla, oko buli mundu ebyalya omwʼirima.

²Kusangwa ebĩsosekanĩo ebikasabawa byamabũga ebibi, nʼabalagũlĩ bamalangira Obũlĩme bwʼamabehĩ; ibakabũga erilota lyʼamabehĩ, bakasĩbĩkaya busa. Busana nʼekĩ abandu bakalendera omo nzira syabo ngʼesyombũlĩ, bakagalawa, kusangwa sihali mũlĩsya.

³Erihitana lyage lyʼamaka oko balĩsya, kandi nasyasuyira esyombaya; kusangwa Omwami Mukulu Wʼemilondo abĩrĩlebya endeko yiwe, ekĩtũnga kya Yũda, asyayirabo ngʼesabayĩrĩ yiwe yowene omo malwa.

⁴Kandi mubo mwasyalũa erĩbwe lyʼenũnga, kandi mubo mwasyalũa engyingyi yʼehema; nʼobuta bwʼamalwa bwasyalũa mubo, nʼobuli mũtabalĩ abosĩ haguma basyalũa mubo.

⁵Nabo basyabya ngʼesyombangĩ, bakalyatangirira ahisi enzĩgũ omo londo lwʼesyonzira omo malwa; kandi basyalwa, kusangwa Omwami Mukulu asyabya haguma nabo; nʼabakagenda oko syosabayĩrĩ basyahemulwa.

⁶Nage nasyaha ekĩtũnga kya Yũda amaka, kandi nasyalamya ekĩtũnga kya Yosefũ, nasyasũbũlyabo; kusangwa nabiriganyirabo; nabo basyabya nga sinditaganabo; kusangwa indi Mwami Mukulu, Nyamuhanga wabo, kandi nasyasũbĩryabo.

⁷Neryo Efũraĩmũ asyabya ngʼembangĩ, nʼomutima wabo asyatsema ngʼomo bĩnyũ; ega, abana babo basyalangirakyo, ibatsema; omutima wabo asyatsemera Omwami Mukulu.

⁸Nasyasugundirabo, erĩhĩndanĩabo; kusangwa nabĩrĩtongolyabo; nabo basyabya bangi ngoko babya erĩmbere.

⁹Omugulu nasyapanza-panzabo omo katĩkatĩ kʼebihanda; basyanyibuka omo bihugo byʼehali; ibo basyabyaho nʼabana babo, kandi basyasubula.

¹⁰Nasyaletabo kandi erĩlũa omo kihugo kyʼeMĩsĩrĩ, nasyahĩndanĩabo erĩlũa eAsũrĩa; nasyaletabo omo kihugo kyʼeGĩleadĩ nʼekyʼeLebanonĩ; erĩhĩka aho mwanya busana nabo asyabulira.

¹¹Omukama asyalaba omo ngetsi yʼamalĩge, kandi asyaswĩrya ebisunda omo ngetsi, nʼemirindi yʼolũsĩ lwʼeNĩlĩ yasyuma; nʼeriyiheka lyʼeAsũrĩa lyasyakĩmĩbwa, nʼomũtso wʼobwami bwʼeMĩsĩrĩ asyalũaho.

¹²Nage nasyahabo amaka omo Mwami Mukulu; nʼOmwami Mukulu ati, Basyalendera omo lĩna liwe.