Read nande Zekarĩa 11 Bible Online

Zekarĩa 11 - nande bible

Zekarĩa 11

¹Uwe Lebanonĩ, ukingule esyonyũyĩ syawe, omuliro alye emĩerezĩ yawe.

²Uwe muti wʼekĩlagũ, ulire, kusangwa omũerezĩ aterĩre, kusangwa emiti mibuya yabĩrĩherĩbwa. Mulire ĩnywe miti yʼemialo yʼeBasanĩ, kusangwa omũsĩtũ owakalĩre abiritera.

³Hali omulenge wʼeririra lyʼabalĩsya, kusangwa olukengerwa lwabo lwabĩrĩherĩbwa; omulenge wʼeriruruma lyʼemyusuko yʼesyondale, kusangwa eripipa lyʼeYorodanĩ lyabiriherĩbwa.

⁴Omwami Mukulu, Nyamuhanga wage, akabũga ati, Mũlĩsaye ekĩhyo ekyasyakerwa.

⁵Abakagulasyo bakĩtasyo, isibalisuyirawa, kandi obuli mundu oyũkagũlayasyo akabũga ati, Omwami Mukulu apipawe, kusangwa nabiribya muteke! Nʼabalĩsya basyo sibeganyirasyo.

⁶Kusangwa Sindiendisyaganyira kandi esyondũlanĩ syʼekihugo, Omwami Mukulu atya; nĩkwa lebaya, nasyahĩra abandu obuli muguma omo bũtokĩ bwa mũlĩkyabo, nʼomo bũtokĩ bwʼomwami wuwe; nabo basyĩta ekihugo, nage sindiendĩsyalamyabo omo bũtokĩ bwabo.

⁷Neryo monalĩsya ekĩhyo ekyasyakerwa, nasyo syabya mĩbondũ yʼesyombũlĩ. Nage monayihambira emiti ĩbĩrĩ; omuguma monahulago mo Bubuya, nʼogundi monahulago mo Bĩbohĩ; litya monalĩsya ekĩhyo.

⁸Neryo monĩta abalĩsya basatu omo mukera muguma; kusangwa omutima wage mwaluha busana nabo, nʼomutima wabo nago mwaluha busana nage.

⁹Neryo monabũga nyiti, Sindiendĩsyabalĩsya; ekikandisyahola, kihole, nʼekĩkandĩsyakwa, kĩkwe; nʼekĩkandĩsyasĩgala obuli kiguma kirye omubiri wʼekindi.

¹⁰Neryo monĩmya omuti wage gʼObubuya, monatwago mo bitswe bibiri, inatoka erĩtwa endagano yage eyo nayira haguma nʼebihanda byosĩ.

¹¹Nayo moyatwĩka ekiro ekyo; neryo litya emĩbondũ yʼesyombũlĩ eyanyowa moyaminya ko kyabya kĩnywa kyʼOmwami Mukulu.

¹²Neryo monabwirabo nyiti, Mwamaganĩrya nga ni kibuya, mumbe obũlĩsya bwage; kite kitya, siri mwatsi. Neryo mobanyirengera ebihande byʼekĩtsĩpa amakũmĩ asatu busana nʼobũlĩsya bwage.

¹³Neryo Omwami Mukulu mwanyibwira ati, Ugusebyo oko mũbũmbĩ, obũgũlĩ bubuya obo banyiganzirako. Neryo monĩmya ebihande byʼebĩtsĩpa amakũmĩ asatu, monagusirabyo omũbũmbĩ, omo nyũmba yʼOmwami Mukulu.

¹⁴Neryo monatwa ogundi muti wage oyo wʼEbĩbohĩ mwʼĩbĩrĩ, inatoka erĩtwa obũtũnga omo katĩkatĩ kʼeYũda nʼeĨsraelĩ.

¹⁵Neryo Omwami Mukulu mwabũga nage ati, Ũyĩmĩraye kandi ebindu byʼOmũlĩsya mũkĩrũ.

¹⁶Kusangwa, lebaya, nasyahanganĩa omũlĩsya omo kihugo, oyutendisyatsomana erirembera esikahera, kutse eriyasonda-sonda esyapanzawa, kutse erĩlamya eyabũnĩka, kutse erĩrĩsya eyiriho; nĩkwa asyalya esĩswĩ syʼesyombũlĩ esĩnenehĩre, nʼeritula ebigere byasyo mo bihande-bihande.

¹⁷Obũlĩge oko mũlĩsya mũpenehĩ oyũkasĩganaya ekĩhyo! Omũyalĩ asyabya oko kuboko kuwe, nʼoko lĩso liwe lyʼamali; okuboko kuwe kwasyuma kwenene, nʼerĩso liwe lyʼamali lyasyabya mwĩrĩmya kutsibu.