Read nande Zekarĩa 12 Bible Online

Zekarĩa 12 - nande bible

Zekarĩa 12

¹Enzumwa yʼekĩnywa kyʼOmwami Mukulu busana na Ĩsraelĩ. Omwami Mukulu akabũga, oyo wasanza ekyanya, nʼerĩhĩra ekibanza kyʼekihugo, nʼerihangika ekĩrĩmũ kyʼomundu omwisi wuwe ati,

²Lebaya, nasyayira eYerũsalema mo lũtehĩ olũkakũndĩra mwʼebihanda byosĩ ebĩtĩmbĩreko, nʼoko mugulu erigotera lyasyabya oko Yerũsalema, lyasyabya oko Yũda nibya.

³Neryo kyasyabererera oko kiro ekyo nasyayira eYerũsalema mo lĩbwe rĩrĩtohĩre busana nʼebihanda byosĩ; abosĩ abakalĩtoherayo basyahũtalĩbwa kutsibu; nʼebihanda byosĩ byʼekihugo byasyahĩndanĩbwa erilwa nayo.

⁴Omwami Mukulu ati, Oko kiro ekyo nasyaswĩrya obuli sabayĩrĩ omwʼiubaha, nʼomũgendya wayo omo bũsĩre; nage nasyateya enyũmba ya Yũda, kandi nasyaswĩrya obuli sabayĩrĩ yʼebihanda omo bũtĩma-tĩme.

⁵Nʼabakulu bʼeYũda basyabũga omo mitima yabo bati, Esyondũlanĩ syʼeYerũsalema ni maka wage busana nʼOmwami Mukulu Wʼemilondo, Nyamuhanga wabo.

⁶Oko kiro ekyo nasyayira abakulu bʼeYũda ngʼoluyo omo katĩkatĩ kʼesyongwĩ, kandi ngʼoluseke olukaka omo katĩkatĩ kʼemiganda; neryo basyabuga ebihanda byosĩ oko mbande syosĩ, oko mali nʼoko malembe; omugulu esyondũlanĩ syʼeYerũsalema basyĩkala kandi aho wabo eYerũsalema.

⁷Omwami Mukulu nibya asyalamya amahema wa Yũda erĩmbere, olukengerwa lwʼekĩtũnga kya Dawĩdĩ nʼolukengerwa lwʼesyondũlanĩ syʼeYerũsalema sĩlũhamĩbawe endata oko Yũda.

⁸Oko kiro ekyo, Omwami Mukulu asyalwira esyondũlanĩ syʼeYerũsalema; oyuli molo omo katĩkatĩ kabo oko kiro ekyo asyabya nga Dawĩdĩ; nʼekĩtũnga kya Dawĩdĩ kyasyabya nga Nyamuhanga, ngʼomũlaĩka wʼOmwami Mukulu embere syabo.

⁹Neryo oko kiro ekyo, nasyasondya erĩherya ebihanda byosĩ ebikayabambira eYerũsalema.

¹⁰Neryo nasyũtũlĩra endata wʼekĩtũnga kya Dawĩdĩ, nʼendata oko syondũlanĩ syʼeYerũsalema, Omũlĩmũ wʼeriganyira nʼowʼerisaba; litya lyasyaleka ibalangira oyo batsimita; kandi basyamulirira, ngʼoyukalirira mugala wuwe endogola, kandi basyamũkwĩra obũlĩge nʼerĩsĩrĩkalira, ngʼoyũkasĩrĩkalira busana nʼakambere kuwe.

¹¹Oko kiro ekyo hasyabya eririra ĩnene eYerũsalema, ngʼeririra lya Hadadĩ-rĩmonĩ omo musya wʼeMegĩdonĩ.

¹²Nʼekihugo kyasyalira, obuli kĩtũnga aho wakyo; ekĩtũnga kyʼenyũmba ya Dawĩdĩ aho wakyo, nʼabakalĩ babo aho wabo; ekĩtũnga kyʼenyũmba ya Natanĩ aho wakyo, nʼabakalĩ babo aho wabo;

¹³ekĩtũnga kyʼenyũmba ya Lawĩ aho wakyo, nʼabakalĩ babo aho wabo; ekĩtũnga kya Sĩmeĩ aho wakyo, nʼabakalĩ babo aho wabo;

¹⁴Ebĩtũnga byosĩ ebĩsĩgalĩre, obuli kĩtũnga aho wakyo, nʼabakalĩ babo aho wabo.