Read nande Zekarĩa 13 Bible Online

Zekarĩa 13 - nande bible

Zekarĩa 13

¹Omo kiro ekyo hasyabya eyĩsoko yasyalĩbũlwa busana nʼekĩtũnga kya Dawĩdĩ nʼoko syondũlanĩ syʼeYerũsalema, busana nʼebibi nʼebĩtĩsĩrĩre.

²Neryo oko kiro ekyo, Omwami Mukulu Wʼemilondo ati, Nasyabũlĩranĩa amena wʼesyosanamu omo kihugo, nasyo sisyendisyasyibukwa kandi; kandi nasyalũsya abamĩnyererĩ nʼekĩrĩmũ kĩtĩsĩrĩre omo kihugo.

³Neryo kyasyabya omugulu omundu akinaminyerera, neryo ĩse wuwe na nyĩnya wuwe abamubuta basyamubwira bati, Siwendisyabyaho; kusangwa ũkabũga amabehĩ omo lĩna lyʼOmwami Mukulu; neryo ĩse na nyĩnya abamubuta basyamutobola omugulu akaminyerera.

⁴Kandi oko kiro ekyo, abamĩnyererĩ basyakwa esĩsonĩ obuli mundu busana nʼesyonzolĩ siwe omugulu akaminyerera; kandi sibendisyambala erĩkotĩ ryʼobweya busana nʼeriteba:

⁵nĩkwa asyabũga ati, Sindi mũmĩnyererĩ, indi mũlĩmĩ wʼekitaka; kusangwa omundu mwanyĩgũlya mo mukobe omo bũlwana bwage.

⁶Nʼomundu muguma asyabũga naye ati, Ebironda ebĩ ebiri oko kĩkũba kyawe nĩkĩ kwehĩ? Neryo asyasũbĩrya ati, Bye nʼebyo nahũtalĩbawa omo nyũmba yʼabĩra bage.

⁷Uwe mũyalĩ, ũsĩsĩmũke, ulwe nʼomũlĩsya wage, ulwe nʼomundu oyuli mukulu nga ngye, Omwami Mukulu Wʼemilondo akabũga atya; mũswĩraye omũlĩsya, esyombũlĩ sipanza-panzawe; nage nasyabindula ebyala byage nʼerĩhĩrabyo oko balere.

⁸Neryo omo kihugo kyosĩ, Omwami Mukulu akabũga, ebihande bibiri mukyo byasyatũbwa ibyahera; nĩkwa ekihande ekyʼakasatu kyasyasĩgwa mukyo.

⁹Kandi nasyalabya ekihande ekyo kyʼakasatu omo muliro, nasyatũkũryabo ngʼebĩtsĩpa bĩkatũkũrĩbawa, kandi nasyalengabo ngʼesyamagetsi ko sikalengawa. Basyalakira erĩna lyage, nage nasyasũbĩryabo; nasyabũga nyiti, Ni bandu bage; nabo basyabũga bati, Omwami Mukulu ni Nyamuhanga wetu.