Read nande Zekarĩa 14 Bible Online

Zekarĩa 14 - nande bible

Zekarĩa 14

¹Lebaya, ekiro kikasa, busana nʼOmwami Mukulu omugulu obunyegwa obwahũngawa ukʼuwe bwasyagabwa omo katĩkatĩ kenyũ.

²Kusangwa nasyahĩndanĩa ebihanda byosĩ erilwa nʼeYerũsalema; nʼomũyĩ asyahũngwa, nʼamanyũmba ĩnĩahũngwa, nʼabakalĩ basyatsandĩbwa; nʼoluhande lwʼomũyĩ lwasyaya mwʼabasayĩ nʼabandu abakasĩgalira sibendĩsyĩtwa oko mũyĩ.

³Neryo Omwami Mukulu asyahuluka, nʼerilwa nʼebihanda ebyo, ngoko akalwa omo kiro kyʼamalwa.

⁴Nʼebisando biwe byasyahangana oko kiro ekyo oko kitwa kyʼeMĩzeĩtũnĩ, ekiri embere syʼeYerũsalema ebwanga bwʼendata; nʼekitwa kyʼeMĩzeĩtũnĩ kyasyatulwa omo katĩkatĩ erĩlolya endata nʼerĩlolya eyĩkwa, busana nʼomusya munene kutsibu; nʼoluhande lwʼekitwa lwasyasegera erĩlolya elutambi lwʼendata, nʼolundi luhande lwakyo lwasyalolya elutambi lwʼeyĩkwa.

⁵Nenyũ mwasyatibita omo musya wʼebitwa byage; kusangwa omusya wʼebitwa asyahĩka eAzelĩ; ega, mwasyatibita, ngoko mwatibita busana nʼomũsĩkĩ omo biro byʼOmwami wʼeYũda ye Ũzĩa. Neryo Omwami Mukulu, uwe Nyamuhanga wage, asyasa, nʼababũyĩrĩre bosĩ haguma naye.

⁶Neryo kyasyabya oko kiro ekyo sihendisyabya omwĩrĩmya.

⁷Nĩkwa kyasyabya kiro kiguma ekyasĩbwe nʼOmwami Mukulu; si ʼtungi, kandi si kiro; nĩkwa ni mubano, oko mugulu wʼerĩgolo-golo hasyabya ekyakakala.

⁸Neryo oko kiro ekyo, amagetsi wʼengebe asyasenda akalũa eYerũsalema; oluhande lwago erĩlolya oko ngetsi yʼendata, nʼolundi luhande lwago erĩlolya oko ngetsi yʼeyĩkwa; kyasyabya oko mugulu wʼobugoma nʼoko mugulu wʼeritsuku nibya.

⁹NʼOmwami Mukulu asyabya Mwami oko kihugo kyosĩ; oko kiro ekyo Omwami Mukulu asyabya muguma ĩyowene, nʼerĩna liwe liguma ĩlyolyene.

¹⁰Nʼekihugo kyosĩ kyasyahindulwa mo bwerere, erĩtsũka eGeba nʼerĩhĩka eRĩmonĩ, elutambi lwʼeyĩkwa lwʼeYerũsalema; nĩkwa Yerũsalema asyasumbwa, asyĩkala aho wago erĩtsũka okwʼIrimbo lya Benyamĩna erĩhĩka okwʼIrimbo Lyʼerĩtsũka, erĩhĩka okwʼIrimbo lyʼeNũnga, nʼerĩtsũka oko Nyũmba nyiri-nyiri ya Hananelĩ erĩhĩka oko bikamiro byʼOmwami.

¹¹Nʼabandu basyĩkalamo, kandi Sihendisyaswabya eritakira; kusangwa eYerũsalema yasyĩkala buholo.

¹²Neryo ekĩ nĩ kĩhũnzo ekyo Mwami Mukulu asyaswĩryamo ebihanda byosĩ ebyabiriyalwa nʼeYerũsalema: emĩnyokũ yʼemibiri yabo yasyahonda omugulu bakinahangene oko bisando byabo, nʼameso wabo asyahonda omo bĩkũlũ byago, nʼolulimi lwabo lwasyahonda omo buno bwabo.

¹³Neryo oko kiro ekyo, hasyabya omo katĩkatĩ kabo obũyogera bunene bũkalũa ewʼomwami Mukulu; nabo basyahamba obuli mundu ebyala bya mũlĩkyabo, nʼebyala byʼomuguma byasyalwa nʼebyala bya mũlĩkyabo.

¹⁴Na Yũda nibya asyalwa nʼeYerũsalema; nʼobuteke bwʼebihanda byosĩ ebĩtĩmbĩreko bwasyahĩndanĩbwa haguma, esyamagetsi, nʼesyʼebĩtsĩpa, nʼebyambalo bingi kutsibu.

¹⁵Nʼekĩhũnzo ekĩ ekyʼesabayĩrĩ, nʼekyʼenyumbu, nʼekyʼengamia, nʼekyʼepunda, nʼekyʼesyonyama syosĩ esikandisyabya omo bilaliriro ebyo byosĩ, kyasyasosa ekĩhũnzo ekyo.

¹⁶Neryo kyasyabya obuli mundu oyũkasĩgala oko bihanda byosĩ ebyo byayalwa nʼeYerũsalema basyahetuka oko buli mwaka erĩyaramya Omwami, Omwami Mukulu Wʼemilondo, erĩteya ebiro bikulu byʼEbitalikirire.

¹⁷Neryo kyasyabya, obuli mundu wʼoko bĩtũnga byosĩ byʼekihugo oyutahetukira eYerũsalema erĩyaramya Omwami, Omwami Mukulu Wʼemilondo, embũla siyendisyawa kubo.

¹⁸Kandi ekĩtũnga kyʼeMĩsĩrĩ kyamatendisvahetukirayo, kutse eriingirayo, neryo sihali mbũla yasyawa kubo; kyasyabya kĩhũnzo ekyo Mwami Mukulu akaswĩrayamo ebihanda ebitahetukirayo oko biro bikulu byʼEbitalikirire.

¹⁹Erĩ rikandisyabya erisuyira lyʼeMĩsĩrĩ nʼerisuyira lyʼebihanda byosĩ ebitahetukirayo oko biro bikulu byʼEbitalikirire.

²⁰Oko kiro ekyo hasyabya amasako oko syonzumbo syʼesyosabayĩrĩ, ati, EKĨBŨYĨRĨRE OKO MWAMI MUKULU; nʼesyonyungu omo nyũmba yʼOmwami Mukulu, syasyabya ngʼebibindi embere wʼekiherero.

²¹Nʼobuli nyungu eYerũsalema nʼeYũda yasyabya ĩbũyĩrĩre oko Mwami Mukulu Wʼemilondo; nʼabosĩ abakahonga amahere basyasa nʼerĩĩmya kusyo, nʼerĩhũkamo. Nʼoko kiro ekyo, Sihendisyaswabya Omukanana omo nyũmba yʼOmwami Mukulu Wʼemilondo.