Read nande Zekarĩa 8 Bible Online

Zekarĩa 8 - nande bible

Zekarĩa 8

¹Neryo ekĩnywa kyʼOmwami Mukulu mokyahĩka kiti,

²Omwami Mukulu Wʼemilondo akabũga ati, Indi nʼobũha busana na Sĩonĩ omo bũha bunene; ega, indi nʼobũha busana naye nʼerihitana lĩnene.

³Omwami Mukulu akabũga ati, Nasyasuba eSĩonĩ, nasyĩkala omo katĩkatĩ kʼeYerũsalema. Neryo eYerũsalema yasyahulwa mo Mũyĩ Wʼekwenene; nʼekitwa kyʼOmwami Mukulu Wʼemilondo kyasyahulwa mo Kitwa Kĩbũyĩrĩre.

⁴Omwami Mukulu Wʼemilondo ati, Abasyakulu nʼabakekulu basyaswĩkala kandi omo syonzira syʼeYerũsalema, obuli mundu nʼomũtso wuwe omo byala biwe busana nʼobukulu bwabo.

⁵Nʼesyonzira syʼomũyĩ syasyũsũla mwʼabalwana nʼabana-bato ibakatsangira omo syonzira syako.

⁶Omwami Mukulu Wʼemilondo akabũga ati, Kyamabya kitetokekana omo meso wʼabasĩgalira bʼabandu aba omo biro ebyo, kyasyabya kitetokekana nibya nʼomo meso wage kwehĩ? Omwami Mukulu Wʼemilondo akabũga.

⁷Omwami Mukulu Wʼemilondo akabũga ati, Lebaya, nasyalamya abandu bage erĩlũa omo kihugo kyʼendata, nʼerĩlũa omo kihugo kyʼeyĩkwa;

⁸nage nasyaletabo kandi, nabo basyĩkala omo Yerũsalema; basyabya bandu bage, nage nasyabya Nyamuhanga wabo, omo kwenene nomo litunganene.

⁹Omwami Mukulu Wʼemilondo ati: Ebyala byenyũ bibye nʼamaka, ĩnywe mukahulikirira omo biro ebĩ ebĩnywa ebĩ ebĩkalũa omo buno bwʼabamĩnyererĩ, ababũga oko kiro ekibanza kyʼenyũmba yʼOmwami Mukulu Wʼemilondo kyahĩrawa, eHekalũ, itoke erĩhĩmbwa.

¹⁰Kusangwa embere wʼebiro ebyo sihabya luhembo busana nʼomundu, kutse oluhembo busana nʼenyama; kandi mohatabya obuholo nʼobuke busana nʼoyukahuluka kutse oyukingira, busana nʼesyonzĩgũ siwe, nage monahĩra obũyĩgũ omo katĩkatĩ kʼabandu bosĩ obuli mundu na mũlĩkyabo.

¹¹Nĩkwa lino sindiendisyakola oko bandu basĩgalira aba ngʼebiro byʼerĩmbere, Omwami Mukulu Wʼemilondo atya.

¹²Kusangwa hasyabya obuholo busana nʼembuto, omũlĩkĩ wʼebĩnyũ asyahetya ebĩgũma byago, nʼekitaka kyasyalasya akalyo kakyo, nʼekyanya kyasyawĩsya ekimi kyakyo; nage nasyaleka abasĩgalira bʼabandu aba erirya omwandu wʼemyatsi eyĩ yosĩ.

¹³Neryo kyasyabererera, ngoko mwabya itakira omo bihanda, uwe kĩtũnga kya Yũda nʼekĩtũnga kya Ĩsraelĩ, litya nasyabalamya, nenyũ imwatoka eribya mũyĩsa. Simubahe, mũkalaye ebyala byenyũ.

¹⁴Kusangwa Omwami Mukulu Wʼemilondo akabũga ati, Ngoko naganĩraya eribakola nabi omugulu abotata wenyũ banyĩhĩtanaya, Omwami Mukulu Wʼemilondo akabũga, kandi sĩndĩ tayĩkũbya bomo.

¹⁵Neryo kandi litya nabĩrĩswaganĩrya omo biro ebĩ erikolera eYerũsalema yo ndeke nʼekĩtũnga kya Yũda; simubahe!

¹⁶Emyatsi yeyĩ, mutolere erikolayo: obuli mundu abũge ebyʼekwenene uku mũlĩkyabo; mutswere omo kwenene nʼeritswera busana nʼobuholo omo syongyo syenyũ.

¹⁷Sihabye nʼomuguma ũkwʼĩnywe oyũkatsũtsĩra mũlĩkyabo yo nabi omo mitima yenyũ; kandi simwanze erĩlahĩrya lyʼamabehĩ; kusangwa ebyosĩ ebĩ ni myatsi ngakwa obusu Omwami Mukulu akabũga.

¹⁸Neryo ekĩnywa kyʼOmwami Mukulu Wʼemilondo mokyanyĩhĩkako, kiti,

¹⁹Omwami Mukulu Wʼemilondo akabũga ati, Eritsira akalyo oko mukera wʼakani, nʼeritsira akalyo oko wʼakatanu, nʼeritsira akalyo oko wʼakalinda, nʼeritsira akalyo oko mukera wʼerĩkũmĩ, lyasyabya butseme nʼeritsanga, nʼerirya ĩnene lyʼobutseme busana nʼekĩtũnga kya Yũda. Busana nʼekyo mwanze ekwenene nʼobuholo.

²⁰Omwami Mukulu Wʼemilondo akabũga ati, Abandu basyahĩka, nʼesyondũlanĩ syʼemĩyĩ mingi syasyahĩka;

²¹nʼesyondũlanĩ syʼomũyĩ muguma syasyaya oko gundi, nʼerĩbũga bati, Tugende lino eriyasaba eriganyira lyʼOmwami Mukulu, nʼerĩsonda-sondya Omwami Mukulu Wʼemilondo. Nage ngandiyayo nibya.

²²Abandu bangi nʼebihanda byʼamaka byasyasa erĩsonda-sondya Omwami Mukulu Wʼemilondo eYerũsalema, nʼerisaba eriganyira lyʼOmwami Mukulu.

²³Omwami Mukulu Wʼemilondo akabũga ati, Oko biro ebyo, abandu ĩkũmĩ abakalũa oko bihanda byʼobuli mũbũge, basyahamba oko mũsĩke wʼolukimba lwʼOmũyũda bati, Uleke tugende nawe, kusangwa twabĩrĩowa ko Nyamuhanga ali haguma nawe.