Read nande Matayo 10 Bible Online

Matayo 10 - nande bible

Matayo 10

¹Yesu mwabirikira abiga buwe ĩkũmĩ nʼababiri, neryo mwahabo ehamũlĩ oko bĩrĩmũ bibi, erihigirabyo eyĩhya, nʼerĩlamya obuli mũsĩndo wʼerilwala, nʼobuli mũsĩndo wʼamakonĩ.

²Aya ni mena wʼabakwenda ĩkũmĩ nʼababiri: owʼerĩtsũka, Sĩmonĩ, oyukahulawa mo Petero, na mugala wabo Anderea; na Yakobo, mugala wa Zebedayo na mugala wabo Yoane;

³Fĩlĩpo, na Bartolomayo; Toma na Matayo mũsolesya; Yakobo mugala wa Alufayo, na Tadeo;

⁴Sĩmonĩ Mukanana, na Yũda Ĩskarĩota, oyo wamuhotera.

⁵Yesu mwatuma abakwenda ĩkũmĩ nʼababiri abihanabo, ati, Simuye oko kihugo kyʼEbihanda, kandi simwingire omo mũyi wʼAbasamarĩa.

⁶Nĩkwa muye oko mbũlĩ sitere syʼekihanda kya Ĩsraelĩ.

⁷Nʼomugulu mukagenda, mũtũlego muti, Obwami bwʼelubula buli hakũhĩ.

⁸Mũlamaye abakonĩ, mũlũbũkaye abaholĩ, mũlamaye abahaga, muhigire esyombĩnga syʼeyĩhya. Mwabiryangirira butsira eririha, muhe abandi butsira erĩrĩhĩsya.

⁹Sĩmũsondaye esyamagetsi, kutse ebĩtsĩpa, kutse esyʼemiringa syʼomo matũsĩ wenyũ;

¹⁰kutse engunza busana nʼolugendo lwenyũ, kutse esyokanzu ĩbĩrĩ, kutse esyongendero, kutse mũtso; kusangwa omũhĩngĩ anatolere ebyo angalya.

¹¹Omugulu mũkahĩka oko mũyĩ kutse oko kayĩ, mwingire, mũbũlaye nga hane mundu oyo wangabakokya, neryo imwĩkala omuwe, erĩhĩka aho mwasyalũĩraho.

¹²Kandi omugulu mukingira omo nyũmba eyo, mũkerayebo.

¹³Neryo abandu bʼenyũmba eyo bamabakokya, Obuholo bwenyũ bubye kubo; nĩkwa bamatendĩbakokya, Obuholo bwenyũ ibwabasubako.

¹⁴Nʼomundundi oyutebakokaya, kutse erĩowa ebĩnywa byenyũ, omugulu mũkalũa omo nyũmba eyo kutse omo mũyĩ oyo, mukungute olũtũtũ lʼoko bisando byenyũ.

¹⁵Kwenene ngabũga nenyũ nyiti, Oko kiro kyʼeritswera, olubanza lwʼekihugo kyʼemĩyĩ yʼeSodomo nʼeGomoro lwasyabya luke oko lʼomũyĩ oyo.

¹⁶Lebaya, ngabatuma ngʼesyombũlĩ omo katĩkatĩ kʼesyombwa syʼomolĩ. Neryo mubye nʼamenge ngʼesyonzoka, kandi mubye bandu bolo ngʼehĩrĩkũkũ.

¹⁷Nĩkwa mũyĩtegaye busana nʼabandu; kusangwa basyabahotera omo hʼerĩbũgĩro, nʼerĩbaswĩrĩrya omo manyũmba wabo wʼerĩhĩndanamo.

¹⁸Kandi, mwasyakurirwa embere syʼabatabalĩ bakulu, nʼembere wʼabami busana nage, busana nʼerĩtũla Engulu Yowene kubo, nʼoko bandu bʼEbihanda.

¹⁹Nĩkwa omugulu basyabahotera, sĩmũhahũkaye emitima nga mwasyabũgakĩ kutse nga mwasyabũga muti. Kusangwa oko ndambĩ eyo mwasyahabwa ebyo mwasyabũga.

²⁰Kusangwa ebĩnywa mũkabũga sĩ byenyũ; byasyalũa oko Mũlĩmũ wa Tata wenyũ oyũkabũgĩra omwisi wenyũ.

²¹Omundu asyahotera mugala wabo erĩĩtwa, nʼabotata basyahotera abana babo batya; nʼabana basyalwa nʼababũtĩ babo nʼerĩĩtĩsyabo.

²²Kandi abandu bosĩ basyabakwa obusu busana nʼerĩna lyage. Nĩkwa oyo wasyayĩyĩnĩa erĩhĩka oko ndũlĩ yo wasyalamĩbwa.

²³Nĩkwa omugulu bakabendereraya omo mũyĩ muguma imwatibita oko gundi mũyĩ. Kwenene ngabũga nenyũ nyiti, Simwendisyalaba omo mĩyĩ yosĩ ya Ĩsraelĩ, Omugala wʼomundu ate ahĩka.

²⁴Omwiga sialengĩre omũkangĩrĩrya wuwe, kutse omukobe sialengĩre omukama wuwe.

²⁵Omwiga angatsema eribya ngʼomũkangĩrĩrya wuwe, nʼomugombe angatsema eribya ngʼomukama wuwe. Bamahula omukulu wʼenyũmba mo Belzebũlĩ, basyahula abandu bʼenyũmba yiwe bʼomo mena mabi kwʼaho!

²⁶Neryo simubahe abandu. Kusangwa sihali ekĩkũnĩngĩre ekitendisyabĩsũlwa, kutse ekĩbĩsamĩre ekitendisyamĩnyĩkalĩbwa.

²⁷Ebyo ngababwira omo mwĩrĩmya, mũbũgebyo omo kyakakala; nʼebyo mũkowa omo bihwehwe mũtũlaganayebyo oko lutwe lwʼenyũmba.

²⁸Kandi simubahe abakĩta omubiri, nĩkwa sibetoka erĩĩta omutima; nĩkwa kumbe mwangubaha Nyamuhanga oyukatoka erĩherya omutima nʼomubiri omo Kũlĩmũ.

²⁹Ebiswiri bibiri sibyegũlĩbawa oko sengĩ nguma kwehĩ? Kandi sihali nʼakaguma akakatogera ahisi lite erisonda lya Tata wenyũ.

³⁰Nĩkwa esyonzwiri syʼoko mitwe yenyũ sĩganzĩrwe esyosĩ.

³¹Neryo simubahe, muli bʼobũgũlĩ bunene kwilaba obũgũlĩ bwʼebiswiri bingi!

³²Obuli mundu oyũkanyĩkanganaya embere syʼabandu, nage nasyamũkanganĩa embere sya Tata wage oyuli elubula.

³³Nĩkwa oyukanyigana embere syʼabandu, neryo nage nibya nasyamugana embere sya Tata wage oyuli elubula.

³⁴Sĩmũganĩraye muti nasa nʼerireta Obuholo omo kihugo; mondasa erireta Obuholo, nĩkwa omũyalĩ.

³⁵Kusangwa nasa nʼerĩkatĩsanĩa omundu nʼĩse, nʼomwali na nyĩnya wuwe, na mwalĩana na nyĩnyĩ-byala wuwe.

³⁶Nʼesyonzĩgũ syʼomundu basyabya iba nʼabʼomo kĩtũnga kiwe.

³⁷Oyo wanzĩre ĩse kutse nyĩnya kwilaba ngye sianyitolere; nʼoyo wanzĩre mugala kutse mwali kwilaba ngye, sianyitolere.

³⁸Nʼomundu oyuteheka omusalaba wuwe nʼerinyikwama sianyitolere.

³⁹Oyukalenga eribana engebe yiwe, asyatalyayo, nʼoyũkatalaya engebe yiwe busana nage asyabanayo.

⁴⁰Omundundi oyũkabakokaya akanyĩkokaya; nʼoyũkanyĩkokaya akakokaya oyo wanyituma.

⁴¹Oyũkakokaya omũmĩnyererĩ wa Nyamuhanga kusangwa nĩ mũmĩnyererĩ asyĩmya oluhembo lwʼomũmĩnyererĩ; nʼoyũkakokaya omundu utunganene kusangwa atunganene, asyĩmya oluhembo lwʼomundu utunganene.

⁴²Nʼomundundi oyo wasyaha olũtehĩ lwʼamagetsi mũhũ omo lĩna lyʼomwiga oko muguma wʼabake-bake aba ati apũlayego, kwenene ngabũga nyiti, siendisyabula oluhembo luwe nʼahake.