Read nande Matayo 11 Bible Online

Matayo 11 - nande bible

Matayo 11

¹Omugulu Yesu abuga eritegeka abiga buwe ĩkũmĩ nʼababiri, mwalũaho, mwayakangĩrĩrya nʼerĩtũlanganĩa omo mĩyĩ eyabya hakũhĩ nʼeyo.

²Neryo omugulu Yoane owĩra omo mũlĩkĩ emĩbĩrĩ ya Kristo, mwamutumira abiga buwe,

³erĩbũlya Yesu, ati, Nina we oyukasa, kutse tulindirire ogundi kwehĩ?

⁴Yesu mwasũbĩryabo ati, Mugende, mubwire Yoane emyatsi eyo mwamowa nʼebyo mwamalangira.

⁵Esyondĩmatĩme sirimulangira, nʼebirema birimugenda, abahaga bakalamĩbawa nʼabatsiha balĩmowa, nʼabaholĩ banemũlũbũkĩbwa, nʼEngulu Yowene ĩrĩmũtũlaganĩbwa oko bera.

⁶Kandi obutseme buli oko yũtehũkahũkaya omutima busana nage!

⁷Neryo abiga ba Yoane babere bakasubula, Yesu mwatsũka erĩbũga nʼesyondeko busana na Yoane ati, Mwaya omo mbwarara eriyalola mʼũkũkĩ kwehĩ? Mwayalangira ekibingu ekikatengatenganĩbawa nʼerihunga kwehĩ?

⁸Nĩkwa mwayayo eriyalangirakĩ kwehĩ? Muti, omundu oyo wambite esyongimba nyolo-nyolo kwehĩ? Mũlebaye abambite esyongimba esĩkangabasenĩe bali omo manyũmba wʼabami.

⁹Nĩkwa mwayayo busana nakĩ kwehĩ? Mwayalangira omũmĩnyererĩ kwehĩ? Ega, ngababwira mwabirilangira oyũlengĩre omũmĩnyererĩ.

¹⁰Kusangwa Yoane yoyo amasako ahula ati, Lebaya, ngatuma omukwenda wage embere syenyũ, Oyo wasyowanĩa enzira yawe embere syawe.

¹¹Kwenene ngabũga nenyũ nyiti, Yoane Mũbatĩsya ni mukulu kwilaba abandu bosĩ ababutawa. Nĩkwa oyuli muke kutsibu omo Bwami bwʼelubula, amũlengĩre.

¹²Kandi erĩtsũka oko biro bya Yoane Mũbatĩsya, erĩhĩka na lino Obwami bwʼelubula bukalwiriranawa, nʼabandu bʼomwaga bakalenga erihamba obwami obo.

¹³Kusangwa amasako wʼabamĩnyererĩ bosĩ, nʼEmigambo ya Musa mobyaminyerera omwatsi wʼobwami erĩhĩka oko mugulu wa Yoane.

¹⁴Kandi wamanza erĩrĩga omwatsi wabo, Yoane nĩ Elĩa oyo wasyasa.

¹⁵Oyuwite amatwĩ, owe!

¹⁶Nĩkwa nasyalĩngĩrĩranĩa abandu ba sesene bo nakĩ kwehĩ? Bali ngʼabana abĩkere omo katale abakabirikirana,

¹⁷bati, Twabiribabuhira amalenga, neryo momutetasata; motwimba Olwimbo lwʼerita omundu, nenyũ momutetalira.

¹⁸Kusangwa Yoane mwasa, isialirya kutse erĩpũlya, neryo bakabũga bati, Ali ko mbinga!

¹⁹Omugala wʼomundu mwasa akalya nʼerĩpũlya, neryo bakabũga bati, Lebaya omundu oyũ! Ni wʼomururu nʼomũkũndĩrya, omwĩra wʼabasolesya nʼabakola-nabi. Nĩkwa amenge wa Nyamuhanga akaminyĩkala omo mĩbĩrĩ yago.

²⁰Neryo Yesu mwatsũka erihayira emĩyĩ eyo akolera mwʼebitiko-tiko biwe bingi, kusangwa mobatabindula emitima erireka ebibi.

²¹Obũlĩge ukʼuwe Korazĩnĩ! Obũlĩge ukʼuwe Betesaĩda! Kusangwa kumbe ebitiko-tiko ebyakolawa omwisi wenyũ, bialikolawa eTĩro nʼeSĩdonĩ, kumbe babiribindula emitima nʼerireka ebibi byo kera, ibanambite emisarandwe nʼerĩĩkala omwʼĩbũ.

²²Nĩkwa ngababwira nyiti, Oko kiro kyʼeritswera, olubanza lwʼeTĩro nʼeSĩdonĩ lwasyabya luke oko lwenyũ.

²³Nawe Kapernaũmũ! Wabya wanzĩre erĩhamĩbwa elubula kwehĩ? Wasyaguswa omo Lĩfero. Kusangwa kumbe ebitiko-tiko ebyakolawa omo katĩkatĩ kenyũ, byalikolawa eSodomo, eSodomo ngʼikineho erĩhĩka na lino.

²⁴Nĩkwa ngababwira nyiti, Oko kiro kyʼeritswera, olubanza lwʼekihugo kyʼeSodomo lwasyabya luke oko lwawe.

²⁵Oko mugulu oyo Yesu mwasũbĩrya ati, Ngakupipa uwe Tata, Omukama wʼolubula nʼekihugo! Kandi wabĩrĩbĩsa emyatsi eyĩ oko bʼamenge nʼabʼeriminya, nĩkwa wabĩrĩbĩsũlĩrayo oko bana balere.

²⁶Ega, Tata, kusangwa ko byakũtsemesaya bitya omo meso wawe.

²⁷Tata wage abirimba emyatsi yosĩ. Sihali oyo wasĩ Omugala nina Tata, kandi sihali oyo wasĩ Tata nina Mugala, nʼomundu oyo Mugala anzĩre erĩmũbĩsũlĩra.

²⁸Mwase ũkwʼĩngye, ĩnywe bosĩ ko mukanuba nʼeriheka ebĩrĩtohĩre, ngandibalũhũkya.

²⁹Mwĩmaye engomo yage, muhekeyo, mwigire ũkwʼĩngye, kusangwa indi molo-molo nʼowʼomutima ahehere; nenyũ mwasyabana eriluhuka omo mitima yenyũ.

³⁰Kusangwa engomo yage ni nyibuya, nʼomuheke wage angũhĩre.