Read nande Matayo 13 Bible Online

Matayo 13 - nande bible

Matayo 13

¹Oko kiro ekyo Yesu mwalũa omo nyũmba mwaya oko mũsĩke wʼengetsi, mwĩkalayo.

²Esyondeko esyahĩndana ahali Yesu syabya nene kutsibu, kyaleka iniingira omo bwato nʼerĩĩkala mubo. Nʼesyondeko syabya simene oko mũsĩke wʼengetsi.

³Neryo Yesu mwakangĩrĩryasyo omo mĩsyo, ati, Lebaya, omũbĩbĩ mwayabiba embuto.

⁴Nʼomugulu abiba, esindi mbuto mosyatogera oko mũsĩke wʼenzira, nʼesyonyonyũ mosyasa mosyatomengerasyo.

⁵Nʼesindi mbuto mosyatogera oko kitaka kyʼamabwe, ahate mukungu mungi. Esyombuto esyo mosyalasa lũba, kusangwa sihabya mutaka mungi.

⁶Neryo eryuba molyakola, molyahĩsyasyo, neryo kusangwa emĩrĩhĩ yabya mike-mike, mosyuma.

⁷Esindi mbuto mosyatogera omo mahwa, nʼamahwa ayo mwalasa, mwakũsyasyo.

⁸Nʼesindi mbuto mosyatogera omo kitaka kyowene, mosyasohola, esindi erĩgana, nʼesindi amakũmĩ ndatu, nʼesindi amakũmĩ asatu.

⁹Neryo Yesu mwabũga ati, Oyuwite amatwĩ, owe!

¹⁰Neryo abiga mobasyabũlya Yesu bati, Busana nakĩ ũkabũga nabo omo mĩsyo kwehĩ?

¹¹Neryo Yesu mwasũbĩryabo ati, Ĩnywe mwabirihabwa eriminya erĩkũmbo lyʼobwami bwʼelubula, nĩkwa abandi sibetahabwa eriminyalyo.

¹²Kusangwa oyuwite asyahabwa ebindi, asyabya nʼebingi; nĩkwa oyutawite, asyasagulwa ebyo awite.

¹³Kikaleka inabwirabo omo mĩsyo, kusangwa nomo bakalangira sibelangira, nomo bakowa Sĩbalĩowa, kutse sibeminya.

¹⁴Kandi busana nabo eriminyerera lya Ĩsaya likabererera, liti, Mwasyasiba mũkowa, nĩkwa simwendisyaminya; Kandi mwasyasiba mũkalebya, nĩkwa simwendisyalangira;

¹⁵Kusangwa emitima yʼabandu aba yabiribya mʼobũtowa, Kandi Sĩbalĩowa ndeke omo matwĩ wabo, Kandi babĩrĩrĩba ameso wabo; Bakasyalangira omo meso wabo, Nʼerĩowa omo matwĩ wabo, Nʼeriminya omo mitima yabo nʼeriswanyibindukira, Nyamuhanga atya, Nage ĩnalamyabo.

¹⁶Nĩkwa obutseme buli oko meso wenyũ, kusangwa mukalangira, nʼobutseme buli oko matwĩ wenyũ, kusangwa mũkowa.

¹⁷Kusangwa kwenene ngababwira nyiti, Abamĩnyererĩ bangi nʼabandu batunganene bangi mobanza erilangira oko ebyo mukalangira, nĩkwa mobatatoka erilangirabyo; nʼerĩowa ebyo mũkowa, mobatowabyo.

¹⁸Neryo mowe omũsyo wʼomũbĩbĩ.

¹⁹Omugulu omundu akowa ekĩnywa kyʼobwami, isialiminyakyo, ali ngʼembuto eyatogera oko mũsĩke wʼenzira. Omubi akasa ĩnĩapũra ekyabibawa omo mutima wuwe.

²⁰Embuto e yabibawa omo kitaka kyʼamabwe yo mundu oyũkowa ekĩnywa, neryo-neryo akangirirakyo nʼobutseme.

²¹Nĩkwa ekĩnywa ekyo sikiribya omwisi wuwe. Embuto eyabibawa omo kitaka byamo katambĩ kake. Neryo omugulu obũlĩge, kutse erĩendererya bĩkahĩka busana nʼekĩnywa ekyo, akatswa lũba.

²²Nʼembuto eyabibawa omo mahwa yo mundu oyũkowa ekĩnywa, nʼamagalĩ wʼekihugo, nʼamatebo wʼebindu bĩkakũsaya ekĩnywa, ikitasohola.

²³Nʼembuto eyabibawa omo kitaka kyowene, yo mundu oyũkowa ekĩnywa akaminyakyo; yo yũkeraya embuto eyo, eyindi mbuto ĩgana, eyindi amakũmĩ ndatu, nʼeyindi amakũmĩ asatu.

²⁴Kandi Yesu mwabwirabo ogundi mũsyo ati, Obwami bwʼelubula bwangalĩngĩrĩranĩbwa nʼomundu oyo wabiba embuto yowene omwʼirima liwe.

²⁵Nĩkwa omugulu abandu babyato, enzĩgũ yiwe moyasa, moyabiba ebiti omo katĩkatĩ kʼengano, neryo moyagenda.

²⁶Nĩkwa omugulu omugera ahuluka nʼerisohola, ebiti ebyo nabyo mobyahuluka.

²⁷Neryo abagombe bʼomũlĩmĩ oyo mobasa mobamubwira bati, Mukama, mutabiba embuto yowene omwʼirima lyawe kwehĩ? Neryo ebiti ebyo byalũahi kwehĩ?

²⁸Nĩkwa mwabwirabo ati, Enzĩgũ yabirikola ekyo! Neryo abakobe mobamũbũlya bati, Neryo wanzĩre itwakulangabyo kwehĩ?

²⁹Nĩkwa Omwenye eririma oyo mwabũga ati, Iyihi; kusangwa omugulu mukakulanga ebiti, mũkasyakũlĩranĩabyo nʼengano.

³⁰Muleke engano nʼebiti bilase haguma erĩhĩka oko mugulu wʼerigesa. Neryo oko mugulu wʼerigesa nasyabwira abagesĩ nyiti, Mũtsũke erikuma-kuma ebiti, musengebyo mo mũlo-mũlo erĩlũsyabyo; nĩkwa mũhĩre engano yʼomo kigona kyage.

³¹Neryo Yesu mwabwirabo ogundi mũsyo ati, Obwami bwʼelubula busosene nʼembuto yʼeharadalĩ eyo mundu ĩmaya nʼeribibayo omwʼirima liwe.

³²Embuto eyĩ ni nge kwilaba esyombuto syosĩ, nĩkwa omugulu kakalasa, ni kanene kwilaba esyombuto syosĩ syʼeririma, kandi ikabya muti, nʼesyonyonyũ syʼomo kyanya sikasa nʼerĩhĩmba esyonyutu syasyo omo mitahi yago.

³³Yesu mwatwĩrabo ogundi mũsyo ati, Obwami bwʼelubula bũsosĩre ekĩhamya. Omũkalĩ mwĩmyakyo, mwabĩsakyo omo hĩrengĩ hisatu hyʼeyĩsyano, nʼeyosĩ moyahama.

³⁴Nĩkwa Yesu mwabũga oko syondeko, mwaya omo nyũmba. Neryo abiga buwe mobamũhĩkako bati, Ũtũkũmbũ:

³⁵Yesu mwakola atya erĩberererya ebyabũgawa nʼomũmĩnyererĩ ati, Nasyakũmbũla obuno bwage omo mĩsyo; Nasyabũga emyatsi eyabĩsawa okwʼĩtsũka lyʼerihangikwa lyʼekihugo.

³⁶Neryo Yesu mwasĩganĩa esyondeko, mwaya omo nyũmba. Neryo abiga buwe mobamũhĩkako bati, Ũtũkũmbũlĩre omũsyo wʼebiti omwʼirima.

³⁷Neryo Yesu mwasũbĩryabo ati, Oyukabiba embuto yowene ni Mugala wʼomundu.

³⁸Eririma kye kihugo; nʼembuto yowene ba bana bʼobwami; ebiti ba bana bʼOmubi.

³⁹Enzigũ eyabiba ebiti ebyo nĩ Satanĩ. Nʼomugulu wʼerigesa ye ndũlĩ yʼekihugo, nʼabagesĩ ba bamalaĩka.

⁴⁰Neryo ngoko ebiti bikakuma-kumawa nʼerĩhĩsĩrĩryabyo omo muliro, ko bikandisyabya bitya okwʼihwererera lyʼemigulu.

⁴¹Omugala wʼomundu asyatuma abamalaĩka buwe, basyakuma-kuma nʼerĩlũsya ebyosĩ ebikaleka abandu ibakola ebibi, nʼabakola-nabi bosĩ omo Bwami buwe,

⁴²asyagusabyo omo seke-seke yʼomuliro, eyo abandu basyalira nʼerikeregeta ameno wabo.

⁴³Oko mugulu oyo abatunganene omo meso wa Nyamuhanga basyakangabasanĩa ngʼeryuba omo Bwami bwa Tata wabo. Oyuwite amatwĩ owe!

⁴⁴Obwami bwʼelubula bulingene nʼebindu ebĩbĩsamĩre omwʼirima. Omundu mwabana ebindu ebyo neryo mwabĩsabyo Busana nʼobutseme, omundu oyo akayagũlaya ebyosĩ ebyo awite, neryo akagula eririma eryo.

⁴⁵Kandi, Obwami bwʼelubula bulingene nʼomũtũndĩ oyukasonda-sonda esyolulu nyibuya.

⁴⁶Neryo abere abibana elulu nguma yʼobũgũlĩ bunene, mwayagũlya ebyosĩ ebyo abya awite neryo mwagula elulu eyo.

⁴⁷Kandi Obwami bwʼelubula bulingene nʼekĩsohĩ ekyagusawa omo ngetsi, mokyahĩndanĩa emĩsĩndo yosĩ yʼamahere.

⁴⁸Omugulu ekĩsohĩ kyũsũla, abasohĩ mobakurirakyo oko mũsĩke, neryo mobĩkala ahisi, mobasombolera amahere owene gʼomo nyungu, nĩkwa mobagusa amahere awatowene.

⁴⁹Ko likandisyabya litya oko ndũlĩ yʼekihugo. Abamalaĩka basyahuluka ibasombola abandu babi bʼomo katĩkatĩ kʼabatunganene.

⁵⁰Basyagusabo omo seke-seke yʼomuliro. Eyo abandu basyalira nʼerikeregeta ameno wabo.

⁵¹Neryo Yesu mwabũlyabo ati, Mwabiriminya emyatsi yosĩ eyĩ kwehĩ? Nabo mobamubwira bati, Ega.

⁵²Neryo Yesu mwabwirabo ati, Neryo obuli mũkangĩrĩrya wʼEmigambo oyo wabiribya mwiga wʼobwami bwʼelubula ali ngʼomwenye nyũmba, oyũkahũlũkaya ebindu ebyo abika, ebindu bihya-bihya nʼebindu bikulu-kulu.

⁵³Omugulu Yesu abuga erĩtwa emĩsyo eyĩ, mwalũayo.

⁵⁴Neryo Yesu abere ahĩka eka wuwe, mwakangĩrĩryabo omo nyũmba yabo yʼerĩhĩndanamo. Neryo abandu mobasweka bati, Omundu oyũ alũsaya amenge aya go hahi kwehĩ? Kandi mwalũsya ebitiko-tiko ebĩ byo hahi kwehĩ?

⁵⁵Oyũ si mugala wʼomũbatsĩ wʼesyombago kwehĩ? Nyĩnya wuwe siakahulawa mo Marĩa, nʼabagala babo si Yakobo, na Yosefũ, na Sĩmonĩ, na Yũda kwehĩ?

⁵⁶Nʼabali babo, abosĩ sibali haguma netu kwehĩ? Ko mundu oyũ amalũsya emyatsi yosĩ eyĩ yo hahi kwehĩ?

⁵⁷Neryo mobamupona batya. Nĩkwa Yesu mwabwirabo ati, Omũmĩnyererĩ sialibula erĩsĩkĩbwa, imo nʼomo kihugo kiwe nʼomo kĩtũnga kiwe.

⁵⁸Neryo Yesu mwatakolayo ebitiko-tiko bingi busana nʼeritendĩkĩrĩrya lyabo.