Read nande Matayo 14 Bible Online

Matayo 14 - nande bible

Matayo 14

¹Oko mugulu oyo Herode, omũtabali wʼeGalĩlaya, mwowa engulu ya Yesu.

²Neryo Herode mwabwira abakulu buwe ati, Oyũ ni Yoane Mũbatĩsya. Abĩrĩlũbũka oko baholĩ; ekyo kyalekĩre amaka wʼebitiko-tiko aya iniakoleka omwisi wuwe.

³Kusangwa Herode iniabirihamba Yoane, nʼerimuboha, nʼerĩmũhĩra omo mũlĩkĩ. Akola atya busana na Herodĩa, muka mugala wabo ye Fĩlĩpo.

⁴Kusangwa Yoane abya akabwira Herode ati, Emigambo ĩkakũganaya erĩĩmya Herodĩa.

⁵Kandi Herode abya anzĩre erĩĩta Yoane, nĩkwa mubaha abandu, kusangwa abandu babya bakaganza Yoane nga mũmĩnyererĩ.

⁶Nĩkwa omugulu ekiro kyʼeriibuka eributwa lya Herode kyahĩka, namwali wa Herodĩa mwasatira omo katĩkatĩ kabo, neryo mwatsemesya Herode.

⁷Neryo Herode mwalaga omwana-muto oyo nʼerĩlahĩrya ati akandimuha ekindu ekyo akandimutswa.

⁸Neryo koyo wʼomwanamuto oyo mwamuhana abũge ati, Umba hano hʼoko kibindi, omutwe wa Yoane Mũbatĩsya!

⁹Neryo omwami Herode mwakwa engitsi, nĩkwa busana nʼerĩlahĩrya liwe, kandi busana nʼabagenĩ buwe ababya okwʼirya eryo, mwahamula ati omwana-muto oyo ahabawe omutwe wa Yoane.

¹⁰Neryo mwatuma omundu erĩyatwa omutwe wa Yoane omo nyũmba yʼomũlĩkĩ.

¹¹Neryo omutwe wa Yoane mwaletwa oko kibindi, mwahabwa oko mwana-muto oyo, naye mwaleterago nyĩnya wuwe.

¹²Neryo abiga ba Yoane mobasa, mobatwala ekĩnda kya Yoane, mobatakyo; neryo mobayabwira Yesu.

¹³Nĩkwa omugulu Yesu owa omwatsi oyo, mwalũaho omo bwato, mwaya ĩyowene ehandi ahate bandu. Neryo omugulu esyondeko syowa ekyo, mosyalũa omo mĩyĩ, mobamukwama omo bisando.

¹⁴Neryo omugulu Yesu alũa omo bwato, mwalangira endeko nene, mwakwĩrabo bũlĩge, neryo mwalamya abakonĩ babo.

¹⁵Neryo bwabere bwasonda eribya ĩgolo-golo, abiga buwe mobamũhĩkako, bati, Eno ni mbwarara, kandi bwamahumbera; Ulagane nʼabandu bagende omo mĩyĩ nʼeriyigulira kalyo.

¹⁶Nĩkwa Yesu mwabwirabo ati, Sibatolere erigenda; muhebo ebyʼerirya!

¹⁷Neryo abiga mobabwira Yesu bati, Tuwite hano hʼuku mandu atanu masa, nʼamahere abiri.

¹⁸Yesu mwabũga ati, Munyireterebyo hano.

¹⁹Nĩkwa Yesu mwahamula esyondeko ati bĩkale ahisi oko biti; neryo mwĩmya amandu atanu ayo nʼamahere abiri, mwalalamira elubula, mwaha ewasĩngya uku Nyamuhanga. Neryo mwatsũtsanga amandu, mwahago abiga, nʼabiga mobahago oko bandu ababya omo ndeko.

²⁰Abosĩ mobalya, mobũgũta. Neryo mobasongya ebitahangukira ebyasaka, mobũsũlya ebitiri ĩkũmĩ na bibiri.

²¹Neryo abalume abalyabyo babya nga elfu ĩtanu (5,000), abakalĩ nʼabana bataganzĩre kubo.

²²Neryo-neryo mwahatikana abiga ati bingire omo bwato, batsũke embere siwe eyisirya wʼengetsi, omugulu abya akalagana nʼesyondeko.

²³Neryo abere abilagana nʼesyondeko, mwaya oko kitwa ĩyowene eriyasaba. Neryo bwabere bwabya ĩgolo-golo, Yesu mwabyayo ĩyowene.

²⁴Nĩkwa obwato bwabya omo ngetsi mo hali, nʼebisunda ĩbĩkayĩswĩraya oko bwato; kusangwa erihunga lyabya likabuhirira embere syabo.

²⁵Neryo omo kĩsĩsĩmũko kyʼakani kyʼekiro, Yesu mwahĩka kubo, iniakatandayira oko ngetsi.

²⁶Nĩkwa omugulu abiga bamulangira iniakatandayira oko magetsi, mobubaha, bati, Nĩ kĩrĩmũ! Neryo mobalaka nʼobuba.

²⁷Nĩkwa neryo-neryo Yesu mwabũga nabo ati, Mũsĩkaye emitima! Nĩna ngye; simubahe.

²⁸Neryo Petero mwamũsũbĩrya ati, Mukama, wamabya inina we, Unyihamule nyiye aho uli oko magetsi.

²⁹Neryo Yesu mwabũga ati, Wase! Neryo Petero mwalũa omo bwato, akatandayira oko magetsi erĩlolya ahali Yesu.

³⁰Nĩkwa omugulu Petero alangira erihunga, mubaha, nʼerĩtsũka eritobera mwalaka ati, Mukama, ũnyĩlamaye.

³¹Neryoneryo Yesu mwasumba ebyala biwe mwamuhamba, mwamubwira ati, Uwe wʼerĩkĩrĩrya lĩke, busana nakĩ uliatika-tika kwehĩ?

³²Neryo omugulu bahĩka omo bwato, erihunga molyũmbya.

³³Neryo ababya omo bwato mobaramya Yesu, bati, Kwenene uli Mugala wa Nyamuhanga!

³⁴Neryo babere babisoka engetsi, mobahĩka oko kitaka kyʼeGenezaretĩ.

³⁵Nʼomugulu abandu bʼeyo bamuminya, mobatuma omo kihugo kyosĩ ekyabya hakũhĩ nʼeyo, mobaletera Yesu yʼabakonĩ bosĩ.

³⁶Neryo mobalemba-lemba Yesu bati, batũle oko mũsĩke musa wʼolukimba luwe; nʼabosĩ abatũla kulo, mobalamĩbwa.