Read nande Matayo 16 Bible Online

Matayo 16 - nande bible

Matayo 16

¹Neryo Abafarĩsayo nʼAbasadũkayo mobahĩka uku Yesu. Babya banzĩre erimulengako, mobamũbũlya bati akangayebo ekitiko-tiko ekĩkalũa elubula.

²Nĩkwa Yesu mwasũbĩryabo, ati, Omugulu wʼerĩgolo-golo mũkabũga muti, Obũtũkũ bũkandĩsyowana, kusangwa ekyanya kĩhenĩrye.

³Nʼengyakya-ngyakya muti, Bukandibya mũlũmbĩ mũnabwĩre, kusangwa ekyanya kyamabya lukula-kula nʼebĩtũ byamahimba. Mũnasĩ eriminyerera omũsĩndo wʼekyanya, nĩkwa simulitoka eriminyerera ebiminyikalo byʼemigulu kwehĩ?

⁴Abandu ba sesene ni babi, kandi sibawite Nyamuhanga, bakasonda-sonda ekitiko-tiko, nĩkwa sibendisyahabwa ekitiko-tiko kye nʼekitiko-tiko kya Yona. Neryo Yesu mwasĩganĩabo, mwalũaho.

⁵Neryo abiga babere babĩhĩka eyisirya wʼengetsi mobibirirwa eriheka obundu.

⁶Neryo Yesu mwabwirabo ati, Mũlebaye, mũyĩtegaye busana nʼekĩhamya kyʼAbafarĩsayo nʼAbasadũkayo.

⁷Nĩkwa mobatsũka erĩkanĩrya omo katĩkatĩ kabo bati, akabũga atya kusangwa sitwetaheka bundu.

⁸Nĩkwa Yesu, ĩnĩanasĩ omwatsi oyo mwabũga ati, Ĩnywe bandu bʼerĩkĩrĩrya ĩke, busana nakĩ mũkakanĩranaya muti simuwite bundu kwehĩ?

⁹Simulitaminya kwehĩ? Kutse simulyibuka amandu atanu wʼamaelfu atanu (5,000), nʼebitiri bingahi mwakumiramo kwehĩ?

¹⁰Kutse amandu alinda busana nʼabandu elfu ĩnĩ (4,000), nʼebitiri bingahi ebyo mwasongerayamo kwehĩ?

¹¹Ko mukabula muti eriminya ngoko ndabũga nenyũ busana nʼobundu kwehĩ? Mũyĩtegaye busana nʼekĩhamya kyʼAbafarĩsayo nʼAbasadũkayo!

¹²Neryo abiga mobaminya kwʼatalyabwirabo erĩyĩteya busana nʼekĩhamya kyʼobundu, nĩkwa busana nʼerĩkangĩrĩrya lyʼAbafarĩsayo nʼAbasadũkayo.

¹³Nĩkwa omugulu Yesu ahĩka omo kihugo kyʼeKaĩsarĩ-Fĩlĩpĩ, mwabũlya abiga buwe ati, Abandu bakabũga bati, Omugala wʼomundu yondi kwehĩ?

¹⁴Nabo mobasũbĩrya bati, Abandi bati, Yoane Mũbatĩsya; nʼabandi bati, Elĩa; nʼabandi bati, Yeremĩa, kutse omuguma gʼoko bamĩnyererĩ.

¹⁵Nĩkwa Yesu mwabũlyabo ati, Nenyũ mũkabũga muti Ĩngyendi kwehĩ?

¹⁶Sĩmonĩ Petero mwasũbĩrya ati, Uli Kristo, Mugala wa Nyamuhanga oyuliho.

¹⁷Yesu mwamũsũbĩrya ati, Uli nʼobutseme, uwe Sĩmonĩ mugala wa Yona! Kusangwa sihali mundu wakũmĩnyĩsaya omwatsi oyũ, nĩkwa nina Tata wage oyuli elubula.

¹⁸Kandi ngakubwira kʼuli Petero, nʼoko lĩbwe erĩ nasyahĩmba ekanĩsa yage; kandi amaka wʼoluholo siendĩsyakĩndayo na kera.

¹⁹Nasyakuha ebĩboholĩ byʼobwami bwʼelubula, nʼekĩndũkĩ wasyaganĩa muna-kihugo, kyasyaganwa elubula, nʼekĩndũkĩ wasyalĩga muna-kihugo kyasyalĩgwa elubula.

²⁰Neryo Yesu mwaganĩa abiga ati sibabwire mundu kwʼali Kristo.

²¹Erĩtsũka omugulu oyo Yesu Kristo mwatsũka erĩkangya abiga buwe kwʼatolere eriya eYerũsalema, nʼerĩagalĩbwa omo myatsi mingi nʼabakulu, nʼoko bahererĩ bakulu, nʼabakangĩrĩrya bʼEmigambo, nʼerĩĩtwa, nʼerĩlũbũkĩbwa enyũma wʼebiro bisatu.

²²Neryo Petero mwatwala Yesu aho lutambi, mwatsũka erimukunga ati, Mukama, Nyamuhanga aganaye ekyo! Ekĩ sĩkĩkũhĩkeko na kera!

²³Nĩkwa Yesu mwakeba mwabũga na Petero ati, Uwe Satanĩ, ubye enyũma kwĩngye! Uli ndwĩkale yage kusangwa amalengekanĩa wawe si wa Nyamuhanga nĩkwa ni wʼabandu.

²⁴Neryo Yesu mwabwira abiga buwe ati, Omundu amanza erinyikwama, ayigane, aheke omusalaba wuwe, anyikwame.

²⁵Kusangwa omundu Oyukasonda erĩlamya engebe yiwe asyatalyayo; nĩkwa omundu Oyũkatalaya engebe yiwe busana nage, asyabanayo.

²⁶Kusangwa omundu akabana endũndĩ yahi amatunda ekihugo kyosĩ, akalwĩka engebe yʼomutima wuwe kwehĩ? Kutse omundu asyahĩnganĩakĩ busana nʼengebe yiwe kwehĩ?

²⁷Kusangwa Omugala wʼomundu asyasa nʼabamalaĩka buwe omo lukengerwa lwa Tata wuwe; nʼoko mugulu oyo asyahemba obuli mundu ngʼemĩbĩrĩ yiwe kwʼiri.

²⁸Kwenene ngabũga nenyũ, hali abandi oko bimene hano abatendisyahola bate balangira Omugala wʼomundu akasa mo Mwami.